جەتىسۋدا جۇگەرى وسىرۋگە نەگىزىنەن پانفيلوۆ اۋدانىندا باسىمدىق بەرىلگەنىنەن جۇرت قۇلاعدار. ال بيىل بۇل تىزىمگە سارقان اۋدانى دا قوسىلاتىن سياقتى. ويتكەنى وسى اۋداننىڭ شارۋالارى دا جۇگەرىدەن مول ءونىم جينادى.
جالپى, وتكەن جىلى سارقاندىقتار «دالا ارۋى» اتانعان داقىلدى 2200 گەكتارعا سەپسە, بيىل ونىڭ القابى 4585 گەكتارعا جەتكەن. قازىر شارۋاشىلىقتار جۇگەرى جيناۋ ناۋقانىن تولىق اياقتادى. اۋداندا ەلۋگە جۋىق شارۋاشىلىق جۇگەرى وسىرۋمەن اينالىسىپ وتىر. ولار وتكەن جىلى 2200 گەكتار جەردەن 6 مىڭ توننا ءونىم جيناسا, بيىل 4585 گەكتاردان 25 مىڭ توننادان استام جۇگەرىنى قامباعا باستى. وڭىردە شارۋا قوجالىقتارىن مەملەكەتتىك قولداۋ, ەرەكشە سورتتى تۇقىمدار ءۇشىن سۋبسيديا, ءارتۇرلى اۋىلشارۋاشىلىق تەحنيكالارىن الۋدا جەڭىلدەتىلگەن نەسيە, سونداي-اق ناۋقان كەزىندە جەڭىلدەتىلگەن جاعار جانارمايمەن ۋاقىتىلى قامتاماسىز ەتۋ جولعا قويىلعان.
– جۇگەرى مال ازىعى رەتىندە باعالى. مالدىڭ تەز قوڭدانۋىنا كومەگى زور. سوندىقتان جينالعان ونىمدەردىڭ باسىم بولىگى مال ازىعىنا جونەلتىلەدى. نەگىزگى داقىلداردىڭ بارلىعىن وتكەن ايدىڭ سوڭىنا دەيىن اۋا رايىنىڭ قولايلى كەزىندە ورىپ ۇلگەردىك. قاراشانىڭ اياعىنا دەيىن مايلى داقىلدار جانە قانت قىزىلشاسىن جيناۋدى مەجەلەپ بولدىق, – دەيدى سارقان اۋداندىق اۋىل شارۋاشىلىعى ءبولىمىنىڭ باسشىسى جاندوس ومىرسادىق.
سارقان اۋدانىندا بيىل اۋىل شارۋاشىلىعى باعىتىنداعى ەگىستىك القابى 98 مىڭ گا بولسا, سونىڭ 58 مىڭ گەكتارىنا ءداندى جانە بۇرشاقتى داقىلدار سەبىلگەن. ەگىستىكتەن جالپى جينالعان ءونىم – 138 توننا. ال وبلىس بويىنشا اۋىل شارۋاشىلىعى داقىلدارىنىڭ القابى 3,7 مىڭ گەكتارعا ۇلعايىپ, 972 مىڭ گەكتارعا جەتكەن. اۋىل شارۋاشىلىعىن قولداۋعا بيىل 50 ملرد تەڭگە ءبولىنىپ, سونىڭ 43 ملرد تەڭگەسى سۋبسيدياعا باعىتتالعان ەكەن.