12 قازان, سەيسەنبىدە, كيەۆتە ۋكراينا مەن ەۋروپالىق وداقتىڭ 23-ءشى ءسامميتى ءوتىپ جاتىر, دەپ حابارلايدى Egemen.kz.
شاراعا ۋكراينا پرەزيدەنتى ۆلاديمير زەلەنسكي, ەۋروپالىق كەڭەستىڭ باسشىسى چارلز ميشەل جانە ەۋروپالىق كوميسسيانىڭ باسشىسى ۋرسۋلا فون دەر لەيەن توراعالىق ەتەدى.
كوشباسشىلار ۋكراينا مەن ەو اراسىنداعى تەرەڭ جانە جان-جاقتى ەركىن ساۋدا ايماعى, ەنەرگەتيكالىق قاۋىپسىزدىكتى قامتاماسىز ەتۋ مەن سالالىق ىنتىماقتاستىقتى تەرەڭدەتۋ جونىندەگى اسسوتسياتسيا تۋرالى كەلىسىمدى جۇزەگە اسىرۋداعى جەتىستىكتەر مەن ءوزارا ءىس-قيمىلدىڭ كەلەشەگىن تالقىلايدى.
كۇن تارتىبىندە قاۋىپسىزدىك پەن قورعانىس سالاسىنداعى ىنتىماقتاستىق ماسەلەلەرى دە قاراستىرىلادى. سامميت اياسىندا ۋكراينا مەن ەۋروپالىق وداق اراسىندا بىرقاتار كەلىسىمدەرگە قول قويۋ جوسپارلانۋدا.
ءسامميتتىڭ قورىتىندىسى بويىنشا بىرلەسكەن مالىمدەمە قابىلدانادى. ۋكراينالىق باق-تا بىرنەشە قۇجاتقا قول قويىلعانى جايلى اقپاراتتار جاريالانىپ جاتىر.