ەل تاۋەلسىزدىگىنىڭ 30 جىلدىعىنا وراي 18 جەلتوقساندا ەلورداداعى Jekpe-Jek سپورت كەشەنىندە قازاقستاندىق بوكسشىلاردىڭ قاتىسۋمەن ۇلكەن كاسىپقوي بوكس كەشى ۇيىمداستىرىلادى. كەشتىڭ باستى جەكپە-جەگىندە دانيار ەلەۋسىنوۆ جارتىلاي ورتا سالماقتاعى IBO بەلدىگى ءۇشىن جۇدىرىقتاسادى.
ازىرشە وتانداسىمىزدىڭ قارسىلاسى بەلگىسىز. دەگەنمەن قازاقستاندىق باق وكىلدەرىنىڭ جازۋىنشا, ەلەۋسىنوۆكە مىنا ءۇش بوكسشىنىڭ ءبىرى قارسىلاس اتانۋى مۇمكىن. ولار – 32 جاستاعى امەريكالىق موريس حۋكەر (27-2-3, 18 كو), 37 جاستاعى حوسەسيتو لوپەس (38-8, 21 كو) جانە 34 جاستاعى سەباستيان فورمەللا (23-2, 11 كو). ءۇش بوكسشىنىڭ ۇشەۋى دە بۇرىن ءوز سالماقتارىنىڭ چەمپيونى بولعان. حۋكەر مەن لوپەس جارتىلاي ورتا سالماقتا WBO جانە WBA (Super) بەلدىگىن يەلەنگەن بولسا, فورمەللا ورتا سالماق دارەجەسىندە IBO تۇجىرىمى بويىنشا چەمپيون اتانعان.
اتالعان بوكس كەشىندە دانيار ەلەۋسىنوۆتەن بولەك, اۋىر سالماقتاعى يۆان دىچكو (10-0, 10 كو), سۋپەر ورتا سالماقتاعى داۋرەن ەلەۋسىنوۆ (9-1-1, 8 كو), ءبىرىنشى جارتىلاي ورتا سالماق دارەجەسىندەگى جانقوش تۇراروۆ (24-0, 17 كو) ونەر كورسەتەدى. سونىمەن قاتار جەڭىل سالماقتاعى قازاقستاندىق ەرجان زاليلوۆ پەن ەسكەندىر حارسان وسى بوكس كەشىندە 20 جىلدان كەيىن ءبىرىنشى رەت قازاقستان چەمپيونى بەلبەۋىن ساراپقا سالادى.