باباتانىمعا سالساڭىز, بايىرعى قازاق وركەنيەتى عاسىرلار تىزبەگىندە ايشىقتى ءىز قالدىرىپ, اسقاق ارمانى جولىندا ارشىندى قادام باسىپ, اڭىزعا بەرگىسىز عۇمىرلىق ءپالساپا تۇزگەن. ەرتەگىدەي كورىنگەن ميفتىك وقيعالار جەلىسى اقيقاتتان الىس ەمەس. ونى تاريح تىزبەگى دالەلدەپ-اق كەلەدى. سەنبەسەڭىز, بەلگىلى سۋرەتشى اعىمسالى دۇزەلحانوۆتىڭ «قىزىر بابا – ءتورت ت ۇلىك» كارتيناسىنا قاراڭىزشى.
ەسكى ءاپسانا ەستى شىعارماعا ارقاۋ بولعانداي. تۋىندى ميفولوگيالىق جانرعا جاتادى. ءتىپتى, وقىرمان ەجەلگى فلورا مەن فاۋنانىڭ قۇدايلارىن ەسكە ءتۇسىرۋى مۇمكىن. كومپوزيتسيانىڭ ورتالىق بەينەسى – قىزىر بابا. نەگىزگى كۋلت وسى.
قازاقى تانىم شەڭبەرىندە قىدىر (قىزىر) اتا – حالىقتىڭ قورعاۋشىسى, قايىرىمدى اۋليە, كورىپكەل رەتىندە ەلەستەيدى. حالىق ۇلىستىڭ ۇلى كۇنى ءار ءۇيدىڭ بوساعاسىنان ەنىپ, اق باتاسىن بەرىپ, جاقسىلىق الىپ كەلەدى دەپ ويلاعان. سوندىقتان ونى جاڭارۋدىڭ, جاڭا كۇننىڭ سيمۆولى رەتىندە قادىر تۇتادى. سونداي-اق كوكتەمنىڭ كەلۋى تەك سونىڭ كەلبەتىمەن سيپاتتالادى.
سۋرەتشى سۋرەت ورتاسىندا قارت قىزىر بابانىڭ ءمۇسىنىن بەينەلەگەن. وڭ قولىندا اساتاياعى بار, ونىڭ ۇستىنە گۇلدەر قۇلپىرىپ, ەكىنشى قولىنان وزەن اعىپ تۇر. اڭىزداردىڭ بىرىندە قىدىر اتا جەراستى الەمىنە بارعانى ايتىلادى. وندا ءتىرى سۋ كوزىن تاۋىپ, سول سۋدان ءىشىپ, ولمەسكە اينالعانى تۋرالى باياندالعان.
كەلەسى ءبىر اپساناعا سۇيەنسەك, قىدىر اتا ءشول دالادا تاماعى قۇرعاپ, ىستىقتان ءولىپ بارا جاتقان ساياحاتشىلاردى قۇتقارىپ قالعان ەكەن. شىعارمادا كەنەپ بويىمەن سۋ اعىندارى تاسىپ جاتقانىن بايقايمىز. ونىڭ شەشەك اتقان اعاشتاردى, شىرىندى ءشوپتىڭ اراسىندا جايىلىپ جاتقان جانۋارلاردى سۋعارۋعا كەلگەنىن كورەمىز. ءارتۇرلى وبرازدا تىرشىلىكتىڭ تامىرشىسى رەتىندە قىدىر اتا كارتينانىڭ مازمۇنىن جانداندىرىپ تۇر.
فونعا كوز سالساق, بايتاق بابانىڭ ءتورت ت ۇلىكتىڭ قامقورشىسى ەكەنىن انىق كورۋگە بولادى. زەڭگى بابا – سيىردىڭ قامقورشىسى, شوپان اتا – قويدىڭ قامقورشىسى, ويسىلقارا – تۇيە قامقورشىسى جانە قامبار اتا – جىلقىلاردىڭ قامقورشىسى. ارقايسىسىنىڭ قاسىندا ءوزىنىڭ سۇيىكتى جانۋارلارى بەينەلەنگەن. سۋرەتشى جيىنتىق بەينە ارقىلى قازاقتىڭ ەسكى اڭىزىنا جان بىتىرەدى.
كومپوزيتسيا كەيىپكەرلەرى سيممەتريالىق تۇردە تەڭدەستىرىلگەن جانە كولەڭكە مەن جارىقتىڭ قاراما-قايشىلىعى بايقالادى. كارتيناداعى نىسانداردىڭ ولشەمى ميفولوگيالىق جانرداعى كەسكىندەمەلەرگە ساي جازىلعان.