جەلتوقساندا بايقوڭىردان ءۇش زىمىران ۇشىرىلادى

ەسكە سالا كەتسەك, 2021 جىلدىڭ 24 قاراشاسىندا «پروگرەسس م-ۋم» كولىكتىك جۇك كەمەسى مەن «پريچال» ءتۇيىندى ءمودۋلى بار «سويۋز-2.1ب» زىمىران-تاسىعىشى ءساتتى ۇشىرىلدى.

«پريچالدىڭ» حالىقارالىق عارىش ستانتسياسىمەن ءساتتى ءتۇيىسۋىن نۇر-سۇلتان ۋاقىتىمەن ساعات 20:30-دان باستاپ roscosmos.ru سايتىنان كورۋگە بولادى. بۇل – جىل باسىنان بەرى بايقوڭىر عارىش ايلاعىنداعى ەسەپ بويىنشا 11-ءشى ۇشىرىلىم. جوسپارعا سايكەس, 2021 جىلدىڭ جەلتوقسانىندا بايقوڭىردان تاعى 3 ۇشىرىلىم بەلگىلەنگەن. 2021 جىلدىڭ 8 جەلتوقسانىندا «سويۋز مس-20» كولىكتىك باسقارىلاتىن كەمەسى بار «سويۋز-2.1ا» زىمىران-تاسىعىشىن عارىشقا جونەلتۋ كوزدەلگەن.

ەكيپاجدار ءبىر اپتاعا جۋىق ۋاقىت بايقوڭىردا ستارت الدىنداعى دايارلىقتان ءوتىپ جاتىر. 12 جەلتوقساندا ورتا ساناتتاعى «ەكسپرەسس-امۋ3», «ەكسپرەسس-امۋ»7 گەوستاتسيونارلىق تەلەكوممۋنيكاتسيالىق اپپاراتتارى بار «پروتون-م/بريز-م» زىمىران-تاسىعىشى ۇشىرىلماق.

ال 27 جەلتوقساندا بايقوڭىردان OneWeb سپۋتنيكتەرىنىڭ كەزەكتى پارتياسى تيەلگەن «سويۋز-2.1ب» زىمىران-تاسىعىشىن ۇشىرۋ بەلگىلەندى.