برازيليا سەناتى ۇكىمەتتىڭ COVID-19 پاندەمياسىنا بايلانىستى ارەكەتتەرىن زەرتتەپ, كەلەسى اپتادا ۇسىنىلاتىن قورىتىندى بايانداماسىندا پرەزيدەنت جاير بولسونارۋعا 11 قىلمىستىق ايىپ تاققالى وتىر.
رەنان كالەيروس سۇحباتتارىنىڭ بىرىندە ءساۋىر ايىندا باستالعان تەرگەۋ ناتيجەسى بويىنشا بولسونارۋعا ەلدىڭ بايىرعى تۇرعىندارىنا قارسى گەنوتسيد, لاۋازىمدىق قىلمىستار, مەملەكەتتىك قاراجاتتى جۇيەلى پايدالانباۋ, سانيتارلىق شارالاردى بۇزۋ, قىلمىسقا ارانداتۋ جانە جەكە قۇجاتتاردى قولدان جاساۋ سەكىلدى ايىپ تاعىلاتىنىن مالىمدەگەن.
ءوزى 2020 جىلدىڭ شىلدەسىندە كوروناۆيرۋس جۇقتىرىپ, ەمدەلىپ شىققانىنا قاراماستان, وڭشىل پرەزيدەنت وقشاۋلاۋ, كارانتين شارالارىنا قارسى شىعىپ, دالەلدەنبەگەن ەم ءتۇرىن العا تارتقان, سونداي-اق ۆاكتسيناعا كۇمان كەلتىرىپ, COVID-19 ىندەتىنىڭ اۋىر سالدارىن جەڭىلدەتىپ كورسەتۋگە تىرىسقان.
سەناتتىڭ تەرگەۋ كوميسسياسى جۇرگىزگەن زەرتتەۋدىڭ ەسەبى كەلەسى سەيسەنبىدە جاريالانۋى كەرەك. كەلەسى كۇنى كوميسسيا مۇشەلەرى قۇجاتتى باس پروكۋراتۋراعا جىبەرمەس بۇرىن ءماتىنىن ءبىر قاراپ, داۋىس بەرۋگە ءتيىس. سوعان سايكەس بولسونارۋ مەن وزگەلەرگە ايىپ تاعۋ تۋرالى شەشىم قابىلدانادى.
باس پروكۋراتۋرا پرەزيدەنتكە ايىپ تاعۋى مۇمكىن, بىراق ونى سوتتايتىن جوعارعى سوت تومەنگى پالاتانىڭ سوت ءىسىن جالعاستىرۋعا رۇقساتىن سۇراۋى كەرەك. ساراپشىلاردىڭ ايتۋىنشا, تومەنگى پالاتا مۇنداي وتىنىشپەن كەلىسۋى ەكىتالاي. ال پرەزيدەنتتىڭ كەڭسەسى تۇسىنىكتەمە بەرۋ تۋرالى وتىنىشكە بىردەن جاۋاپ بەرە قويمادى.
جالپى, بولسونارۋدىڭ حالىق اراسىنداعى رەيتينگى ونىڭ دەنساۋلىق ساقتاۋ سالاسىنداعى باستى داعدارىستى شەشۋ بارىسىنداعى ارەكەتتەرىنە ساي تومەندەي باستاعان. برازيليادا COVID-19-دان 600 مىڭنان استام ادام قايتىس بولدى, بۇل – امەريكا قۇراما شتاتتارىنان كەيىنگى ەكىنشى كورسەتكىش.
كالەيروستىڭ ايتۋىنشا, باياندامادا بولسونارۋدىڭ كەيبىر ۇلدارىنا جانە بۇرىنعى دەنساۋلىق ساقتاۋ ءمينيسترى ەدۋاردو پوسۋەلوعا دا قىلمىس جاساعانى ءۇشىن ايىپ تاعىلۋى مۇمكىن. الايدا قىلمىس جاسادى دەگەن ايىپقا قاي ۇلىنىڭ ىلىگەتىنى بەلگىسىز.
