ەلوردا كومانداسى بيىل قۇرلىقتىق حوككەي ليگاسىنىڭ (قحل) 14-ءشى ماۋسىمىنا قاتىسىپ جاتىر. وسى جىلدار ىشىندە گاگارين كۋبوگى جولىنداعى باسەكەدە ءۇش مارتە شيرەك فينالعا جەتكەن. بىلتىر پلەي-وفف ساتىسىنا شىققانىمەن, 1/8 فينالدا ماگنيتوگوردىڭ «مەتاللۋرگ» ۇجىمىنان ايلاسىن اسىرا المادى. دەسە دە ەلوردالىق كلۋبتىڭ بيىل سول ناتيجەگە جەتۋىنىڭ ءوزى ۇلكەن جەتىستىك بولاتىن سياقتى. ويتكەنى «بارىستىڭ» قازىرگى ويىنى كوڭىل كونشىتپەيدى. يۋري ميحايليس شاكىرتتەرى قحل-داعى ەكى ايدىڭ قورىتىندىسى بويىنشا «شىعىس» كونفەرەنتسياسىندا 27 ويىننان كەيىن 24 ۇپايمەن 10-ورىندا كەلەدى.
جاڭا ءۇش ويىنشىمەن تولىقتى
بىلتىرعى ماۋسىمنان باستاپ «بارىس» تىزگىنىن وتاندىق مامان يۋري ميحايليس ۇستاعانى بەلگىلى. كەزىندە حوككەيشى رەتىندە جانكۇيەرلەردىڭ كوڭىلىنەن شىعا بىلگەن يۋ.ميحايليس ازىرشە باپكەر رەتىندە ءوزىن مويىنداتا الار ەمەس. «بارىس» بىلتىرعى ماۋسىمدى ءتاۋىر وتكىزگەنىمەن, بيىلعى ونەرى جانكۇيەرلەردىڭ كوڭىلىنەن شىقپاي تۇر. بۇعان ماۋسىمارالىق ۇزىلىستەن كەيىن كلۋب ساپىنان بىرقاتار تاجىريبەلى ويىنشىلاردىڭ باسقا كومانداعا اۋىسىپ كەتۋى دە سەبەپ بولۋى ابدەن مۇمكىن. ويتكەنى ولاردىڭ ورنىنا كەلگەن جاڭا حوككەيشىلەر كومانداعا بىردەن ءسىڭىسىپ كەتە المادى. قازاننىڭ باسىندا «بارىس» شابۋىلشى كريستيان توماسپەن كەلىسىمشارتتى بۇزعانىن حابارلادى. ول قحل-دا 9 ماتچ وتكىزىپ, ءبىر مارتە عانا ناتيجەلى پاسپەن كوزگە تۇسە الدى.
يۋري ميحايليس وسىلايشا وزىنە قاجەتسىز ويىنشىلارمەن ماۋسىم ورتاسىندا قوشتاسىپ, «بارىس» ساپىندا بۇرىن ويناپ كەتكەن حوككەيشىلەردى شاقىرا باستادى. ماسەلەن, بىرەر كۇن بۇرىن ەلورداعا شابۋىلشىلار انتون ساگادەەۆ پەن ليندەن ۆەي ورالدى. العاشقىسى جىل باسىندا ءياروسلاۆلدىڭ «لوكوموتيۆىنە» اۋىسقان بولسا, ەكىنشىسى سوڭعى كەزدەرى سانكت-پەتەربۋرگتىڭ سكا كلۋبىندا ونەر كورسەتتى. بىراق ەكەۋى دە بيىل ءوز كلۋبتارىندا جارقىراپ كوزگە تۇسە المادى. ساگادەەۆ بۇگىنگە دەيىن 8 رەت مۇزايدىنعا شىعىپ, ارىپتەستەرىنە ءبىر مارتە ناتيجەلى پاس اسىرعان. ال 2017-2018 جىلعى ماۋسىمدا «بارىستى» ورگە سۇيرەگەن كانادالىق حوككەيشى سوڭعى ءۇش جىل ىشىندە الدىمەن ماسكەۋدىڭ, سودان كەيىن سانكت-پەتەربۋرگتىڭ اسكەري كوماندالارىندا وينادى. تسسكا قۇرامىندا ءجۇرىپ ول گاگارين كۋبوگىنىڭ يەگەرى اتانسا, بيىلعى ماۋسىمدا سكا قۇرامىندا 21 ماتچتا مۇزايدىنعا شىعىپ, 11 (5+6) ۇپاي جينادى. ەكى ويىنشى دا «بارىستا» جىل سوڭىنا دەيىن ونەر كورسەتەدى.
