قازاقستاننىڭ سەربياداعى ەلشىسى ءمادي اتامقۇلوۆ سەربيا رەسپۋبليكاسىنىڭ سىرتقى ىستەر ءمينيسترى نيكولا سەلاكوۆيچپەن كەزدەستى, دەپ حابارلايدى Egemen.kz.
تاراپتار ەكىجاقتى ىنتىماقتاستىقتىڭ كۇن ءتارتىبىن تالقىلاپ, قازاقستان مەن سەربيا اراسىنداعى ديپلوماتيالىق قاتىناستاردىڭ ورناعانىنا 25 جىل تولۋىنا وراي ءوزارا بايلانىستاردى جانداندىرۋعا وزارا نيەت ءبىلدىردى.
قازاقستان ەلشىسى سەربيا تاراپىنا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ «جاسىل كوپىر» باستاماسىن قولداۋعا جانە ءتيىستى سەرىكتەستىك باعدارلاماسىنىڭ حارتياسىنا قوسىلۋعا دايىندىعى ءۇشىن ريزاشىلىعىن ءبىلدىردى.
مينيستر ن.سەلاكوۆيچ ءوز كەزەگىندە ەلشى م.اتامقۇلوۆتى قازاقستان تاۋەلسىزدىگىنىڭ 30 جىلدىعىمەن قۇتتىقتاپ, سەربياعا كوسوۆو جانە مەتوحيا ماسەلەلەرى بويىنشا تۇراقتى قولداۋ كورسەتكەنى ءۇشىن العىس ايتتى.
كەزدەسۋ بارىسىندا ەكىجاقتى ساۋدا-ەكونوميكالىق جانە ينۆەستيتسيالىق ىنتىماقتاستىقتى جانداندىرۋ, ۇاك كەزەكتى وتىرىسىن وتكىزۋ, نورماتيۆتىك-قۇقىقتىق بازانى كەڭەيتۋ جانە وڭىرارالىق بايلانىستاردى دامىتۋ ماسەلەلەرىنە ەرەكشە نازار اۋدارىلدى.