قازاقستاننىڭ ورتالىق كوممۋنيكاتسيالار قىزمەتىندە كەزەكتى بريفينگ ءوتتى. بۇل جولعى باسقوسۋ ەلباسى جولداۋىندا ايتىلعان «ماڭگىلىك ەل» ۇلتتىق يدەياسىنا ارنالدى. جيىنعا بەلگىلى سۋرەتشى باقتىبەك تالقامباەۆ, «شەجىرە» قازىرگى زامان گالەرەياسىنىڭ جەتەكشىسى روزا ءجۇسىپوۆا, مەديتسينا عىلىمدارىنىڭ دوكتورى ەربولات دالەنوۆ جانە ونەرتانۋ پروفەسسورى ەرمەك اسىلحانوۆ سىندى ونەر, عىلىم سالاسىنىڭ وكىلدەرى قاتىستى.
«زيالى قاۋىم وكىلدەرى مەملەكەت باسشىسىنىڭ جولداۋىندا جاريالانعان «قازاقستان-2050» ستراتەگياسىن قولدايدى. «ءماڭگىلىك ەل» ۇلتتىق يدەياسى ءبىزدى رۋحاني ىزدەنىستەرگە, شىعارماشىلىق ىزدەنىستەرگە ىنتالاندىرادى. سونىڭ دالەلى رەتىندە ءبىز ەلوردالىق سۋرەتشى باقتىبەك تالقامباەۆتىڭ كورمەسىن ۇيىمداستىرىپ وتىرمىز. بۇل كورمە «ماڭگىلىك ەل» دەپ اتالادى», – دەدى وسى ءىس-شاراعا ۇيىتقى بولعان روزا ءجۇسىپوۆا.
«ەلباسىنىڭ «ماڭگىلىك ەل» دەگەن ءسوزى ءبىزدى, ونەر ادامدارىن قاناتتاندىرىپ جىبەردى. مەنىڭ شىعارماشىلىعىم دا نەگىزىنەن وسى تاقىرىپقا ارنالعان. كوپتەگەن تۋىندىلارىمدى شەتەلدىك كورەرمەندەر جىلى قابىلداپ, ۇلتتىق بوياۋعا ريزالىقتارىن ءبىلدىرىپ ءجۇر. ءححى عاسىر – ەلباسى ءجيى ايتاتىن عىلىم عاسىرى. سول عىلىم عاسىرىنىڭ ەرتەڭگى تۇتقاسى – بۇگىنگى تالانتتى بالالار. ولاردىڭ اراسىنان تالانتتاردى تاپ باسىپ تانىپ, باۋلۋ ءبىزدىڭ باستى مىندەتىمىز», دەدى باقتىبەك تالقامباەۆ.
بريفينگتە ءسوز العان مەديتسينا عىلىمدارىنىڭ دوكتورى ە.دالەنوۆ «ماڭگىلىك ەل» بولۋ ءۇشىن ادام دەنساۋلىعىنىڭ دا ماڭىزدى ەكەنىن ايتا كەلە, بۇل رەتتە شىعارماشىلىقتىڭ, ونىڭ ىشىندە, اسىرەسە, سۋرەت ونەرىنىڭ پايداسى مولىنان ەكەنىن جەتكىزدى. اتالعان ونەردە بولاتىن جەتى ءتۇرلى بوياۋدىڭ قاسيەتىنە دە توقتالىپ ءوتتى دارىگەر. ال, ونەرتانۋ پروفەسسورى ەرمەك اسىلحانوۆ تا بەينەلەۋ, ساۋلەت ونەرلەرىنىڭ ەرەكشەلىكتەرىن وزىندىك ناقتى مىسالدارىمەن تولىقتىرا كەلە, ەلىمىزدە ساۋلەت ونەرى كەم دەگەندە قولا داۋىرىنەن باستالاتىنىن ناقتى دالەلدەرمەن تىلگە تيەك ەتتى.
باسقوسۋ بارىسىندا قوناقتار باق وكىلدەرىنىڭ بىرقاتار سۇراقتارىنا جاۋاپ بەردى.
ءابدىراحمان قىدىربەك,
«ەگەمەن قازاقستان».