بۇل كۇندەرى بانگلادەشتىڭ داككا قالاسىندا ساداق اتۋدان ازيا بىرىنشىلىگى ءوتىپ جاتقانى بەلگىلى. جارىستىڭ ەكىنشى كۇنىندە قازاقستان كومانداسى سارى قۇرلىق چەمپيوناتىنداعى ەكىنشى مەدالىن جەڭىپ الدى.
قازاقستاننىڭ ۇلتتىق وليمپيادا كوميتەتىنىڭ مالىمەتىنشە, بلوكتىق ساداق اتۋدان قازاقستان ەرلەر كومانداسى قۇرلىق دوداسىنىڭ فينالىندا ونەر كورسەتىپ, كۇمىس جۇلدەگە قول جەتكىزدى. سەرگەي حريستيچ, اقبارالى قاراباەۆ جانە اندرەي تيۋتيۋن ۇشتىگىنەن قۇرالعان قازاقستان قۇراماسى باس جۇلدە ءۇشىن وتكەن باسەكەدە وڭتۇستىك كورەيا قۇراماسىنان ءبىر-اق ۇپاي ايىرماسىمەن ۇتىلىپ قالدى – 235:236.
ايتا كەتەيىك, بۇل – ازيا چەمپيوناتىنداعى قازاقستان قۇراماسىنىڭ ەكىنشى مەدالى. بۇعان دەيىن كلاسسيكالىق ساداق اتۋدان قازاقستاننىڭ ايەلدەر كومانداسى قولا مەدال جەڭىپ العان ەدى.