اۋىل شارۋاشىلىعى مينيسترلىگىنىڭ بولىمشەلەرى مەن ۇيىمدارىندا بيۋدجەت قاراجاتىن جىمقىردى دەگەن كۇدىكپەن 30-دان استام ادام ۇستالدى. بۇل تۋرالى بريفينگتە سىبايلاس جەمقورلىققا قارسى قىزمەت باسشىسىنىڭ كومەكشىسى شىڭعىس الەكەشەۆ مالىمدەدى, دەپ حابارلايدى Egemen.kz.
«سىبايلاس جەمقورلىققا قارسى قىزمەت اۋقىمدى ارنايى وپەراتسيانىڭ ناتيجەسىندە اۋىل شارۋاشىلىعى مينيسترلىگىنىڭ ۆەدومستۆولىق باعىنىستى بولىمشەلەرى مەن ۇيىمدارى, سونداي-اق نۇر-سۇلتان, شىمكەنت, اقمولا, تۇركىستان, جامبىل, شىعىس قازاقستان, باتىس قازاقستان, اتىراۋ جانە اقتوبە وبلىستارى اكىمدىكتەرىنىڭ قاتارىنان قىلمىستىق توپتاردىڭ قىزمەتىنىڭ جولىن كەستى», دەدى الەكەشەۆ.
ونىڭ ايتۋىنشا, ولار سۋبسيديالاۋ ءۇشىن بولىنگەن بيۋدجەت قاراجاتىن ۇرلاۋمەن اينالىسقان, سونداي-اق كاسىپكەرلەردەن جۇيەلى پارا مەن زاڭسىز سىياقى الۋدىڭ سىبايلاس جەمقورلىق سحەماسىن ۇيىمداستىرعان.
«قازىرگى ۋاقىتتا تەرگەۋ شارالارى جۇرگىزىلۋدە, زاتتاي دالەلدەمەلەر الىندى, 30-دان استام ادام انىقتالدى, ولاردىڭ كوپشىلىگى قازىردىڭ وزىندە قىلمىستارىن مويىندادى. تەرگەۋ مۇددەسى ءۇشىن باسقا اقپارات جاريا ەتىلمەيدى», دەدى كومەكشى.
بۇعان دەيىن قر سىبايلاس جەمقورلىققا قارسى ءىس-قيمىل اگەنتتىگى نۇر-سۇلتان, شىمكەنت قالالارىندا, سونداي-اق تۇركىستان, شىعىس قازاقستان, باتىس قازاقستان, اقمولا جانە اقتوبە وبلىستارىندا جەدەل-تەرگەۋ ءىس-شارالارى جۇرگىزىلىپ جاتقانىن حابارلاعان بولاتىن.
بارلىق قىلمىستار اۋىل شارۋاشىلىعى ءۇشىن سۋبسيديا ۇرلاۋمەن بايلانىستى ەكەنى اتاپ ءوتىلدى.