سونىمەن قاتار حالىقارالىق ءۇزىلىس كەزىندە ەلوردالىق ۇجىم ءوز قاتارىنا سلوۆاكيا قۇراماسىنىڭ شابۋىلشىسى توماش يۋرچونى قوستى. سلوۆاكيالىق «كوشيتسە» كلۋبىنىڭ تاربيەلەنۋشىسى ءار جىلدارى قحل جانە امەريكا حوككەي ليگاسىنداعى «دەترويت», «چيكاگو» جانە «ەدمونتون» سەكىلدى كلۋبتاردىڭ نامىسىن قورعاپ, ءبىراز تاجىريبە جيناقتاعان. بىلتىرعى ماۋسىمدا ول «ۆەگاس» پەن «حەندەرسون سيلۆەر نايتس» كوماندالارىندا ويناپ, 13 (5+8) ۇپاي جيناعان. سونداي-اق ول جۋىردا ۇلتتىق قۇراماسىمەن بىرگە كەلەسى جىلى بەيجىڭدە وتەتىن وليمپيا ويىندارىنا جولداما جەڭىپ الدى.
ستاتيستيكا نە دەيدى؟
«بارىستىڭ» قازان ايىنداعى ويىندارىن قىركۇيەكتەگى باسەكەلەرمەن سالىستىرار بولساق, شابۋىلشىلاردىڭ ناتيجەلىلىگى تومەندەگەنىن بايقايمىز. قىركۇيەكتە «بارىس» 11 ويىندا 27 شايبا سوققان بولسا, قازاندا 14 ماتچ وتكىزىپ, 33 مارتە قارسىلاس كوماندانىڭ قاقپاسىن ءدال كوزدەگەن. ال بۇگىنگە دەيىن قازاقستاندىق كوماندا 27 ويىندا 65 شايبا سوقتى ء(بىر ويىندا ورتاشا ەسەپپەن 2,4). وسى كورسەتكىش بويىنشا قحل-دىڭ كوشىن «مەتاللۋرگ» كلۋبى باستاپ تۇر. ماگنيتوگور كومانداسىنىڭ ەنشىسىندە 90 شايبا بار. سونداي-اق قاقپاسىنا ەڭ از شايبا جىبەرگەن دە ءدال وسى «مەتاللۋرگ» بولىپ تۇر – 49. «بارىس» بۇل ۋاقىت ارالىعىندا ءوز قاپاسىنا 74 شايبا وتكىزىپ, تومەنگى ورىندا تۇر.
«بارىس» قازان ايىنداعى ەڭ ءىرى جەڭىسىنە ۆلاديۆوستوكتا قول جەتكىزدى. يۋري ءميحايليستىڭ كومانداسى «ادميرالدى» 4:1 ەسەبىمەن جەڭدى. ەرەكشە اتاپ وتەرلىگى, بۇل ويىندا «بارىس» ساپىنان كوزگە تۇسكەن دىنمۇحامەد قايىرجان كوماندانىڭ قحل-دا گول سوققان ەڭ جاس ويىنشىسى اتاندى. 18 جاستاعى شابۋىلشى بيىلدان باستاپ «بارىستىڭ» نەگىزگى قۇرامىندا ويناپ ءجۇر.
وتكەن ايداعى ەڭ ءىرى جەڭىلىس 24 قازاندا «بارىس ارەنادا» تىركەلدى. بۇل كەشتە «بارىس» چەرەپوۆەتستىڭ «سەۆەرستال» كلۋبىنا 1:5 ەسەبىمەن جول بەردى.
