حالىقارالىق تۇركى اكادەمياسىنىڭ پرەزيدەنتى دارحان قىدىرالى تۇركيا جۇرتشىلىعىن رەسپۋبليكا كۇنىمەن قۇتتىقتادى, دەپ حابارلايدى Egemen.kz اكادەميانىڭ ءباسپاسوز قىزمەتىنە سىلتەمە جاساپ.
«بۇگىن 29 قازان تۇركيا حالقىنىڭ ۇلىق مەيرامى – رەسپۋبليكا كۇنى. رەسپۋبليكانىڭ قۇرىلعانىنا 98 جىل تولعان وسى ايتۋلى كۇنمەن تۇركيا مەملەكەتىن جانە باۋىرلاس تۇرىك حالقىن شىن جۇرەكتەن قۇتتىقتايمىن.
ۇلى كوشباسشى گازي مۇستافا كەمال اتاتۇرىكتىڭ «ەلدە تىنىشتىق – الەمدە تىنىشتىق» قاعيداسىمەن قۇرىلعان تۇركيا رەسپۋبليكاسى حالىقارالىق ساياسي ارەنادا ايماقتاعى جانە ودان تىس وڭىرلەردەگى قاۋىپسىزدىك پەن بەيبىتشىلىكتىڭ كەپىلى رەتىندە ماڭىزى زور مەملەكەتكە اينالدى.
ۇلت-ازاتتىق كۇرەستىڭ تاريحي جەڭىسپەن اياقتالىپ, رەسپۋبليكانىڭ جاريالانۋى تۇركيانىڭ قارقىندى دامىپ, وركەنيەتكە قادام باسۋى ءۇشىن جاڭا كوكجيەكتەرگە جول اشتى. بۇگىندە قۋاتتى ەكونوميكاعا, بەرىك دەموكراتياعا قول جەتكىزىپ, ادامي قۇندىلىقتارعا ادالدىعىمەن ءوزىنىڭ عاسىرلىق مەرەيتويىنا قادام باسقان تۇركيا رەسپۋبليكاسى وزگە ەلدەرگە ونەگە بولىپ كەلەدى.
وسىعان وراي تۇركيا جۇرتشىلىعىن رەسپۋبليكا كۇنىمەن تاعى دا قۇتتىقتاپ, باۋىرلاس تۇرىك حالقىنا بەيبىتشىلىك, بىرلىك پەن ىنتىماق, تۇراقتى دامۋ تىلەيمىن!», دەپ جازىلعان قۇتتىقتاۋدا.