قىرعىزستان دەپۋتاتتىعىنا كانديدات مەدەربەك ساققاراەۆتا قازاقستان ازاماتتىعى بولۋى مۇمكىن دەگەن كۇدىككە ءىلىندى. وسك اقپاراتتى تەكسەرەدى, بەرەدى Egemen.kz.
24.kg Facebook-تە № 31 شۋي-كەمين وكرۋگى بويىنشا دەپۋتاتتىققا كانديدات مەدەربەك ساققاراەۆ تۋرالى قۇجات جاريالانعانىن جازادى.
قۇجات الماتى پوليتسيا دەپارتامەنتىنەن الىنعان. وعان كوشى-قون قىزمەتى باسقارماسىنىڭ باستىعى ا. ك. بۋتۋنچينوۆ قول قويعان.
وندا ساققاراەۆتىڭ ءوزى باس تارتپاعان قازاقستان ازاماتتىعى بار ەكەنى ايتىلعان.
«قر جەكە تۇلعالارىنىڭ مەملەكەتتىك دەرەكتەر قورىنا سايكەس, 12.12.1971 جىلى تۋعان ساككاراەۆ مەدەربەك جامانگۋلوۆيچ قازاقستان رەسپۋبليكاسىنىڭ ازاماتى بولىپ تابىلادى. قازاقستاننان تىس جەرلەرگە تۇراقتى تۇرۋعا كەتۋ ماسەلەسى بويىنشا قازاقستان رەسپۋبليكاسىنىڭ ازاماتتىعىنان شىعۋ/جوعالتۋ تۋرالى الماتى قالاسى پد ءواب-نە جۇگىنگەن جوق», دەيدى الماتى قالاسى پد كوشى-قون قىزمەتى باسقارماسىنىڭ باستىعى ا. ك. بۋتۋنچينوۆ.
قىرعىزستاننىڭ ورتالىق سايلاۋ كوميسسياسى بۇل مالىمەتتەردى تەكسەرۋ ءۇشىن سۇراۋ جىبەردى. ەگەر اقپارات راستالسا, ساققااراەۆتى تىركەۋ توقتاتىلادى. قىرعىز زاڭى بويىنشا دەپۋتاتتىڭ وزگە ازاماتتىعىنا يە بولۋىنا تىيىم سالىنادى.
بۇل قىرعىزستاندىق ساياساتكەرلەردىڭ قازاقستان ازاماتتىعى بار دەپ كۇدىكتەنۋىنىڭ ءبىرىنشى جاعدايى ەمەس.
2017 جىلى پرەزيدەنتتىك سايلاۋ الدىندا باق-تا پرەزيدەنتتىككە كانديدات ومىربەك بابانوۆتىڭ قازاقستان ازاماتتىعى بولعانى تۋرالى اقپارات پايدا بولدى. بابانوۆتىڭ ءوزى بۇل اقپاراتتى تەرىسكە شىعاردى. قازاقستاننىڭ ىشكى ىستەر مينيسترلىگى دە ونىڭ ءسوزىن راستادى.
«قازاقستاندىق زاڭناما بويىنشا بابانوۆ قر ازاماتى بولعان ەمەس», دەپ حابارلادى ءىىم.