2021 جىلدىڭ 10 ايىندا مۇناي-گاز-حيميا ونىمدەرىنىڭ ءوندىرىس كولەمى 147 مىڭ توننانى قۇرادى. بۇل تۋرالى ۇكىمەت وتىرىسىندا قر ەنەرگەتيكا ءمينيسترى ماعزۇم مىرزاعاليەۆ ايتتى, دەپ حابارلايدى Egemen.kz.
«2021 جىلى مۇناي-گاز-حيميا ونىمدەرىن ءوندىرۋ بويىنشا 2 جوبا پايدالانۋعا بەرىلدى. ولار: قۋاتى جىلىنا 57 مىڭ توننا بولاتىن بەنزينگە ارنالعان وكتان كوتەرەتىن قوسپا شىعاراتىن زاۋىت; قۋاتى 57 ملن تەكشە مەتر ازوت جانە 34 ملن تەكشە مەتر قۇرعاق سىعىلعان اۋا وندىرەتىن تەحنيكالىق گاز شىعارۋ زاۋىتى. 2022 جىلى قۋاتى جىلىنا 500 مىڭ توننا پوليپروپيلەن وندىرەتىن زاۋىتتى پايدالانۋعا بەرۋ جوسپارلانعان. بۇگىنگى تاڭدا قۇرىلىس-مونتاجداۋ جۇمىستارى جۇرگىزىلۋدە. جوبانى ىسكە اسىرۋدىڭ جالپى پروگرەسى 96 پايىزدى قۇرايدى», دەدى وڭدەۋ ونەركاسىبىن دامىتۋ تۋرالى بايانداعان مينيستر.
ونىڭ اتاپ وتۋىنشە, مۇنان بولەك, 2025 جىلعا دەيىن ەكى زاۋىتتىڭ قۇرىلىسىن اياقتاۋ جوسپارلانۋدا. اتاپ ايتقاندا اتىراۋ وبلىسىندا قۋاتى جىلىنا 430 مىڭ توننا پوليەتيلەنتەرەفتالات وندىرەتىن زاۋىت پەن باتىس قازاقستان وبلىسىندا قۋاتى جىلىنا 130 مىڭ توننا مەتانول ءوندىرۋ زاۋىتى پايدالانۋعا بەرىلەدى.
«جوعارىدا كورسەتىلگەن جوبالاردى ىسكە اسىرۋ 2025 جىلعا قاراي شىعارىلاتىن مۇناي-گاز-حيميا ءونىمىنىڭ كولەمىن 2 ملن تونناعا دەيىن ۇلعايتۋعا مۇمكىندىك بەرەدى. ال تارتىلعان ينۆەستيتسيالار سوماسى 1,2 ترلن تەڭگەنى قۇرايتىن بولادى», دەدى ماعزۇم مىرزاعاليەۆ.