سۋمەن قامتاماسىز ەتۋ دەڭگەيىن ارتىرۋ ءۇشىن كورسەتكىشتەرى تومەن وڭىرلەرگە باسىم نەگىزدە قاراجات بولىنەدى. بۇل تۋرالى قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ايتتى, دەپ حابارلايدى Egemen.kz.
«بۇگىندە وڭىرلەردە تازا اۋىزسۋعا قول جەتكىزۋ ءارتۇرلى دەڭگەيدە. اۋىز سۋمەن قامتۋدىڭ جوعارى كورسەتكىشتەرى ءۇش وبلىستا: اتىراۋ (98,5%), الماتى (98,3) جانە قىزىلوردا (97,6%) وبلىستارىندا», دەدى بەيبىت اتامقۇلوۆ.
سونداي-اق, ول ەلىمىزدىڭ كەيبىر وڭىرلەرىندە ارتتا قالۋدىڭ بار ەكەنىن قوستى.
«اۋىل تۇرعىندارىن اۋىز سۋمەن قامتۋدىڭ ەڭ تومەنگى دەڭگەيى ءتورت وبلىستا بايقالادى: قوستاناي (64,7%), شىعىس قازاقستان (81,4%), سولتۇستىك قازاقستان (82,1%) جانە جامبىل (82,2%) وبلىستارىندا», دەپ ءتۇسىندىردى بەيبىت اتامقۇلوۆ.