كەشە باس پروكۋراتۋرادا جەڭىستىڭ 65 جىلدىعىنا جانە وتان قورعاۋشىلار كۇنىنە ارنالعان سالتاناتتى جينالىس بولىپ ءوتتى. وعان باس پروكۋرور قايرات ءماميدىڭ شاقىرۋىمەن استاناعا وسى سالتاناتتى شارالارعا قاتىسۋ ءۇشىن كەلگەن ەلىمىزدىڭ پروكۋراتۋرا ورگاندارىنىڭ ارداگەرلەرى قاتىستى.
الدىمەن استانانى ارالاپ تاماشالاعان ارداگەرلەر قالانىڭ بۇگىنگى كوركىنە ايرىقشا ريزا بولىپ, ونى ەل تابىستارىنىڭ جەمىسى رەتىندە باعالادى. باس پروكۋراتۋرانىڭ جاڭا عيماراتىندا جاۋىنگەرلىك جانە ەڭبەك داڭقى مۇراجايى اشىلدى. مۇراجايدا قازاقستانداعى قاداعالاۋ جانە تەرگەۋ ورگاندارىنىڭ قالىپتاسۋ ۋاقىتىنداعى بىرەگەي ءارى باعا جەتپەس جادىگەرلەرى سونداي-اق, ۇلى وتان سوعىسىنىڭ, مەملەكەتتىڭ جانە ونىڭ قاداعالاۋ ورگاندارىنىڭ ودان كەيىنگى دامۋ كەزەڭدەرىندەگى ەرلىك تاريحىنان ماتەريالدار, قۇجاتتار مەن ناگرادالار قويىلعان.
سالتاناتتى جينالىستا ءسوز ءسويلەگەن باس پروكۋرور قازاقستان تاريحىنداعى بۇل كۇننىڭ ماڭىزدىلىعىن جانە ءبىزدىڭ سولداتتاردىڭ شايقاستارداعى باعا جەتپەس ەرلىگىن اتاپ كورسەتتى. – سىزدەر سەكىلدى ارداگەردىڭ بىرىنەن تۋعان ۇل رەتىندە ايتارىم, توگىلگەن قان مەن تەر ارقىلى كەلگەن, حالقىمىز ءۇشىن تىم قىمباتقا تۇسكەن وسى ۇلى جەڭىستىڭ ءمانى مەن ماڭىزىن تەرەڭ ءتۇسىنىپ, قاشاندا قاستەرلەي ءبىلۋ, ارتىنداعى ەلى مەن جەرى ءۇشىن ەتىگىمەن سۋ كەشىپ, وتان ءۇشىن وتقا تۇسكەن قاھارمانداردىڭ بيىك تۇلعالارىن ارداق تۇتىپ, ەسىمدەرىن ەستەن شىعارماۋ – بۇگىنگى ۇرپاقتىڭ پارىزى مەن قارىزى, – دەدى قايرات ءابدىرازاق ۇلى.
باس پروكۋراتۋرانىڭ باسشىلىعى بارلىق سوعىس ارداگەرلەرىن جانە ولارعا تەڭەستىرىلگەندەردى, تىل ەڭبەككەرلەرىن ماراپاتتاپ, ولارعا باعالى سىيلىقتار تابىس ەتتى. ال ۇلى وتان سوعىسىنىڭ ەكى قاتىسۋشىسى – بۇرىنعى پروكۋراتۋرا قىزمەتكەرلەرى ي.گاپيچ پەن س.دۇيسەنوۆ ماسكەۋ قالاسىنا بارىپ, جەڭىس كۇنى بولاتىن سالتاناتتى شەرۋگە قاتىساتىن بولدى, دەپ حابارلادى باس پروكۋراتۋرانىڭ ءباسپاسوز قىزمەتى.