بۇل كۇندەرى ساۋد ارابياسىنىڭ جيددا قالاسىندا جاستار اراسىندا الەم چەمپيوناتى ءوتىپ جاتىر, دەپ جازادى Egemen.kz.
ءدۇبىرلى دوداعا قازاقستاننان ەكى سپورتشى عانا قاتىسۋدا. سولاردىڭ العاشقىسى كەشە جارىس جولىنا شىقتى. 102 كيلو سالماق دارەجەسىندە كۇش سىناسىپ جۇرگەن راحات بەكبولات بۇعان دەيىن دە جاسوسپىرىمدەر مەن جاستار اراسىندا الەم جانە قۇرلىق چەمپيونى اتانىپ, سان رەت رەكوردتىق كورسەتكىشتەردى دە جاڭارتتى. ەرەسەكتەر دۋىنا ەركىن قوسىلعان قازاقتىڭ دارىندى ۇلى بۇل سايىستاردا دا الدىنا جان سالماي, ءوزىنىڭ مىقتىلىعىن مويىنداتتى.
جيدداداعى جارىستا راحات قوسسايىستىڭ قورىتىندىسى بويىنشا 355 (155+200) كيلولىق زىلتەمىردى ەركىن ەڭسەرىپ, التىن تۇعىرعا كوتەرىلدى. تۇركيالىق تانەر چاگلار كۇمىس مەدالدى يەلەندى. ول قانداسىمىزدان 18 كيلو كەم كوتەردى. قولا جۇلدە يراك سپورتشىسى اممار رۋباياۆي اليگە بۇيىردى.
ەندى اسا اۋىر سالماقتاعى رۋفينا شالقاروۆا ءوز ونەرىن ورتاعا سالادى. ول دا ەلىمىزدەگى دارىندى زىلتەمىرشىلەردىڭ ءبىرى. ەرتەڭگى كۇنى رۋفينا راحاتتىڭ جەڭىستى جولىن جالعاستىرادى دەپ ۇمىتتەنەمىز.