وبلىستىق ونكولوگيالىق ديسپانسەردىڭ ماتەريالدىق-تەحنيكالىق بازاسى تاعى ءبىر زاماناۋي قوندىرعىمەن تولىقتى. مەديتسينالىق مەكەمەنىڭ باس دارىگەرى ەرمەك ءابدىرىموۆتىڭ ايتۋىنشا, ءوڭىر رەسپۋبليكالىق قازىنانىڭ قاراجاتىنا ساتىپ الىنعان كومپيۋتەرلىك توموگراف ورناتىلعان ءۇش وبلىستىڭ ءبىرى سانالادى.
– باعاسى 320 ميلليون تەڭگە تۇراتىن امبەبەپ مەديتسينالىق قۇرال-جابدىقتىڭ ارتىقشىلىقتارى وتە كوپ. ەڭ باستى جاڭالىعى رەتىندە كۇردەلى وبىر اۋرۋلارىنىڭ دياگنوزىن ساناۋلى ۋاقىت ىشىندە جەدەل ءارى اينا-قاتەسىز ءدال انىقتاۋ مۇمكىندىگىن ايتار ەدىم. وكىنىشكە وراي, وبلىس وبىر اۋرۋلارى جونىنەن ەلىمىزدە الدىڭعى ورىنداردىڭ بىرىندە تۇرعانىن ەسكەرسەك, اسا قاتەرلى ناۋقاستاردىڭ الدىن الۋعا, ۋاقتىلى ەم-دوم قولدانۋعا ۇلكەن سەپتىگىن تيگىزەرى انىق, – دەيدى ەرمەك عابباس ۇلى.
بۇگىندە كومپيۋتەرلىك توموگرافپەن جۇمىس ىستەيتىن ماماندار بەلارۋستە بىلىمدەرىن جەتىلدىرىپ كەلدى. ساناۋلى كۇندەردەن كەيىن العاشقى پاتسيەنتتەر تەگىن قابىلدانا باستايتىن بولادى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.