وتكەن دەمالىس كۇنى اقش-تىڭ لاس-ۆەگاس قالاسىندا ورنالاسقان T-Mobile ارەناسىندا اسا اۋىر سالماقتاعى WBC بەلبەۋىنىڭ يەگەرى, 33 جاستاعى بريتانيالىق بوكسشى تايسون فيۋري (32-0-1, 22 كو) مەن الەمنىڭ ەكس-چەمپيونى (WBC), 35 جاستاعى امەريكالىق دەونتەي ۋايلدەر (42-2-1, 41 كو) ءۇشىنشى رەۆانش جەكپە-جەگىن وتكىزدى.
اۋىر سالماقتاعى الىپتار اراسىنداعى العاشقى ايقاس 2018 جىلدىڭ 1 جەلتوقسانىندا اقش-تىڭ لوس-اندجەلەس قالاسىنداعى Staples Center سپورت كەشەنىندە ءوتتى. 12 راۋندقا سوزىلعان بۇل جەكپە-جەكتە فيۋري ەكى رەت نوكداۋنعا تۇسسە دە, قاپتالداعى تورەشىلەردىڭ ەسەبى بويىنشا كەزدەسۋ 111-115, 114-110, 113-113 ەسەبىمەن تەڭ اياقتالدى. ءبىرىنشى كەزدەسۋدىڭ ءبىرىنشى جارتىسىندا بريتانيالىق بوكسشى قارسىلاسىنا قاراعاندا بارلىق جاعىنان ۇستەمدىك تانىتتى. ال ۋايلدەر تەك ءبىر سوققى ءۇشىن جۇمىس ىستەدى. ءسويتىپ, امەريكالىق بوكسشى 9-راۋندتا ءوز دەگەنىنە جەتتى. دەونتەيدىڭ وڭ قولىمەن جاساعان اۋىر سوققىسى ءفيۋريدى ەسەڭگىرەتىپ تاستادى. نوكداۋن! كەيىننەن ۋايلدەر 12-راۋندتا وڭ قولىمەن تىكەلەي, سول قولىمەن جاقتان ۇرعان سەريالى سوققىسىمەن قارسىلاسىن تاعى دا نوكداۋنعا ءتۇسىردى. سوعان قاراماستان تورەشىلەر بۇل ايقاستا باسىمدىققا يە بولعان جەڭىمپاز بوكسشىنى كورە الماپتى.
ءسويتىپ ەكى بوكسشى اراعا 14 اي سالىپ كىم مىقتىنى انىقتايتىن ەكىنشى جەكپە-جەك وتكىزۋگە كەلىستى. لاس-ۆەگاستاعى (اقش) MGM Grand Garden Arena-دا وتكەن رەۆانشتا تايسون فيۋري ايقىن باسىمدىق تانىتىپ, قارسىلاسىنان 7-راۋندتا تەحنيكالىق نوكاۋتپەن باسىم ءتۇستى. ۋايلدەردىڭ باپكەرى 7-راۋندتا شارشى الاڭعا اق سۇلگى لاقتىرىپ, شاكىرتىنىڭ جەڭىلگەنىن ەرتە مويىندادى. بۇل راۋندقا دەيىن امەريكالىق بوكسشى 3 جانە 5-راۋندتا نوكداۋنعا تۇسكەن بولاتىن. ءسويتىپ, ەكىنشى جەكپە-جەك ءفيۋريدىڭ جەڭىسىمەن اياقتالدى. دەونتەي بۇل جەڭىلىسىن كەزدەسۋ الدىندا كيىپ شىققان كيىمىنىڭ اۋىر بولۋىمەن, فيزيكالىق تۇرعىدا شارشاپ قالعانىمەن بايلانىستىرىپ ەدى.
كۇنى كەشە اياقتالعان تريلوگيا 11-راۋندتا تايسون ءفيۋريدىڭ ورىنداۋىنداعى ادەمى نوكاۋتپەن اياقتالدى. دەونتەي بۇل جەكپە-جەككە جاڭا جاتتىقتىرۋشىمەن دايىندالسا دا, جەڭىسكە جەتە المادى. بۇرىنعى باپكەرى مارك بريلاندپەن ەكىنشى ايقاستا ورامال لاقتىرعانى ءۇشىن جۇمىس ىستەۋدەن باس تارتقان ەدى. ءسويتىپ, ونى ءۇشىنشى جەكپە-جەككە بۇرىنعى اۋىر سالماقتاعى بوكسشى ماليك سكوتت دايىندادى. ءبىر قىزىعى, ۋايلدەر سكوتتى 2014 جىلى ءبىرىنشى راۋندتا-اق نوكاۋتپەن جەڭگەن ەدى.
تريلوگياعا جاڭا باپكەرمەن دايىندالعان دەونتەي ۋايلدەر كەزدەسۋدى ءتاۋىر باستاعان ەدى. بىراق ءۇشىنشى راۋندقا كەلگەندە قارسىلاسىنىڭ اۋىر سوققىسىن وتكىزىپ الىپ, نوكداۋنعا ءتۇسىپ قالدى. تەز ەس جيىپ ۇلگەرگەن امەريكالىق بوكسشى ءتورتىنشى راۋندتا تايسون ءفيۋريدىڭ ءوزىن ەكى رەت نوكداۋنعا جىبەردى. وسىدان كەيىن ەكى بوكسشى دا وتە ساقتىقپەن جۇدىرىقتاستى. بىراق راۋند وتكەن سايىن امەريكالىق بوكسشىنىڭ كۇشى سارقىلىپ, بريتانيالىقتىڭ ەكىنشى تىنىسى اشىلا باستادى. جەكپە-جەكتى تولىق ءوز قولىنا العان فيۋري قارسىلاسىن 11-راۋندتا اۋىر نوكاۋتقا ءتۇسىرىپ, بارلىعىنا نۇكتە قويدى.
وسىلايشا, تايسون فيۋري 32-ءشى جەكپە-جەگىن وتكىزىپ, 31-ءشى جەڭىسىنە قول جەتكىزدى. ونىڭ 22-ءسىن نوكاۋتپەن اياقتاسا, ءبىر مارتە تەڭ ءتۇستى. ال دەونتەي ۋايلدەر 45-ءشى مارتە شارشى الاڭعا كوتەرىلىپ, 41 كەزدەسۋىندە جەڭىسكە جەتكەن. ءبىر رەت تەڭ ناتيجە كورسەتىپ, ەكى رەت جەڭىلىستىڭ كەرمەك ءدامىن تاتتى. ەكەۋىندە دە ءدال وسى فيۋريدەن جەڭىلدى.