مەملەكەت باسشىسىنىڭ اتىنا قاراعاندى قالاسىنداعى كارديوحيرۋرگيالىق ورتالىقتا جۇرەكتەرىنە كۇردەلى وپەراتسيا جاسالعان ەمدەلۋشىلەر يا.ششەربينانىڭ, ح.جانداۋلەتوۆتىڭ جانە ر.ءتاشەنوۆتىڭ حاتتارى كەلىپ ءتۇستى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
حات اۆتورلارى ءوز وبلىستارىنداعى كارديولوگتاردىڭ باقىلاۋىندا بولعاندا ولاردان ءالدەنەشە رەت جۇرەكتەرىنە كوروناروگرافيا جانە وپەراتسيا جاساتۋ تۋرالى ۇسىنىس العاندارىن حابارلايدى. بۇرىن قازاقستاندا مۇنداي وپەراتسيالار استانا قالاسىندا عانا جاسالىپ, كۆوتاعا دەگەن كەزەكتەرىن جىلدار بويى كۇتۋگە تۋرا كەلەتىن. ونىڭ ۇستىنە مۇنداي وپەراتسيانىڭ قۇنىن تولەۋگە شاما جەتە بەرمەيتىن.
“دەنساۋلىق ساقتاۋ سالاسىنداعى رەفورمالارعا وراي كلينيكانى, دارىگەردى تاڭداۋ ءمۇمكىندىگىنە بايلانىستى بىلگەنىمىزدە مۇنداي وپەراتسيالار جۇرگىزىلىپ كەلە جاتقان قاراعاندىداعى كارديوحيرۋرگيا ورتالىعى تۋرالى انىقتاپ بىلدىك. ونىڭ ۇستىنە بۇل كلينيكاعا ەۋروپانىڭ جەتەكشى ماماندارى قامقورلىق جاسايدى ەكەن.
ءبىزدىڭ ۇلكەن قۋانىشىمىزعا وراي الدىن الا كونسۋلتاتسيالاردان كەيىن جاتاتىن كۇنىمىزدى بەلگىلەدى. ەمدەۋدى جانە زەرتتەۋدى تەگىن جۇرگىزدى.
مۇنداي جاعدايدىڭ ءوزى ءبىز ءۇشىن ءتىپتى دە قاتارداعى وقيعا ەمەس, سوندىقتان دا سىزگە بارلىق اۋرۋلاردىڭ اتىنان زور ريزاشىلىعىمىزدى ءبىلدىرىپ, حات جازباي تۇرا المادىق. قازىر بارلىعىمىزدا ءۇمىت پايدا بولدى. ويتكەنى, ءجۇرەكتىڭ يشەميالىق اۋرۋى “جاسارىپ” بارادى, ال مەديتسينالىق وپەراتسيا جاسالماسا, پاتسيەنتتەردىڭ دەنى مۇگەدەك بولىپ قالادى.
سىزگە دەنساۋلىق جانە قاراپايىم ادامدار ءۇشىن ايرىقشا قاجەت تە ماڭىزدى رەفورمالار كوپ بولسىن دەپ تىلەيمىز”, – دەلىنگەن حاتتا.