وبلىستىق قازاق دراما تەاترىندا راقىمجان وتاربايدىڭ «كولەڭكە» ەكسپەريمەنتتىك قويىلىمىنىڭ تۇساۋى كەسىلدى. دوس قۇباشتىڭ رەجيسسەرلىگىمەن ساحنالانعان بۇل درامانى دۇنيەگە قۇنىققان, ناشاقورلىققا بوي الدىرعان, جات ءدىني اعىمنىڭ ارباۋىندا جۇرگەن ازاماتتار كورسە عوي دەيمىز. ساباق بولار ما ەدى؟!
ءبىر وتباسىنداعى كەلەڭسىز جاعدايلار ارقىلى بۇگىنگى قوعامنىڭ قاسىرەتىن كورسەتكەن قويىلىم تۇيسىكسىزدىڭ وزىنە وي تۇيگىزۋى بەك مۇمكىن. ارتىستەر ادام مەن قوعام, تۇلعا مەن توبىر تارتىسقان زاماننىڭ شىندىعىن بۇكپەسىز سۋرەتتەپ, اۆتوردىڭ ويىن كورەرمەنگە انىق جەتكىزدى.
بەرەكە-بىرلىكتەن جۇرداي اۋلەتتىڭ ۇلكەن ۇلى تەندەرگە ءتۇسىپ, قوماقتى قارجى ۇتقانىمەن ماقتانادى, بولاشاققا جوسپار قۇرادى. مەنمەندىگى باسىمداۋ. ونىڭ ەكى ءجۇزدى كەلىنشەگى دۇكەننىڭ يەسى. وي-ءورىسى تايازداۋ ايەل. ورتانشى ۇلدارى نە ءبىتىرىپ جۇرگەنى بەلگىسىز. ال كەنجە ۇل مەن كەلىن جات ءدىني اعىمعا سانالارى ۋلانعان, ءتىپتى اكە-شەشەسىنەن بەزىنىپ كەتۋگە ءازىر. تۋعاندارىن كاپىر دەپ, ارالاسۋدان قالعان. اكە-شەشەسى بولسا, بالا-شاعاسىنىڭ قاس-قاباعىن باعىپ, تىلەۋىن تىلەپ وتىرۋدان باسقا امالدارى قالماعان.
شيەلەنىستىڭ ءبارى شولجاڭداعان كەنجە قىزدارىنان باستالادى. قىدىرىپ بۋرابايعا بارىپ كەلەمىن دەپ, ءىرى كولەمدە ەسىرتكى اكەتىپ بارا جاتقانداردىڭ كولىگىنە سوقتىعىسقان. سودان اۋلەتتىڭ توبەسىنە قارا بۇلت ءۇيىرىلىپ, اقىر سوڭى بەس بولمەلى باسپانالارىنان ايىرىلعان. ۇلكەن ۇلدارى شەتەلگە قاشىپ تىنعان. جات ءدىني اعىمنىڭ جەتەگىندە جۇرگەن كەنجە ۇل مەن كەلىندەرى سيرياداعى ۇشقان وق پەن جارىلىستاردىڭ ورتاسىنان ءبىر-اق شىققان. شاڭىراقتىڭ ورتاعا تۇسكەنى وسى شىعار. ءيا, قويىلىم قوعامنىڭ ايناسى ىسپەتتى. ەڭ باستىسى, زامان دەرتى دەندەپ, قازاقتىڭ قايماعى بۇزىلماسا ەكەن دەپ تىلەدىك. «كولەڭكە» قويىلىمىنىڭ ماقساتى دا سول ەدى, ەلدىڭ ويىن تۇزەۋ...
وسكەمەن