تۇركىستان وبلىسىندا 4 ادام ىستى گازعا ۋلانىپ, قازا بولدى. بۇل تۋرالى تۇركىستان وبلىسى توتەنشە جاعدايلار دەپارتامەنتىنىڭ ءباسپاسوز قىزمەتىنەن ءمالىم ەتتى, دەپ حابارلايدى Egemen.kz
قايعىلى وقيعا كەلەس اۋدانىنا قاراستى ۇشقىن اۋىلىنداعى جەكە تۇرعىن ۇيدە ورىن الدى. 28 قاراشا كۇنى ساعات 12:30 شاماسىندا «112» قىزمەتىنە حابارلاسقان جەرگىلىكتى تۇرعىن جەكە تۇرعىن ۇيدەن 4 ادامنىڭ, ونىڭ ىشىندە 1 كامەلەتتىك جاسقا تولماعان بالانىڭ ءمايىتى جاتقاندىعى تۋرالى ايتقان.
ء«ۇي ىشىندە ءورت بولعانى بايقالمايدى. ۇيدە تابيعي گازبەن جىلىتۋ جابدىعى ورناتىلعان. پەش قاتتى وتىنمەن جۇمىس ىستەۋگە ارنالعان, تابيعي گازبەن جىلىتۋعا قايتا جابدىقتالعان. قازىرگى تاڭدا وقيعانىڭ ءمان-جايى انىقتالۋدا», دەدى تجد ءباسپاسوز قىزمەتى.
الدىن الا مالىمەت بويىنشا, 49, 47 جاستاعى اعايىندى جىگىتتەر, تۇلعاسى انىقتالماعان ايەل جانە 3-4 جاس شاماسىنداعى ەر بالا كوز جۇمعان.