ەكى ايدىڭ قورىتىندىسى بويىنشا, «بارىس» ساپىندا ازىرگە نيكيتا ميحايليستەن وزاتىن شابۋىلشى تابىلماي تۇر. 27 ويىندا ول 13 مارتە مەرگەندىگىمەن كوزگە ءتۇسىپ, 17 رەت ارىپتەستەرىنە ناتيجەلى پاس اسىرعان. 30 ۇپاي جيناعان ميحايليس تەك «بارىستىڭ» ەمەس, قحل-دىڭ ۇزدىك سۇرمەرگەندەر ءتىزىمىنىڭ ءۇشىنشى ساتىسىنا جايعاسقان. ونىڭ الدىندا 39 ۇپايى بار (13+26) «دينامو» وكىلى (ماسكەۋ) ۆاديم شيپاچيوۆ پەن «ۆيتياز» شابۋىلشىسى نيكو ويامياكي (19+11) تۇر.
ميحايليسپەن قاتار دارەن ديتس تە كوماندانىڭ ۇزدىك سۇرمەرگەنى سانالادى. ول 27 ماتچتا قارسىلاستار قاقپاسىنا 9 شايبا سوعىپ, 10 رەت ارىپتەستەرىنىڭ كوزگە تۇسۋىنە جاعداي جاساعان. پايدالىلىق كوەففيتسيەنتى جاعىنان ديتس تە ليگاداعى ۇزدىكتەردىڭ ءبىرى. دارەن قورعاۋشى-بومبارديرلەر اراسىندا 29 ۇپايمەن ەكىنشى ورىنعا ورنالاسقان. ودان تەك تەودور لەننستريوم (تورپەدو) عانا وزىپ تۇر. ول ديتستەن 4 ۇپايعا ارتىق جيناعان.
الداعى قارسىلاستارىمىز كىمدەر؟
بۇل ايدا «بارىس» التى ويىن وتكىزەدى. ءۇش ويىن سىرت ايدىندا, ءۇش ماتچتى «بارىس ارەنادا». قاراشاداعى باسەكەنى ەلوردالىق ۇجىم كەشە سىرت ايدىندا «سوچي» كلۋبىمەن باستادى. بۇل – ەكى ۇجىم اراسىنداعى وسى ماۋسىمداعى العاشقى ويىن بولماق. قازىرگى تاڭدا ء«سوچيدىڭ» دە جاعدايى اسا ءماز ەمەس. ولار «باتىس» كونفەرەنتسياسىنداعى تۋرنير كەستەسىندە 22 ۇپايمەن 11-ورىندا كەلەدى.
بۇل ماتچتان كەيىن جەرلەستەرىمىز ماسكەۋگە قوناققا بارىپ, جەرگىلىكتى «سپارتاكپەن» كەزدەسەدى. قىركۇيەكتە «مەگاسپورت» مۇزايدىنىندا وتكەن ويىندا «بارىس» 1:4 ەسەبىمەن جەڭىلىپ قالعان ەدى. «سپارتاك» «باتىس» كونفەرەنتسياسىنداعى تۋرنير كەستەسىندە 30 ۇپايمەن 8-ساتىعا جايعاسقان.
ەلوردالىقتار سىرت ايدىنداعى ويىندار سەرياسىن چەرەپوۆەتستە تۇيىندەيدى. 24 قازاندا «بارىس ارەنادا» وتكەن ويىندا «سەۆەرستالدان» 1:5 ناتيجەسىمەن جەڭىلگەن جەرلەستەرىمىز ەندى «مۇز سارايىندا» ەسە قايتارۋدى كوزدەيدى.
سودان كەيىن قازاقستاندىق حوككەيشىلەر «بارىس ارەناعا» ورالىپ, «دينامو مينسك», «تورپەدو» جانە «ۆيتياز» ۇجىمدارىمەن سىنعا تۇسەدى.