دەنساۋلىق ساقتاۋ مينيسترلىگىنىڭ بۇرىنعى باسشىسى ەلجان ءبىرتانوۆ ۇيقاماعىن تاعى ەكى ايعا ۇزارتۋ تۋرالى سوت شەشىمىنە شاعىم ءتۇسىردى, دەپ حابارلايدى Egemen.kz.
12 قاراشادا نۇر-سۇلتان قالاسىنىڭ تەرگەۋ سوتى ەلجان بىرتانوۆقا بۇلتارتپاۋ شاراسىن تاعى دا ۇزارتتى. سوت ونى تاعى ەكى اي, 14 قاڭتارعا دەيىن, تاراپتار قىلمىستىق ءىس ماتەريالدارىمەن تانىسقانشا, ءۇي قاماۋىندا بولۋ كەرەك دەپ ەسەپتەدى. بىراق ءبىرتانوۆ پەن ونىڭ قورعاۋشىلارى بۇل شەشىممەن كەلىسپەدى.
18 قاراشادا نۇر-سۇلتان قالالىق سوتىندا اپەللياتسيالىق شاعىمدى قاراۋ باستالدى. ەكس-ءمينيستردىڭ ادۆوكاتتارى سوت القاسىنىڭ سۋدياسى ەلەونورا وڭعارسىنوۆاعا قارسىلىق ءبىلدىردى. ادۆوكات نۇرلان بەيسەكەەۆتىڭ ايتۋىنشا, بۇعان دەيىن سۋديا بىرتانوۆقا ءۇي قاماۋىن ۇزارتۋ تۋرالى ولاردىڭ اپەللياتسيالىق شاعىمدارىن قاراعان, سوندىقتان ول بىرجاقتى بولۋى مۇمكىن.
«سۋديا وڭعارسىنوۆا ءوزىنىڭ بۇرىنعى قاۋلىلارىنا بايلانىستى شاعىمدى ەركىن, بەيتاراپ جانە تاۋەلسىز قاراي المايدى. ول ءبىرتانوۆتى قاماۋعا الۋدى ۇزارتۋ تۋرالى ءوزىنىڭ شەشىمدەرىنە قارسى شىعا المايدى», دەپ تولىقتىردى ادۆوكات دميتري كۋرياچەنكو.
سۋديا الماس تاجىمبەتوۆ قارسىلىق بىلدىرۋدەن باس تارتتى. ول ادۆوكاتتاردىڭ دالەلدەرى قىلمىستىق ىسكە قاتىستى ەكەنىن ءتۇسىندىردى.
ادۆوكات نۇرلان بەيسەكەەۆ تەرگەۋ سوتىنىڭ سۋدياسى اقمارال يساەۆانىڭ قاۋلىسىنىڭ كۇشىن جويۋ كەرەكتىگىن ايتتى.
«كۋاگەر تسوي, ياعني قازىرگى دەنساۋلىق ساقتاۋ ءمينيسترى, 2020 جىلعى 21 قازاندا سوزبە-ءسوز بىلاي دەدى: «اكتىلەردى شۋبين مەن ەسەنباي قول قويۋعا الىپ كەلدى جانە جۇمىستاردىڭ ورىندالعانىن ءتۇسىندىرىپ, ءتيىستى قۇجاتتاردى قوسا بەردى. بارلىق قاجەتتى ۆيزالار تۇرعانىنا كوز جەتكىزگەننەن كەيىن مەن ورىندالعان جۇمىستاردىڭ اكتىلەرىنە قول قويدىم». تەرگەۋشى اشەنوۆتىڭ ەكى رەت قويعان سۇراعىنا كۋاگەر تسوي: ء«بىرتانوۆ ماعان ورىندالعان جۇمىستاردىڭ اكتىلەرىنە قول قويۋ جونىندە ەشقانداي تاپسىرما بەرگەن جوق, ءبىرتانوۆ پلاتفورما بويىنشا بارلىق جۇمىس كولەمىن قابىلداۋ تۋرالى ماسەلەنى الدىما قويعان جوق», دەپ وقىدى ادۆوكات.
ەكس-ءمينيستردىڭ ءوزى سوتتان ءۇي قاماۋىن ۇزارتۋ تۋرالى قاۋلىنى الىپ تاستاپ, ونى ەشقايدا كەتپەۋ تۋرالى قولحاتپەن الماستىرۋدى سۇرادى.
«مەن وسى شەكتەۋدى ەشقانداي جولمەن بۇزبايتىنىما جانە قازاقستان رەسپۋبليكاسىنىڭ زاڭىن قانداي دا ءبىر جولمەن بۇزبايتىنىما, سىزدەردىڭ ابىرويلارىڭىزعا كەپىلدىك بەرەمىن. مەن زاڭعا باعىناتىن ازاماتپىن. مەن بۇل ءىستى زاڭدى تۇردە قاراۋعا مۇددەلىمىن», دەدى ەلجان ءبىرتانوۆ.
ال پروكۋرور تولەگەن جاراسپاەۆ ءوز سوزىندە ءبىرتانوۆتىڭ ءۇي قاماۋىن ۇزارتۋ تۋرالى قاۋلىنى وزگەرىسسىز قالدىرۋدى ءوتىندى.
ناتيجەسىندە, سۋديا وڭعارسىنوۆا 12 قاراشاداعى قاۋلىنى وزگەرىسسىز قالدىرىپ, ادۆوكاتتاردىڭ جەكە شاعىمدارىن قاناعاتتاندىرمادى.
ەسكە سالا كەتسەك, بۇرىنعى دەنساۋلىق ساقتاۋ ءمينيسترى ەلجان ءبىرتانوۆ دەنساۋلىق ساقتاۋ مينيسترلىگىنىڭ اقپاراتتاندىرۋ پلاتفورماسىن قابىلداۋ جانە پايدالانۋعا بەرۋ ارقىلى لاۋازىمدىق وكىلەتتىكتەرىن اسىرا پايدالاندى دەپ ايىپتالۋدا. قىلمىستىق ءىس 133 تومنان تۇرادى.
ءبىرتانوۆ ءبىر جىلدان بەرى ءۇي قاماقتا وتىر