سەربيانىڭ باس شاھارى – بەلگرادتا ءوتىپ جاتقان اۋەسقوي بوكستان كەزەكتى الەم چەمپيوناتىنىڭ العاشقى اپتاسى ءوز مارەسىنە جەتتى. بۇگىنگە دەيىن بارلىق بوكسشىمىز شارشى الاڭعا كوتەرىلىپ قويدى. جىگىتتەرىمىزدىڭ الدى ءۇش كەزدەسۋ, كەيىنگىلەرى العاشقى جەكپە-جەگىن وتكىزىپ ۇلگەردى. وكىنىشكە قاراي, جارىس بارىسىندا ەكى بىلعارى قولعاپ شەبەرىمىز قاتاردان شىعىپ قالدى.
بەلگرادتاعى الەم چەمپيوناتىنىڭ اسا جەڭىل سالماعىندا ەل نامىسىن قورعاپ جاتقان تەمىرتاس ءجۇسىپوۆ وتانداستارىمىز اراسىندا ءبىرىنشى بولىپ قۇرلىق بىرىنشىلىگىنىڭ شيرەك فينالىنا جولداما الدى. سونداي-اق تەمىرتاس بىرىنشىلىككە قاتىسىپ جاتقان چەمپيوناتتاعى ەڭ جاسى ۇلكەن بوكسشىلاردىڭ ءبىرى سانالادى. 48 كگ-دا قازاقستاننىڭ بەس دۇركىن چەمپيونى, 2013 جىلعى ازيا چەمپيونى, جۋىردا عانا رەسەيدە وتكەن اسكەريلەر اراسىنداعى جاھاندىق دودانىڭ جەڭىمپازى ءجۇسىپوۆ سەربيا شارشى الاڭىنداعى ءبىرىنشى كەزدەسۋىن جارىس قوجايىنى, 19 جاستاعى ومەر امەتوۆيچپەن وتكىزدى. وزىنەن 14 جاس كىشى بوكسشىمەن جۇدىرىقتاسقان تەمىرتاس 4:1 ەسەبىمەن ەش قيىندىقسىز كەلەسى كەزەڭگە ءوتتى.
وتانداسىمىز جارتىلاي فينالعا شىعۋ ءۇشىن وزبەكستاننىڭ ۇكىلى ءۇمىتى – نوديرجون ميرزاحمەدوۆپەن قولعاپ تۇيىستىرەدى. بۇل – وسى چەمپيوناتتاعى قازاق-وزبەك تەكەتىرەسىنىڭ ءتورتىنشىسى (ساكەن بيبوسىنوۆ – حاسانبوي دۋسماتوۆ; اسلانبەك شىمبەرگەنوۆ – شاحرام گياسوۆ; ايبەك ورالباي – ماديار سايدراحيموۆ) بولماق. ازيا چەمپيوناتىنىڭ ەكى دۇركىن جەڭىمپازى وزبەك ميرزاحمەدوۆ پەن تەمىرتاس ءجۇسىپوۆ سوڭعى رەت وسى جىلدىڭ ءساۋىر ايىندا رەسەيدىڭ سانكت-پەتەربۋرگ قالاسىندا وتكەن گۋبەرناتور كۋبوگىنىڭ فينالىندا كەزدەسىپ, باسەكە نوديرجوننىڭ جەڭىسىمەن اياقتالعان بولاتىن. مىنە, اراعا ساناۋلى ايلار سالىپ ەكى بوكسشىنىڭ جولى الەم چەمپيوناتىنىڭ شيرەك فينالىندا قايتا ءتۇيىستى. سونداي-اق بۇل – تەمىرتاس ءۇشىن ەسە قايتاراتىن تاماشا مۇمكىندىك. ەكى بوكسشى اراسىنداعى كەزدەسۋ 2 قاراشاعا جوسپارلانعان.
سونداي-اق چەمپيوناتتاعى العاشقى جەكپە-جەكتەرىن وتكىزگەن سابىرحان ماحمۇد (54 كگ), ءساماتالى تولتاەۆ (60 كگ), ءساناتالى تولتاەۆ (63,5 كگ), نۇربەك ورالباي (80 كگ) جانە ايبەك ورالباي (92 كگ) دا بىرىنشىلىكتى ءساتتى باستادى. بىلتىر 52 كگ سالماقتا ەل چەمپيونى اتانعان سابىرحان الەم چەمپيوناتىنداعى العاشقى كەزدەسۋىن وڭتۇستىككورەيالىق كيم ين گيۋمەن وتكىزىپ, 5:0 ەسەبىمەن باسىم ءتۇستى.
