پارتيانىڭ يدەولوگيا ماسەلەلەرى جونىندەگى حاتشىسى بولىپ قۇمار اقساقالوۆ تاعايىندالدى
قۇمار اقساقالوۆ ءماسكەۋ اۋىل شارۋاشىلىعى ءوندىرىسىنىڭ ينجەنەرلەرى ينستيتۋتىن تامامداعان, ەكونوميكا عىلىمدارىنىڭ كانديداتى. ءار جىلدارى قوستاناي وبلىسى اۋداندارىندا اكىم, قازاقستان پرەزيدەنتى اكىمشىلىگىنىڭ مەملەكەتتىك ينسپەكتورى, جامبىل وبلىسى اكىمىنىڭ الەۋمەتتىك ماسەلەلەر جانە يدەولوگيا ءجونىندەگى ورىنباسارى قىزمەتتەرىن اتقارعان.
2010 جىلدان بەرى – «نۇر وتان» پارتياسى ورتالىق اپپاراتىنىڭ باسشىسى, ساياسي كەڭەستىڭ مۇشەسى.
يدەولوگيا جونىندەگى جاڭا حاتشىنى تانىستىرا كەلە, «نۇر وتان» پارتياسى ءتوراعاسىنىڭ ءبىرىنشى ورىنباسارى ب.بايبەك پارتيا توراعاسىنىڭ تاپسىرماسى بويىنشا «نۇر وتاننىڭ» ايماقتارداعى قىزمەتى ارتىپ, پارتيا جۇمىسى «جوبالىق ۆەرتيكال» بويىنشا جاساقتالىپ جاتقانىن اتاپ ءوتتى.
«قۇمار اقساقالوۆتىڭ اۋداندىق دەڭگەيدەن پرەزيدەنت اكىمشىلىگىنە دەيىنگى ءتۇرلى مەملەكەتتىك جۇمىس تاجىريبەسى ونىڭ قويىلعان مىندەتتەر بيىگىنەن كورىنۋىنە مۇمكىندىك بەرەتىنىنە سەنەمىن. بۇل تاعايىنداۋدى اتقارىلعان جۇمىسقا بەرىلگەن جوعارى باعا دەپ سانايمىن», دەدى ب.بايبەك.
پارتيانىڭ ورتالىق اپپاراتىنىڭ باسشىسى بولىپ اسەل ءجۇنىسوۆا تاعايىندالدى
اسەل ءجۇنىسوۆا ءال-فارابي اتىنداعى قازۇۋ, جاپونيانىڭ جوعارى مەملەكەتتىك باسقارۋ مەكتەبىن تامامداعان, ەكونوميكا عىلىمدارى جانە مەملەكەتتىك باسقارۋ ماگيسترى.
ءار جىلدارى مۇناي-گاز سالاسىندا, ستراتەگيالىق جوسپارلاۋ اگەنتتىگىندە, ەكونوميكا جانە بيۋدجەتتىك جوسپارلاۋ مينيسترلىگىندە, «قازترانسگاز» اق-تا, «سامعاۋ» ۇلتتىق عىلىمي-تەحنولوگيالىق حولدينگىندە جانە «وڭتۇستىك» اكك-دە جۇمىس ىستەگەن. 5 جىلعا جۋىق قازاقستان پرەزيدەنتى اكىمشىلىگىندە سەكتور مەڭگەرۋشىسى, كەيىن ستراتەگيالىق زەرتتەۋلەر جانە تالداۋ ورتالىعى مەڭگەرۋشىسىنىڭ ورىنباسارى بولىپ قىزمەتتەر اتقاردى.
2013 جىلعى ناۋرىزدا «نۇر وتاننىڭ» ورتالىق اپپاراتى باسشىسىنىڭ ورىنباسارى بولىپ تاعايىندالعان, پارتيا ساياسي كەڭەسىنىڭ مۇشەسى.
ورتالىق اپپاراتتىڭ جاڭا باسشىسىن تانىستىرعان ب.بايبەك پارتيا مۇشەلەرىنىڭ 60%-ى, ال «نۇر وتاننىڭ» ساياسي كەڭەسىنىڭ وكىلەتتى ورگانىندا 30%-ى ايەلدەر ەكەنىن اتاپ ءوتتى.
«اسەل ءجۇنىسوۆا «نۇر وتانداعى» باسشىلىق لاۋازىمعا تاعايىندالعان تۇڭعىش ايەل بولىپ وتىر. بۇل پارتيا توراعاسى تاراپىنان ءۇلكەن سەنىمدى بىلدىرەدى. بۇل تاعايىنداۋدى بيلىك پارتياسىنىڭ, سونىمەن قاتار, قوعام مەن مەملەكەت جۇمىسىندا ايەلدەردىڭ ماڭىزدى رولىنە دەگەن قۇرمەت دەپ قابىلدايمىز», دەپ اتاپ ءوتتى ب. بايبەك.