بۇعان دەيىن قوستاناي وبلىستىق دەنساۋلىق ساقتاۋ باسقارماسى الداعى ەكى اي ىشىندە ۆاكتسينا قابىلداعان تۇرعىنداردىڭ جەڭىل اۆتوكولىك ۇتىسىنا قاتىساتىنىن ايتقان ەدى. وسى كەزەڭدە 73 477 ادام ەكپە الىپ, اۆتوماتتى تۇردە ۇتىس وينىنىڭ قاتىسۋشىسى بولىپ تىركەلگەن. 2021 جىلى قۇراستىرىلعان Chevrolet Nexia اۆتوكولىگىن رۋدنىي قالاسىندا تۇراتىن 69 جاستاعى زەينەتكەر ۇتىپ الدى.
«قوستاناي پلازا» ساۋدا ورتالىعىنىڭ الدىندا وتكەن قورىتىندى شارادا وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى رۇستەم ايتباەۆ زەينەتكەرگە تەمىر تۇلپاردىڭ كىلتىن تابىس ەتتى. ءوزىنىڭ ايتۋىنشا, ۆالەنتينا برۋم بالا-شاعاسىنىڭ قارسى بولۋىنا قاراماستان, جاسىرىن بارىپ ەكپە الىپتى.
– قىزىم ۆاكتسينانى دەنساۋلىعىم كوتەرمەيتىنىن ايتىپ, ەمحاناعا بارۋعا اسىقپاۋىمدى ايتتى. دەگەنمەن ءوز ەركىممەن ەل قاتارلى ەكپە الۋ كەرەك دەپ شەشتىم. قىزىما ايتپاي ەكپە پۋنكتىنە بارىپ, ۆاكتسينانىڭ العاشقىسىن تامىز ايىندا, ەكىنشىسىن قىركۇيەكتىڭ ورتاسىندا قابىلدادىم. كەرى اسەرى بولعان جوق, ەشبىر جايسىزدىق سەزىنگەن جوقپىن. ونىڭ ۇستىنە, بۇل قادامىم ويلاماعان جەردەن ۇلكەن ولجاعا كەنەلتتى. شىنىمدى ايتسام, بۇعان دەيىن مۇنداي قىمبات سىيلىق الىپ كورمەپپىن. ۇيىمداستىرۋشىلار تەلەفون شالىپ قۇتتىقتاعاندا, اۋەلدە سەنبەگەنىم راس. ەندى, مىنە, بۇگىن سۋ جاڭا كولىكتىڭ كىلتى قولىما ءتيىپ تۇر. ءوزىم وسى جاسقا دەيىن كولىك رولىنە وتىرىپ كورمەگەنمىن. بىراق نەمەرەلەرىم بار, سولاردىڭ بىرىنە بۇيىرايىن دەپ تۇر. ول جاعىن ۇيگە بارعان سوڭ اقىلداسا جاتارمىز, – دەدى ۆالەنتينا برۋم.
ۆالەنتينا فەدوروۆنانىڭ نەمەرەلەرى رەسەي, گەرمانيا ەلدەرىندە تۇرادى. اجەلەرىنىڭ كولىك ۇتىپ العانىن ەستىپ ولار دا ارنايى كەلىپ قۇتتىقتاعىسى كەلەتىندەرىن ايتىپتى. زەينەتكەر ەندى نەمەرەلەرىنىڭ اراسىندا كىشىگىرىم «ۇتىس ويىنىن» وتكىزەتىنىن ايتىپ ازىلدەدى.
زەينەتكەر كولىك كىلتىن العان سوڭ, سۋ جاڭا تەمىر تۇلپاردى كۇيەۋ بالاسى تىزگىندەپ اكەتتى. وبلىستىق دەنساۋلىق ساقتاۋ باسقارماسىنىڭ اقپاراتتىق-اناليتيكالىق ءبولىمىنىڭ جەتەكشىسى ءانۋار ەدىرەسوۆتىڭ ايتۋىنشا, الداعى ۋاقىتتا تاعى دا ءدال وسىنداي ۇتىس ويىنىن ۇيىمداستىرۋ جوسپاردا بار.