بۇگىندە ءداستۇرلى تۇردە وتەتىن «Junior Eurovision-2021» حالىقارالىق بايقاۋىنا ۇلتتىق ىرىكتەۋ اياقتالدى. وزا شاپقان ورەندەردى اتىن بىلگىڭىز كەلسە, داۋىس بەرىپ, قولداۋىڭىز شارت.
كەزىندە ەرجان ماكسيم, دانەليا تۋلەشوۆا, قاراقات باشانوۆانىڭ باعىن جاندىرعان حالىقارالىق ءان دوداسى جاقىنداپ قالدى. بايقاۋ بيىل 19 جەلتوقساندا پاريجدە وتەدى.
باستى تالاپ – قاتىسۋشىلار جاسى 9 بەن 14 جاس ارالىعىندا بولۋى كەرەك. بايراقتى باسەكەدە ەلىمىزدىڭ اتىنان كىمنىڭ باق سىنايتىنى بەلگىسىز. ۇلتتىق ىرىكتەۋگە كەز كەلگەن قازاقستاندىق قاتىسا الادى. باعى مەن بابى كەلىسكەندەردى قازىلار القاسى ىرىكتەيدى. وق بويى وزىپ شىققاندى پاريج ساحناسىنا اتتاندىرادى.
جالپى, «بالالار ەۋروۆيدەنيەسى-2021» حالىقارالىق بايقاۋىنا قاتىسۋعا 819 ءوتىنىم كەلىپ تۇسكەن. ەندى قازىلار القاسى سولاردىڭ ىشىنەن ۇزدىك دەگەن 30 قاتىسۋشىنى انىقتايدى.
«Junior Eurovision» – قازاقستاندا بالالار شىعارماشىلىعىنىڭ حالىقارالىق دەڭگەيدە دامۋىنا شابىت بەرەتىن اۋقىمدى جوبا. ەكىنشىدەن, جاس ونەرپازدارعا قانات بىتىرەتىن ءدۇبىرلى دودا. ەلىمىزدە ونەرلى بالالاردىڭ كوپتىگى قۋانتادى. بۇگىندە جاس ونەرپازداردىڭ تالانتىن تانىتۋعا مۇمكىندىكتەر جەتىپ جاتىر, ينتەرنەت كەڭىستىگى دە دامىعان. سوڭعى جىلدارى ەلىمىز «بالالار ەۋروۆيدەنيەسىنەن ابىرويمەن ورالىپ ءجۇرىپ ءجۇر. وعان ەرجان ماكسيم مەن قاراقات باشانوۆانىڭ جەتىستىگى دالەل. بيىل دا وتاندىق ونەرپاز ەل نامىسىن ءتيىستى دەڭگەيدە قورعايدى دەگەن ۇمىتتەمىن», دەدى قازىلار القاسىنىڭ مۇشەسى, ەلىمىزگە تانىمال ونەر قايراتكەرى قانات ايتباەۆ.
ۇيىمداستىرۋشىلاردىڭ ايتۋىنشا, كەلەسى كەزەڭگە وتەتىن 30 قاتىسۋشىنىڭ ءتىزىمى jevision.khabar.kz سايتىندا جاريالانادى. جانە ۇمىتكەرلەرگە ونلاين داۋىس بەرۋ بۇگىن تۇنگى 00.00-دە باستالىپ, 12 قازانعا دەيىن جالعاسادى.
ايتا كەتەيىك, بيىلعى 19-شى «Junior Eurovision Song Contest» بالالار ءان بايقاۋىنا 19 ەل قاتىسادى. ولار: البانيا, ارمەنيا, ازەربايجان, بولگاريا, فرانتسيا, گرۋزيا, گەرمانيا, يرلانديا, يتاليا, قازاقستان, مالتا, نيدەرلاند, سولتۇستىك ماكەدونيا, پولشا, پورتۋگاليا, رەسەي, سەربيا, يسپانيا جانە ۋكراينا.