پرەزيدەنت نۇرسۇلتان نازارباەۆتىڭ جىل سايىنعى قازاقستان حالقىنا جولداۋى ءاردايىم تارتىمدىلىعىمەن, ءاردايىم كەلەشەككە قاراي اسىرا ماقتانسىز جانە ەشقانداي اسىپ-تاسۋسىز ۇمتىلىسىمەن ءارى كەڭ اۋقىمدىلىعىمەن ەرەكشەلەنەدى. قازاقستان پرەزيدەنتىنىڭ 2010 جىلعى قاڭتاردىڭ سوڭعى كۇنىندە ەلدىڭ پارلامەنتىندە جاريالاعان حالىققا جاڭا جولداۋى وسى ءسوزىمىزدىڭ ايعاعى بولىپ تابىلادى.
جولداۋدىڭ ءاربىر يدەياسىندا, ءاربىر جولىندا جانە ءاربىر تسيفرىندا كوشباسشىنىڭ ەلدىڭ ۇلتتىق دامۋىنىڭ ستراتەگياسىنا ناقتى ەسەپتەلگەن سەنىمى, تاڭداپ الىنعان كەڭ كولەمدەگى پراگماتيكالىق مەملەكەتتىك جوسپارلارى مەن جوبالارى, ەڭ ماڭىزدىسى, قازاقستان حالقىنىڭ ەل باسشىلىعى مەن ۇكىمەتىنىڭ ساياساتىن قولداۋىنا يە بولۋى ايقىن سەزىلەدى. ەڭ باستىسى, بيىلعى جىلعى جولداۋدى زەر سالا وتىرىپ وقىپ شىققانىڭىزدا, رەسۋرستارى, ينتەللەكتۋالى, ونەركاسىبى مەن عىلىمى, الەۋەتى وراسان وسىناۋ الىپ ەلدىڭ بارشا حالقىنىڭ ءومىر ءسۇرۋ ساپاسىن جاقسارۋداعى جاڭا سەرپىنگە باعىتتالعانىنا كوز جەتكىزەر ەدىڭىز. پرەزيدەنت نۇرسۇلتان نازارباەۆتىڭ جولداۋىنىڭ بارلىق تارماقتارى – جاڭا ونجىلدىققا ارنالعان مەملەكەت دامۋىنىڭ جالپىعا ورتاق ستراتەگياسى, ونىڭ ماكروەكونوميكالىق دامۋىنىڭ مىندەتى, قازاقستاندىق قوعام دامۋىنىڭ تۇراقتىلىعى جانە ونىڭ الەۋمەتتىك-ەكونوميكالىق دامۋى مەن ەلدىڭ سىرتقى ساياسي باسىمدىققا دەيىنگى جولى – ىشكى ساياسي تۇراقتىلىققا, ەتنوسارالىق تولەرانتتىلىققا, ادام ساپاسىنىڭ جوعارىلىعىنا, ورتاق قوعامنىڭ گۋمانيتارلىق دامۋىنا نەگىزدەلگەن, تەڭ مۇمكىندىككە يە يندۋستريالى ەلدىڭ دامۋىنداعى پوستكەڭەستىك قازاقستاننىڭ ناقتى وزگەرۋى يدەياسىنا تۇجىرىمدامالىق تۇرعىدا قۇرىلعان. الەمدىك قارجى-ەكونوميكالىق داعدارىستىڭ سالدارىنان تۋىنداعان قيىندىقتاردى باسىنان وتكەرگەن ۋكراينالىقتار ءۇشىن قازاقستاندى داعدارىستى جۇيەلى تۇردە قارسى العان جانە ودان ەشقانداي دا شاشاۋسىز شىققان ەل رەتىندە ءبىلىپ قانا قويماي, سونداي-اق پرەزيدەنت ن.