نۇر-سۇلتان قالاسىندا مادەنيەت جانە سپورت مينيسترلىگىنىڭ ۇيىمداستىرۋىمەن تاۋەلسىزدىكتىڭ 30 جىلدىعى اياسىندا ەرەكشە ءبىلىم بەرۋدى قاجەت ەتەتىن بالالارعا ارنالعان Newارت فەستيۆالى ءوتتى.
جوبانىڭ ماقساتى – ەرەكشە ءبىلىم بەرۋدى قاجەت ەتەتىن بالالارعا ينكليۋزيۆتى شىعارماشىلىق كەڭىستىك قۇرۋ جانە ولاردىڭ شىعارماشىلىق الەۋەتىن اشۋ. سونداي-اق تالانتتارىن دامىتۋعا ءارى ينكليۋزيۆتى قوعامدا تاۋەلسىز ومىرگە دايىنداۋعا ىقپال ەتۋ.
اتالعان فەۆتيۆال 3 كۇنگە سوزىلدى. الدىمەن ەلوردانىڭ ەڭ كورنەكتى عيماراتتارىنىڭ ءبىرى بايتەرەك مونۋمەنتىندە ەرەكشە ءبىلىم بەرۋدى قاجەت ەتەتىن 40-قا جۋىق بالاعا ارنالعان سۋرەت جانە قولونەر كورمەسى اشىلدى. ودان كەيىن ءىس-شارا وقۋشىلار سارايىندا ء«وزىڭدى جىرلايمىز, تۋعان ەل» اتتى مۋزىكالىق-پوەتيكالىق مارافونمەن جالعاستى. سونىمەن قاتار فەستيۆال شەڭبەرىندە Tumar ساندىك-قولدانبالى ونەر ورتالىعىندا بالالاردى ساندىك-قولدانبالى جانە قولونەرگە وقىتۋ شەبەرلىك ساعاتتارى ءوتتى.
فەستيۆالعا اقمولا وبلىسى, تۇركىستان وبلىسى جانە نۇر-سۇلتان قالاسىنان 70-تەن استام بالدىرعان قاتىستى. وعان قوسا مادەنيەت جانە سپورت مينيسترلىگىنىڭ وكىلدەرى, قوعام قايراتكەرلەرى, سۋرەتشى-ديزاينەرلەر مەن ونەرتانۋشى, قولونەرشىلەر بالالاردى قولداۋعا كەلدى.
فەستيۆالدىڭ جابىلۋ سالتاناتى Red Bus تۋريستىك اۆتوبۋسىمەن نۇر-سۇلتان قالاسىنا ەكسكۋرسيا جۇرگىزۋمەن جانە بايتەرەك مونۋمەنتىندە ەستەلىك سۋرەتتەرگە تۇسۋمەن اياقتالدى.