الماتىنىڭ «قايراتى» وسىدان بىرەر اپتا بۇرىن فۋتبولدان ۋەفا كونفەرەنتسيا ليگاسىنىڭ توپتىق كەزەڭدەگى كەزەكتى تۋر ويىنىن تۇزدە ازەربايجاننىڭ «قاراباح» ۇجىمىمەن وتكىزىپ, الماتىعا ابىرويسىز ورالعان بولاتىن. دەگەنمەن وڭتۇستىك استانالىق كلۋب باكۋدە كەتكەن ەسەنى ورتالىق ستاديونداعى ويىندا قايتارامىز دەپ وزدەرىن دە, جانكۇيەرلەرىن دە سەندىرىپ ەدى. بىراق «قايراتتان» قايرات كەتە باستاعان با, ايتەۋىر ەلىمىزدىڭ چەمپيونى بىلتىرعى «قاراباحتان» تاعى دا جەڭىلىپ, جانكۇيەرلەرىن جەرگە قاراتتى.
ارينە, «قاراباح» ءالسىز, «قايرات» مىقتى دەۋدەن اۋلاقپىز. دەسە دە كەشەگى ويىندا ازەربايجاندىق كلۋبقا قاراعاندا «قايراتتا» جەڭىسكە دەگەن موتيۆاتسيا جوعارى بولۋى ءتيىس ەدى. سىرت الاڭداعى جەڭىلىستىڭ ەسەسىن قايتارۋدى ايتپاعاننىڭ وزىندە, «قايرات» فۋتبولشىلارى كەزدەسۋدى ءوز الاڭىندا, ءوز جانكۇيەرلەرىنىڭ قولداۋىمەن وتكىزدى. سونىمەن قاتار جەڭىسكە جەتىپ, ءۇش ۇپايدى ولجالايتىن بولسا, تۇڭعىش رەت ەۋروكۋبوك ويىندارىنىڭ توپتىق كەزەڭىنە قاتىسىپ جاتقان الماتىلىق كلۋب پلەي-وفف كەزەڭىنە شىعۋ مۇمكىندىگىن دە ساقتاپ قالاتىن ەدى. وكىنىشكە قاراي, جەڭىس بىلاي تۇرسىن, جەرلەستەرىمىز تەڭ ويىنعا دا قول جەتكىزە المادى.
قۇربان بەردىەۆ شاكىرتتەرىنىڭ كۇشى تەك العاشقى 45 مينۋتقا عانا جەتتى. تورەشىنىڭ ىسقىرىعى ەستىلە سالا, «قايرات» فۋتبولشىلارى العا قاراي ۇمتىلىپ, «قاراباح» قاقپاشىسىنىڭ ابدەن مازاسىن قاشىردى. ءسات سايىن حوسە كانتە, نەبويشا كوسوۆيچ, ۆاگنەر لاۆ قاۋىپتى شابۋىل ۇيىمداستىرىپ, گول سوعۋعا تىرىستى. بىراق ولاردىڭ تەپكەن دوبى كەيدە قاقپا باعانىنا ءتيىپ, كەيبىر ساتتەردە قاقپاشى كەرەمەت سەيۆىمەن كوزگە ءتۇستى. وسىلايشا ويىننىڭ ءبىرىنشى تايمى «قايراتتىڭ» باسىمدىعىمەن ءوتتى.
ۇزىلىستەن كەيىن «قاراباحتىڭ» ويىنى تۇرلەنىپ شىعا كەلدى. ءبىرىنشى تايمداعى «قاراباحقا» ۇقسامايدى. قورعانىستا ساق ويناپ, ءساتى كەلگەندە قارىمتا شابۋىلدان گول سوعۋعا تىرىستى. ۋاقىت وتكەن سايىن قوناقتار ويىن تىزگىنىن ءوز قولدارىنا الا باستادى. ناتيجەسىندە, كەزدەسۋدىڭ 58-مينۋتىندا يبرايما ۆاجدي «قايراتتىڭ» قورعانىستاعى قاتەلىگىنەن كەيىن ستاس پوكاتيلوۆپەن جەكە-دارا شىعىپ, ماتچتىڭ ەسەبىن اشتى.
