اقش كولىك قاۋىپسىزدىگى اكىمشىلىگىنىڭ (TSA) ساراپشىلارى ءبىزدىڭ ەلدەگى اۆياتسيالىق قاۋىپسىزدىككە وسىنداي باعا بەرىپ وتىر. جۇرگىزىلگەن شولۋ ناتيجەلەرى بويىنشا TSA ساراپشىلارى ەلدەگى اۆياتسيالىق قاۋىپسىزدىكتى قامتاماسىز ەتۋ دەڭگەيى جوعارى ەكەنىن اتاپ وتكەن جانە ازاماتتىق اۆياتسيانى زاڭسىز ارالاسۋ اكتىلەرىنەن قورعاۋ بويىنشا جۇرگىزىلىپ جاتقان شارالارعا وڭ باعا بەردى.
قازاقستاننىڭ اۆياتسيالىق بيلىك ورىندارىنىڭ شاقىرۋى بويىنشا قازاقستاندىق اۋەجايلاردى رەيستەرگە قىزمەت كورسەتۋ قابىلەتىن سەرتيفيكاتتاۋ جانە امەريكا قۇراما شتاتتارىنا تىكەلەي اۋە مارشرۋتىن اشۋ ءۇشىن CAT1 تاعايىنداۋ جۇمىستارى باستالدى. TSA ساراپشىلارى اۆياتسيالىق قاۋىپسىزدىكتى قامتاماسىز ەتۋ جاعدايىن باعالاۋ ماقساتىندا ازاماتتىق اۆياتسيا كوميتەتىندە, قازاقستاننىڭ اۆياتسيالىق اكىمشىلىگىندە, نۇر-سۇلتان جانە الماتى قالالارىنىڭ اۋەجايلارىندا بولدى.
TSA كومانداسى اۆياتسيالىق قاۋىپسىزدىك سالاسىنداعى قولدانىستاعى نورماتيۆتىك-قۇقىقتىق اكتىلەر مەن ساپانى باقىلاۋ ءىس-شارالارى حالىقارالىق ازاماتتىق اۆياتسيا ۇيىمىنىڭ (ICAO) ستاندارتتارى مەن ۇسىنىلاتىن پراكتيكاسىنا سايكەس كەلەتىنىن اتاپ ءوتتى. نۇر-سۇلتان جانە الماتى قالالارىنىڭ اۋەجايلارىندا جۇرگىزىلەتىن شارالار مەن راسىمدەر حالىقارالىق تالاپتارعا ساي كەلەدى. ال كەيبىر اسپەكتىلەر بويىنشا شارالار بەلگىلەنگەن ستاندارتتاردان دا جوعارى. مىسالى, اۋەجايدىڭ پەريمەترىن كۇزەتۋ جانە قورعاۋ, قولجەتىمدىلىگى كۇزەتىلەتىن ايماقتاردا كىرۋدى باقىلاۋدى قامتاماسىز ەتۋ, قاۋىپسىزدىكتى قامتاماسىز ەتەتىن پەرسونالدى ىرىكتەۋ جانە بىلىكتىلىگىن ارتتىرۋ, بورتتا تاماقتانۋ, جۇكتى جانە پوشتانى تەكسەرۋ جونىندەگى شارالاردى اتاپ وتۋگە بولادى.
ساراپشىلار كيبەرقاۋىپسىزدىك, ازاماتتىق اۆياتسيانى ۇشقىشسىز ۇشۋ اپپاراتتارىن پايدالانۋ ارقىلى زاڭسىز ارالاسۋ اكتىلەرىنەن قورعاۋ جانە جولاۋشىلاردى تەكسەرۋ كەزىندە قولدانىلاتىن اۋەجايلارداعى تەكسەرۋ جابدىقتارىن جاڭعىرتۋ سالاسىنداعى شارالاردى جەتىلدىرۋ مۇمكىندىكتەرىن اتاپ ءوتتى. جولاۋشىلاردى ءۇش ولشەمدى سكانەرلەۋ جابدىعىنا (بودي-سكانەرلەر) بىرتىندەپ كوشۋ جانە تەكسەرۋ پۋنكت- تەرىندە جارىلعىش زاتتاردىڭ زاماناۋي دەتەكتورلارىن پايدالانۋدى دا جەتىلدىرۋ كەرەك.
اۆياتسيالىق پەرسونالدى جانە ولاردىڭ زاتتارىن تەكسەرۋ راسىمدەرىن, رەيستەردىڭ ۇلعايۋىنا بايلانىستى تەكسەرۋ پۋنكتتەرى مەن بەكەتتەرىنىڭ سانىنا بايلانىستى اۆياتسيالىق قاۋىپسىزدىك قىزمەتىندەگى كادرلاردى جاساقتاۋ جونىندەگى شارالاردى جاقسارتۋ بويىنشا ۇسىنىمدار بەرىلدى. سونىمەن قاتار قازاقستان اۋەجايلارىنىڭ ىشىندە ەڭ ۇزدىك بولىپ سانالاتىن الماتى اۋەجايىندا كينولوگيا بويىنشا جۇرگىزىلىپ جاتقان اۋقىمدى جۇمىستار اتاپ ءوتىلدى.
«ساراپشىلار ازاماتتىق اۆياتسيا كوميتەتىنىڭ, اۆياتسيالىق رەتتەۋشى مەن اۋەجايلاردىڭ ۇيلەسىمدى جۇمىسىن باعالادى, اۋديتورلار الدىنداعى اشىقتىقتى اتاپ ءوتتى. TSA كومانداسى ءبىزدىڭ ماماندارمەن اۆياتسيالىق قاۋىپسىزدىكتى قامتاماسىز ەتۋ بويىنشا وزىق تاجىريبەمەن الماسۋ بويىنشا كەڭەستەر وتكىزىپ, تۋىنداعان ماسەلەلەرگە تۇسىنىكتەمە بەردى. قازاقستاننىڭ اۆياتسيالىق اكىمشىلىگى مەن اقش-تىڭ كولىك قاۋىپسىزدىگى اكىمشىلىگى اراسىنداعى ىنتىماقتاستىقتى اقش-قا تىكەلەي رەيستەر اشۋ شەڭبەرىندە جالعاستىرۋ جانە كەڭەيتۋ تۋرالى شەشىم قابىلداندى», دەپ حابارلادى يندۋستريا جانە ينفراقۇرىلىمدىق دامۋ مينيسترلىگى.