قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ «تاۋەلسىزدىك تاعىلىمى» ماقالاسىندا ەلىمىزدىڭ باستى قۇندىلىعىن اتادى, دەپ حابارلايدى Egemen.kz.
وتىز جىل ىشىندە قازاقستان ەتەك-جەڭىن جيىپ, شەكاراسىن بەكىتىپ, بۇگىندە دەربەس مەملەكەتكە اينالدى. بۇل اتادان كەلە جاتقان ۇلى جەڭىستىڭ جەمىسى. ال تاۋەلسىز قازاقستاننىڭ ەڭ باستى قۇندىلىعى – ءسىز بەن ءبىز.
«مەملەكەتىمىزدىڭ تىرەگى دە, التىن دىڭگەگى دە – قازاقستان حالقى. مەن بويىمداعى قۋات, قىزمەتىمدەگى تاجىريبە, ويىمداعى ءنار – ءبارى-ءبارىن حالقىما قىزمەت ەتۋگە جۇمساپ كەلەمىن», دەپ جازادى ەلباسى ءوزىنىڭ ماقالاسىندا.
ول, سونداي-اق, ۇزاق جىلدار بويى اتاجۇرتىن اڭساپ كەلگەن قانداستارىمىزدىڭ قازاقستانعا ورالۋ ماڭىزدىلىعىنا توقتالا كەتتى.
«سول ءۇشىن تاۋەلسىزدىكتىڭ العاشقى جىلدارىنان بەرى تاعدىر تالايىمەن دۇنيەنىڭ ءتورت بۇرىشىنا تارىداي شاشىلعان ميلليوننان استام قانداسىمىزدى اتامەكەنگە الدىردىم. بۇل ايتار اۋىزعا عانا وڭاي. جەر بەتىندە حالقىنىڭ سانى ميلليونعا جەتپەيتىن قانشاما مەملەكەت بار. ءبىز وسىنشاما قانداسىمىزدى شەتەلدەردەن الدىرىپ قانا قويماي, باسىنا – باسپانا, وزىنە – جۇمىس, ۇرپاعىنا ءبىلىم بەردىك. بۇل ءىس ءالى دە جالعاسىن تابا بەرەدى. وسىنىڭ ءبارى تاۋەلسىزدىكتىڭ ارقاسىندا عانا مۇمكىن بولعانىن ۇمىتپاۋىمىز كەرەك», دەيدى نۇرسۇلتان نازارباەۆ.