ال اعايىندى تولتاەۆتاردىڭ ۇلكەنى ءساماتالى (60 كگ) تايلاندتىق حۋناتيپ ءپيدۋنچتى 3:2 ەسەبىمەن تىزە بۇكتىرسە, ءساناتالى (63,5 كگ) مولدوۆالىق ۆاسيلي چەبوتاردى 5:0 ەسەبىمەن جەڭدى.
سونىمەن قاتار اعايىندى ورالبايلار دا العاشقى جەڭىستەرىنە قول جەتكىزدى. 92 كگ-دا ونەر كورسەتەتىن ايبەك پولياك بوكسشىسى ماتەۋش بەرەزنيتسكيدەن 4:1 ەسەبىمەن باسىم تۇسسە, نۇربەك برازيليالىق يساياسا فيلونى ەلىنە قايتاردى. قورىتىندى ەسەپ – 5:0.
الەم بىرىنشىلىگىندەگى ەكىنشى جەكپە-جەگىن وتكىزگەن اسلانبەك شىمبەرگەنوۆ (71 كگ) ريو وليمپياداسىنىڭ ءفيناليسى وزبەكستاندىق شاحرام گياسوۆتى ايقىن باسىمدىقپەن جەڭىپ (5:0!), ءتۋرنيردىڭ كەلەسى اينالىمىنا جولداما الدى. 75 كگ سالماق دارەجەسىندە جۇدىرىقتاسىپ جاتقان نۇرقانات رايىس تا ءوز مىقتىلىعىن دالەلدەۋدە. 21 جاستاعى وتانداسىمىز ەكىنشى اينالىمدا مولدوۆالىق ۆلاد گاۆريليۋكپەن كەزدەسىپ, تورەشىلەردىڭ شەشىمى بويىنشا 4:1 ەسەبىمەن جەڭىسكە جەتتى.
ۇلتتىق قۇراما كاپيتانى, ەكى الەم چەمپيوناتىنىڭ قولا جۇلدەگەرى ابىلايحان ءجۇسىپوۆ (67 كگ) جانكۇيەرلەرگە «ماشينا» لاقاپ اتىمەن تانىمال ۆەنەسۋەلا وكىلى كريستيان پالاسيونى جارىس جولىنان ىعىستىردى. ال 57 كگ-دا جۇدىرىقتاساتىن سەرىك تەمىرجانوۆ جۋىردا عانا پولشادا وتكەن جاستار اراسىنداعى الەم چەمپيوناتىندا توپ جارعان جاپونيالىق رەيتو تسۋتسۋميدەن باسىم ءتۇستى. بۇل جەكپە-جەكتە تسۋتسۋمي جەرلەسىمىزگە ەش قارسىلىق كورسەتە المادى. قايتا تەمىرجان جاپونيالىق بوكسشىعا شاعىن شەبەرلىك ساباعىن وتكىزدى دەسە دە بولادى.
وكىنىشكە قاراي, الەم چەمپيوناتىنىڭ كەزەكتى جارىس كۇنىندە ەكىنشى بوكسشىمىز بىرىنشىلىكتەن شىعىپ قالدى. ەكى الەم چەمپيوناتىنىڭ كۇمىس جۇلدەگەرى, توكيو وليمپياداسىنىڭ قولا جۇلدەگەرى قامشىبەك قوڭقاباەۆتىڭ ءىزباسارى سانالعان اسا اۋىر سالماقتاعى نۇرلان ساپارباي العاشقى جەكپە-جەگىندە يسپانيالىق ايۋبا گادفى ءدريسستىڭ وسال تۇسىن تابا المادى. جەرلەسىمىز تورەشىلەردىڭ ارالاس شەشىمى بويىنشا قارسىلاسىنان جەڭىلىپ قالدى. وسىلايشا, چەمپيوناتتىڭ العاشقى اپتاسىندا ەكى بوكسشىمىز الەم چەمپيوناتىن ەرتە اياقتادى.
دەگەنمەن جەكسەنبى كۇنگى جاعداي بويىنشا قازاقستان قۇراماسىنىڭ 11 بوكسشىسى جارىس جولىن جالعاستىرۋدا. بۇل – ازىرشە, چەمپيوناتتاعى ەڭ ۇزدىك ناتيجە.