وسىدان بىرەر كۇن بۇرىن عانا برازيليا پرەزيدەنتى كوروناۆيرۋسقا قارسى ۆاكتسينا سالدىرمايتىنىن جارييالاعان. ال بۇعان دەيىن ول ەلدەگى سوڭعى برازيليالىقتان كەيىن ەكپە سالدىرۋعا ۋادە ەتكەن. الايدا ول سوڭعى زەرتتەۋلەرگە سۇيەنىپ, مۇلدەم ۆاكتسينا سالدىرمايتىنىن مالىمدەگەن. برازيليا پرەزيدەنتىنىڭ ايتۋىنشا, ونىڭ يممۋنيتەتى جەتكىلىكتى.
بولسونارۋ ەل ازاماتتارىنىڭ ۆاكتسينا الماۋعا قۇقىعى بار ەكەنىن دە ايتقان. دەرەكتەرگە سەنسەك, پرەزيدەنتتىڭ بۇل پىكىرى, كەرىسىنشە حالىقتىڭ ۆاكتسيناعا دەگەن سەنىمى ارتىپ, كوپشىلىگى سالدىرىپ جاتقان كەزدە ايتىلعان. Johns Hopkins ۋنيۆەرسيتەتىنىڭ مالىمەتى بويىنشا, برازيليا حالقىنىڭ شامامەن 47 پايىزى تولىعىمەن ۆاكتسينا سالدىرعان, ال Our World In Data پورتالىنا سەنسەك, تۇرعىنداردىڭ 72 پايىزى كەم دەگەندە ءبىر دوزا ەكپە الىپ ۇلگەرگەن.
بولسونارۋ وسىعان دەيىن دە ءوز ەلىندە Covid-19 ىندەتىنە نەمقۇرايدىلىعى مەن ۆيرۋس تاراعان كەزدە دەنساۋلىق ساقتاۋ سالاسىنداعى ساقتىق شارالارىن دەر كەزىندە قابىلداماي, ۇزاق ۋاقىت بويى كەيىنگە قالدىرعانى ءۇشىن قاتتى سىنعا ۇشىراعان.
سونىمەن قاتار بيىل كىركۇيەك ايىندا برازيليا پرەزيدەنتىنىڭ بۇۇ-نىڭ نيۋ-يوركتەگى شتاب-پاتەرىنە كىرەر الدىندا شەتەلدىك دەلەگاتسيالارعا ۆاكتسينا سالدىرۋ تۋرالى قويعان تالابىن ەسكەرمەگەنى بەلگىلى. كەيىنىرەك برازيليا دەلەگاتسياسىنىڭ بىرنەشە مۇشەسىنىڭ ىندەت جۇقتىرعانى انىقتالعان.
بۇل زەرتتەۋ سونداي-اق 2022 جىلعى پرەزيدەنت سايلاۋىنا ايتارلىقتاي اسەر ەتەيىن دەپ تۇر. ساراپشىلار قىلمىس جاساعانى بويىنشا ايىپ تاعىلماسا دا, كەلەسى جىلى وپپوزيتسيا وكىلدەرى قازىرگى پرەزيدەنتتىڭ قاتەلىكتەرىن جاقسىلاپ بەتىنە باسۋى ابدەن مۇمكىن دەپ وتىر. بايانداما ەلدە ءبىراز ساياسي شۋ شىعارىپ, جاعىمسىز جاڭالىقتى كوبەيتۋى مۇمكىن. تەك ەلدە عانا ەمەس, حالىقارالىق قوعامداستىق تا بۇل وقيعادان حاباردار بولارى انىق. ال بۇل ءوز كەزەگىندە ونسىز دا بەدەلى از بولسونارۋعا دەگەن قۇرمەتتى ارتتىرمايتىنى تۇسىنىكتى. قوعامدا بولسونارۋدىڭ قولىندا بيلىك بار كەزدە زاڭ الدىندا جاۋاپ بەرەتىنىنە سەنىم از. دەگەنمەن, سايلاۋ ناۋقانىنىڭ الدىندا ابىگەرگە سالاتىنى ءسوزسىز.