نازارباەۆتىڭ جولداۋىندا ازىرلەنگەندەي, داعدارىستان كەيىنگى دامۋدىڭ ۇزاق مەرزىمدى ستراتەگياسىمەن تانىس بولۋ ەرەكشە قىزىقتى بولعان بولار ەدى. پرەزيدەنتتىڭ جاڭا جولداۋى ەلدىڭ ۇزاق مەرزىمگە ارنالعان باستى ماقساتى مەن باسىمدىقتارىن بەلگىلەگەن, 1997 جىلى قابىلدانعان “قازاقستان-2030” ستراتەگياسىنىڭ زاڭدى جالعاسى. نۇرسۇلتان نازارباەۆ دامۋدىڭ جاڭا كەزەڭىندەگى مىندەتتەردى ناقتىلاپ بەردى. اتاپ ايتقاندا, ولار: ۇدەمەلى يندۋستريالىق جانە ينفراقۇرىلىمدىق دامۋ ەسەبىنەن ەكونوميكالىق ورنىقتى ءوسىم, ءوسىمنىڭ يننوۆاتسيالىق ستراتەگياسى, ۇلتتىق ەكونوميكانىڭ باسەكەلەستىگىن ارتتىرۋ, بارلىق الەۋمەتتىك ولشەمدەر بويىنشا قازاقستاندىقتاردىڭ ءومىر ءسۇرۋ دەڭگەيىن ەداۋىر ارتتىرۋ, ەتنوسارالىق كەلىسىمنىڭ ساقتالۋى, سەنىمدى ۇلتتىق قاۋىپسىزدىك. وسىناۋ مىندەتتەردىڭ اۋقىمى مەن كولەمى تاڭداندىرادى: ءسوز ونداعان پايىزدىق ءوسىم تۋرالى بولىپ وتىر! الايدا, قازاقستاننىڭ وتكەن ون جىلداعى دامۋىنا كوز جىبەرسەڭىز, پرەزيدەنتتىڭ جوسپارى – تەك قۇرعاق ءسوز ەمەس, عىلىمي نەگىزدەلگەن, قازاقستان حالقى سەنەتىن ءارى قولدايتىن ستراتەگيالىق دامۋدىڭ پراگماتيكالىق باعدارلاماسى ەكەنىن تۇسىنەسىز. قازاقستاننىڭ مۇنداي ساياساتى ونىڭ وڭىرلىك جانە الەمدىك ساياساتتاعى جانە ساۋدا-قارجى سالاسىنداعى حالىقارالىق دەڭگەيدە بەدەلى دە ىقپالدى ويىنشى بولۋىن قامتاماسىز ەتتى. پرەزيدەنت نازارباەۆتىڭ جىل سايىنعى حالىققا جولداۋىنداعى “سىرتقى ساياسات” اتتى تاراۋىنىڭ كۇشى كوپتەگەن مەملەكەتتەردىڭ استانالارىندا تىڭعىلىقتى زەرتتەلدى دەگەن سەنىمدەمىن. قازاقستاننىڭ 2010 جىلى بۇرىن كەڭەستەر وداعىنىڭ قۇرامىندا بولعان ورتالىق ازيا ەلدەرىنىڭ تاريحىندا تۇڭعىش رەت ەقىۇ-عا توراعا بولۋى تاڭداندىرماي قويمايدى. قازاقستاننىڭ توراعالىعى – ەلدىڭ تاۋەلسىزدىك العان 18 جىلدىق تاريحىنداعى مىقتى ەكونوميكاسى مەن دەموكراتيالىق مەملەكەتتىڭ قارقىندى دامۋىنداعى تابىسىنىڭ شىنايى كورىنىسى. قازاقستان پرەزيدەنتى ۇلتتىق مۇددەنى قامتاماسىز ەتۋ, ەلدىڭ حالىقارالىق بەدەلىن ارتتىرۋ جانە ۇلتتىق, وڭىرلىك جانە جاھاندىق قاۋىپسىزدىكتى نىعايتۋ جولىنداعى جۇرگىزىپ وتىرعان بەلسەندى جانە بايىپتى