GPON تەحنولوگياسىنىڭ يگىلىگى كوپ

ۇلتتىق بايلانىس وپەراتورىنىڭ مالىمەتىنە سۇيەنسەك, 10 ايدىڭ ىشىندە كۇنگەي ايماقتا 100-دەن اس­تام كوپقاباتتى تۇرعىن ءۇي وسىنداي تاسىلمەن تاپسىرىلىپ, 10 مىڭ­نان اسا ازامات عالامتور جەلىسىنە ەش كەدەرگىسىز كىرۋگە مۇمكىندىك الدى.

بيىلعى 10 ايدا ءىرى بايلانىس وپەراتورى ەلىمىزدەگى 500-گە تارتا كوپقاباتتى تۇرعىن ۇيگە ينتەرنەت تارتىپ, پاتەر يەلەرىنىڭ قونىس تو­يىنا جاعىمدى سىيلىق جاسالدى.

«ەلىمىزدىڭ ءىرى قالالارىندا ابو­نەنتتەردى تىكەلەي ماگيسترالدى جۇيەگە قوسۋ ارقىلى ينتەرنەتپەن قامتۋ ماسەلەسى بىرنەشە جىلدان بەرى شەشىلىپ كەلەدى. ەندى بۇل تەحنولوگيا جاڭادان سالىنىپ جاتقان تۇرعىن ءۇي كەشەندەرىنە دە كەڭىنەن قولدانىلۋدا. بۇل جەردەگى كۇردەلى ماسەلە – ماگيسترالدى جە­لىنى كوپقاباتتى ۇيلەرگە دەيىن جەتكىزۋ, ياعني ينتەرنەت قوسىلعان نۇكتەدەن جەلىنى تۇرعىن ۇيگە دە­يىن اكەلۋ وڭاي بولماي تۇر. ال ابونەنتتەردى قوسۋ نەبارى 20-30 مينۋتتا جۇزەگە اسىرىلادى. ەگەر دە الداعى بولاشاقتى باعامداساق, ابونەنتتەردىڭ ينتەرنەتتىڭ ساپاسىنا بايلانىستى تالاپتارى تەك كۇشەيە بەرمەك. بۇل رەتتە GPON تەحنولوگياسى وسى تالاپتارعا تولىق جاۋاپ بەرەدى دەپ ايتا الامىز», دەدى «قازاقتەلەكوم» اق بولشەك بيزنەس ديۆيزيونىنىڭ باس ديرەكتورى يگور پوگرەبيتسكي.

Gigabit PON تەحنولوگياسى قازىر ۇلتتىق كومپانيانىڭ تالشىقتى-وپتيكالىق ماگيسترالگە قوسىلۋدىڭ ەڭ ءتيىمدى ءارى جوعارى سۇرانىسقا يە جولى. ونىڭ ارتىقشىلىعى سول, تۇتىنۋشى مەن ماگيسترالدى جەلىنى ءوزارا بايلانىستىراتىن ءار پاتەرگە ارنايى ارنا قۇرۋدى كوزدەيدى. سوندىقتان بۇل تەحنولوگياعا قو­سىلعان ابونەنتتەر ينتەرنەت جىل­دام­دىعىنا الاڭداماسا دا بولادى دەيدى ماماندار. تاعى ءبىر ارتىقشىلىعى – جالعىز عانا جەلى ارقىلى جىلدامدىعى 500 مبيت/س قۇرايتىن ينتەرنەتپەن قوسا تەلەۆيزيا جانە تەلەفونيا قىزمەتىن قوستىرۋعا بولادى. ال تسيفرلى تەلەفونيا ابونەنت كوشىپ كەتكەن جاعدايدا دا ءنومىردى ساقتاپ قالۋعا مۇمكىندىك بەرەدى.

تەحنولوگيانىڭ بۇل ارتىق­شى­لىق­تارىن تۇرعىنداردان بۇرىن, كوپقاباتتى تۇرعىن ءۇي كەشەندەرىنىڭ قۇرىلىسىن ورىنداعان كومپانيا­لار باعالاپ ۇلگەرگەن. ايتالىق, ەلىمىزدىڭ سولتۇستىگىندە جىل باسىنان بەرى 14 تۇرعىن ءۇي كەشەنى ينتەرنەتكە قوسىلعان سوڭ تاپسىرىلىپتى.

جاڭا سالىنعان ۇيلەردى بىردەن جىلدام ينتەرنەتپەن بىرگە تاپسىرۋ باعىتىنداعى ىلكىمدى ىستەر وڭتۇستىك وڭىردە جولعا قويىلعان. مۇندا 10 ايدىڭ ىشىندە 100-دەن استام كوپقاباتتى تۇرعىن ءۇي كەشەنى ينتەرنەتكە قوسىلىپ, مىڭداعان جاڭا ابونەنتكە تسيفرلى مۇمكىندىكتەردى كەڭىنەن پايدالانۋعا جاعداي جاسالدى.

الماتى قالاسى مەن الماتى وبلىسى دا بۇل ءتىزىمنىڭ العاشقى ۇشتىگىندە. اتاپ ايتقاندا, ۇلتتىق كومپانيا جەتىسۋ وڭىرىندە جىل باسىنان بەرى 90-عا جۋىق تۇرعىن ءۇيدى GPON تەحنولوگياسىمەن جىلدام ينتەرنەتپەن قامتىدى.