قازاقستاندا ءىرى مۇناي وپەراتورلارى بىرلەسكەن جول كارتاسىن بەكىتتى. بۇل تۋرالى قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ۇكىمەت وتىرىسىندا ءمالىم ەتتى, دەپ حابارلايدى Egemen.kz.
ء«ىرى مۇناي وپەراتورلارى (تشو, كپو, NCOC) بىرلەسكەن جول كارتاسىن بەكىتتى. ول جەردە ۇلتتىق ستاندارتتاردى بەيىمدەۋ ماسەلەسى, تەندەرلىك راسىمدەرگە قازاقستاندىق وندىرۋشىلەردى قولداۋ مەحانيزمدەرىنىڭ ءىرى وپەراتورلارىن ەنگىزۋ قاراستىرىلعان. سونىمەن قاتار 2025 جىلعا دەيىن جەرگىلىكتى قامتۋدى ۇلعايتۋ جانە مۇناي-گاز جابدىقتارىنىڭ 5 ءوندىرىسىن وقشاۋلاۋ شاراسى قولعا الىنادى», دەدى بەيبىت اتامقۇلوۆ.
ءمينيستردىڭ ايتۋىنشا, ەلىمىزگە يمپورتتالاتىن 1 مىڭنان استام تاۋارعا تالداۋ جاسالدى.
«بۇگىندە مۇناي-گاز ماشيناسىن جاساۋدى دامىتۋدىڭ حالىقارالىق ورتالىعىنىڭ جۇمىسى باستالدى. اتالعان ورتالىق ءىرى وپەراتورلارمەن (تشو, كپو, NCOC) بىرلەسىپ, تەحنولوگيالاردى وقشاۋلاۋعا جانە ترانسفەرتتەۋگە كىرىستى. ەلىمىزگە يمپورتتالاتىن 1 200-دەن استام تاۋارعا تالداۋ جۇرگىزىلدى. وقشاۋلاۋ ءۇشىن 3 تاۋار توبى ىرىكتەلدى (تيەك ارماتۋراسى, ەلەكتر تەحنيكالىق جابدىقتار جانە باقىلاۋ-ولشەۋ اسپاپتارى جانە اۆتوماتيكا). سونداي-اق, ورتالىققا جىل سوڭىنا دەيىن ينۆەستيتسيالىق جوبالار مەن وندىرىستەردى وقشاۋلار بويىنشا ۇسىنىستار جاساۋ مەن وتاندىق وندىرۋشىلەردىڭ قىزمەتىندەگى كەدەرگىلەردى انىقتاۋ مىندەتتەلدى», دەيدى ول.