سىرالعى سۋسىن جايىندا ءسوز ىلىكسە الدىمەن اجەلەرىمىزدىڭ توبىلعىمەن تورسىعىن ىستاپ, ءسۇر جايانىڭ, قازىنىڭ سىنىق سۇيەگىن سالىپ اشىتقان سارى قىمىزى مەنمۇندالايتىنداي. سابا تولى قىمىزدى ساپىرا شايقاپ, ساسكە اۋسا دا سوراپتاپ وتىراتىن ءسات كوز الدىڭا كەلەدى. ۇلىستى ۇلتىمىزدىڭ وسى ءبىر قۋاتتى دامگە قۇمارلىعى كوپتى سۇيسىنتەدى. بىراق دەيمىز-اۋ, ونى وزگە ۇلت وكىلدەرى دە مۇنشا اسپەتتەپ, قادىر تۇتاتىنىن ەندى اڭداپ وتىرمىز.
قىمىز ارقىلى قازاقتىڭ كونە كەيپىن, بەكزادا بولمىسىن كورسەتكىسى كەلگەن سۋرەتشى ولگا كۋجەلەنكونىڭ «قىمىز قۇياتىن توستاعان» ناتيۋرمورتى ۇلت تاربيەسىنىڭ وزەگى ۇلتتىق تاعامدا ەكەنىن ايتىپ تۇرعانداي. تاريح سويلەدى, قىلقالام قۋاتتادى.
قازاقستاننىڭ بەينەلەۋ ونەرىنىڭ قالىپتاسۋ ۋاقىتى ولگا كۋجەلەنكو سىندى سۋرەتشىلەردىڭ شىعارماشىلىعىمەن بايلانىستى. ول 1934 جىلى كوركەمسۋرەت الەۋەتىن توپتاستىرۋ ءۇردىسى باستالعان كەزدە دنەپروپەتروۆسكىدەن قازاق دالاسىنا قونىس اۋداردى. الماتىعا كەلگەن سوڭ قالالىق, رەسپۋبليكالىق جانە بۇكىلوداقتىق دەڭگەيدەگى بارلىق كورمەگە قاتىسا وتىرىپ, قالا تىرشىلىگىنە بەلسەنە ارالاستى.
سۋرەتشى بەينەلەۋ ونەرىنىڭ بارلىق جانرىن جازدى. 1930 جىلدارى – يندۋستريالىق كومپوزيتسيالار, 1950 جىلدارى – تىڭ يگەرۋ تۋرالى جۇمىستارى, كولحوز ومىرىنەن سيۋجەتتەرى, 1950 جىلدىڭ سوڭىنان باستاپ شىعارماشىلىعىندا پورترەت پەن ناتيۋرمورت ورىن الدى. ءسويتىپ, ولگا كۋجەلەنكو الماتى المالارى مەن كەرەمەت گۇلدەرىنىڭ داڭقىن شىعاردى.
ونىڭ ناتيۋرمورتى بىرتە-بىرتە ۇلتتىق سيپاتقا يە بولا باستادى. «قىمىز قۇياتىن توستاعان» كارتيناسىندا ويۋلى كىلەم فونىنداعى كومپوزيتسيا ورتاسىنان قازاقى دوڭگەلەك ۇستەلدى كورەمىز. وعان اق داستارقان جايىلىپ, ۇستىنە تەمىر جاپسىرمالارمەن بەزەندىرىلگەن اعاش زەرەن, سۇيەك ساپتى وجاۋ, تورسىق, كەسە سىندى قازاقتىڭ ۇلتتىق اس ءۇي جابدىقتارىن قويعان جانە پىسكەن ادەمى المالاردى شاشىپ تاستاعان. ۇستەلدىڭ جانىندا ويىپ ورنەكتەلگەن ساندىق, ال ونىڭ ۇستىندە اشەكەيلى جاپسىرمالارى مەن جارتىلاي اسىل تاستار ورناتىلعان تىلىمشەلەرى بار قايىس بەلدىك جاتىر.
سۋرەتشى نازارىن جارىققا, كونتراسقا جانە ساندىك دەتالدارعا اۋدارىپ, وسىلاردىڭ كومەگىمەن ناتيۋرمورت زاتتارىن جابدىقتايدى. ەكىنشى پلانداعى كىلەمنىڭ ساندىك فونى تاپ-تازا اق داستارقانعا قاراما-قارسى بولىپ تۇر. ۇلكەن زەرەن شاشىلىپ جاتقان المالارمەن قاتار ورنالاسقان. جارىق ءتۇسىپ تۇرعان داستارقاننىڭ كولەڭكە جاعىنا تورسىقتى جاسىرعان. جيرەن, قىزىل تۇستەردىڭ باسىمدىعى تۇرمىستىق زاتتاردىڭ جىلىلىعىن اسپەتتەيدى.
كارتيناداعى دەتالداردىڭ قانىق بوياۋمەن ارلەنۋى الدەبىر تىنىشتىققا تارتادى. بۇيىمداردىڭ ساندىلىگى, بەزەندىرىلۋى جانە ماتەريالى سۋرەتشىنىڭ اسقان شەبەرلىگىن كورسەتىپ تۇر. بۇل اۆتوردىڭ قازاق تۇرمىسى مەن تالايعى تاريحىنا دەگەن جەكە كوزقاراسى.