ارادا 10 مينۋت وتكەندە «قايراتتىڭ» وسى ماۋسىمداعى ەڭ ۇزدىك شابۋىلشىلارىنىڭ ءبىرى حوسە كانتە تارازى باسىن تەڭەستىرىپ, ورتالىق ستاديونعا جينالعان جانكۇيەرلەرىن شاتتىققا بولەدى. گولدان كەيىن «قايرات» تاعى دا باسىمدىعىن ارتتىرىپ, قارسىلاستارىنان جەڭىستى ج ۇلىپ الاتىنىنا سەنىمدى بولعانبىز. الايدا 72-مينۋتتا ابدەللا زۋبير تاعى دا ءبىر-بىرىنە سەنىپ قالعان ەكى قورعاۋشىمىزدى قاپى قالدىرىپ, دوپتى قاقپادان الىستاپ كەتكەن پوكاتيلوۆتىڭ ۇستىنەن اسىرا سالدى. گول! «قاراباحتىڭ» ەكىنشى گولى «قايرات» جانكۇيەرلەرىنىڭ قۋانىشىن سۋ سەپكەندەي باستى. ماتچتىڭ سوڭىنا دەيىن الماتىلىقتار تارازى باسىن تەڭەستىرۋگە قانشا تىرىسقانىمەن, قوناقتار ءبىزدىڭ جىگىتتەرگە مۇمكىندىك بەرمەدى. قورىتىندى ەسەپ – 1:2. ءسويتىپ «قايرات» جاۋاپتى كەزدەسۋدە دە «قاراباحتان» جەڭىلىپ قالدى.
وسىلايشا, توپتىق كەزەڭنىڭ ءۇش ويىنىندا جەڭىلىپ, بىرەۋىندە تەڭ تۇسكەن قۇربان بەردىەۆ شاكىرتتەرى توپتان شىعۋ مۇمكىندىگىنەن ايىرىلدى. ال ءۇش ماتچتا جەڭىسكە جەتىپ, ءبىر مارتە تەڭ ويناعان ازەربايجاندىق كلۋب 10 ۇپايمەن ءوز تاريحىندا العاش رەت ەۋروكۋبوك ويىندارىنىڭ پلەي-وفف كەزەڭىنە جولداما الدى.
ماتچتان كەيىن «قايرات» كلۋبىنىڭ باس باپكەرى قۇربان بەردىەۆ ماتچ تۋرالى پىكىرىن ورتاعا سالدى. «وتە قيىن ويىن بولدى. نىساناعا باعىتتالعان ءدال ەكى سوققى – ەكەۋى دە گول بولدى. ويىنىمىزدىڭ ساپاسىنا كوڭىلىمىز تولادى, بىراق ناتيجە كوڭىلدەن شىقپادى. ءبىز ەكى قارسى شابۋىلدى جۇزەگە اسىرا المادىق. مەن جىگىتتەرگە بۇل ءبىز بىرگە جۇمىس ىستەگەن ەڭ جاقسى ويىن ەكەنىن ايتتىم», دەدى ق.بەردىەۆ.
ايتا كەتەيىك, «قايرات» كونفەرەنتسيا ليگاسىنداعى كەلەسى ويىنىن 25 قاراشادا ءوز الاڭىندا شۆەيتساريانىڭ «بازەلىمەن» وتكىزسە, ەكىنشى ماتچتا «كاراباح» باكۋدە كيپردىڭ «ومونياسىن» قابىلدايدى. ال 10 جەلتوقسانعا جوسپارلانعان توپتىق كەزەڭدەگى سوڭعى ماتچتا جەرلەستەرىمىز كيپرگە قوناققا بارادى.