پارلامەنت ءماجىلىسى «قازاقستان رەسپۋبليكاسى ۇكىمەتى مەن بىرىككەن اراب امىرلىكتەرى ۇكىمەتىنىڭ باسىم سالالارداعى جوبالاردى دامىتۋ ءۇشىن ۇزاق مەرزىمدى ستراتەگيالىق ارىپتەستىك قۇرۋ تۋرالى بىرلەسكەن دەكلاراتسياسىن راتيفيكاتسيالاۋ تۋرالى» زاڭ جوباسىن قارايدى, دەپ حابارلايدى Egemen.kz.
«كوميتەت وسى زاڭ جوباسى بويىنشا قورىتىندى دايىنداۋعا دايىن», دەدى دەپۋتات البەرت راۋ ءماجىلىستىڭ جالپى وتىرىسىندا.
ول قۇجات ەنەرگەتيكا, كولىك-لوگيستيكا, اۋىل شارۋاشىلىعى سالالارىنا تىكەلەي شەتەلدىك ينۆەستيتسيالار تارتۋعا باعىتتالعانىن اتاپ ءوتتى.
بۇعان دەيىن ءماجىلىس دەپۋتاتى ازات پەرۋاشەۆ ەلىمىزدە جاڭارتىلاتىن جانە ءداستۇرلى ەنەرگەتيكانىڭ دامۋىنا بىرىككەن اراب امىرلىكتەرىمەن ۇكىمەتارالىق كەلىسىم سەرپىن بەرە الاتىنىن مالىمدەدى.
ءماجىلىس دەپۋتاتى جامبىل احمەتبەكوۆ تە بىرىككەن اراب امىرلىكتەرىمەن ينۆەستيتسيالىق ىنتىماقتاستىقتى دامىتۋ ءبىزدىڭ ەلىمىزگە ءتيىمدى ەكەندىگىنە سەنىم ءبىلدىردى. سەبەبى بۇل جاڭا كاسىپورىنداردىڭ پايدا بولۋىنا, وزىق تەحنولوگيالاردى ەنگىزۋگە جانە جاڭا جۇمىس ورىندارىن قۇرۋعا ىقپال ەتەدى.