سىرتقى ساياساتى حالىقارالىق قاۋىپسىزدىكتەگى نەگىزگى ماسەلەلەر بويىنشا, سونداي-اق ەقىۇ-نى دامىتۋ ماسەلەلەرى جونىندەگى كونسەنسۋستىق الاڭدى كەڭەيتۋگە جانە نىعايتۋعا سايكەس كەلەتىنىنە ەش كۇمان جوق. ۋكراينا قازاقستانمەن دوستىقتى جانە ىنتىماقتاستىقتى نىعايتۋعا ستراتەگيالىق تۇرعىدا ءمان بەرەتىنىن اتاپ وتكىم كەلەدى. بۇل سوزىمە ۋكراينا پرەزيدەنتى ۆ.يانۋكوۆيچتىڭ ۇستىمىزدەگى جىلعى 7 ساۋىردە قازاقستانعا جاساعان رەسمي ساپارى, ونىڭ بارىسىندا بىرقاتار نەگىزگى ەكى جاقتى قۇجاتتارعا قول قويىلۋى جانە ۇزاق مەرزىمدى كەزەڭگە ارنالعان ىنتىماقتاستىقتىڭ جوسپارى بەلگىلەنگەنى ايقىن دالەل بولا الادى. قازاقستان مەن ۋكراينا اراسىنداعى ىنتىماقتاستىقتىڭ ماڭىزىن ەكونوميكالىق قارىم-قاتىناستار, تۇراقتى قۇرىلىم سيپاتى مەن وڭ قارقىندى ءوسىم قۇرايدى. 2008 جىلى قازاقستان مەن ۋكراينا اراسىنداعى تاۋار اينالىمىنىڭ كولەمى 5 ميلليارد دوللاردان استى. 2009 جىلى, الەمدىك قارجى داعدارىسىنا قاراماستان, ءوزارا ءتيىمدى ساۋدا كورسەتكىشى 3,4 ميلليارد دوللاردى قۇرادى جانە قازاقستان ۋكراينانىڭ نەگىزگى ساۋدا ارىپتەستەرىنىڭ اراسىندا 3-4 ۇستانىمدا نىق تۇرعانىن اتاپ وتپەكپىز. ۋكراينا-قازاقستان ەكونوميكالىق ىنتىماقتاستىعى باسىمدىعىنىڭ تولىق ءتىزىمىن وتىن-ەنەرگەتيكا كەشەنى, قازاقستان مەن ەۋروپادان مۇناي مەن گازدى جەتكىزۋدى كوزدەيتىن كولىك تاسىمالى, قارا تەڭىزدە ۋكراينالىق تەڭىز ايلاعىن پايدالانۋعا قازاقستاندىق كومپانيالاردىڭ قاتىسۋى جانە ازيا-تىنىق مۇحيتى وڭىرىنە ارنالعان رىنوكقا شىعۋ ءۇشىن ۋكراينانىڭ كولىكتىك مۇمكىندىكتەرى, ءبىزدىڭ ەلدەرىمىز اراسىنداعى, سونىڭ ىشىندە اەروعارىش سالاسىنداعى عىلىمي-تەحنيكالىق ىنتىماقتاستىق بويىنشا بايلانىستار قۇرايدى. وسى ورايدا, ۋكراينا-قازاقستان پارلامەنتارالىق بايلانىستارىن ەرەكشە اتاپ وتكىم كەلەدى. ەكى ەلدىڭ پارلامەنتى ءۇشىن حالىقارالىق پروبلەمالار مەن ەكى جاقتى بارلىق سپەكتر بويىنشا سىندارلى پىكىر الماسۋلار داستۇرگە اينالدى جانە ەكى ەلدىڭ زاڭ شىعارۋشىلىق بيلىگىندەگى ءوزارا تۇسىنىستىكتىڭ ماڭىزدىلىعى ۋكراينا مەن قازاقستاننىڭ تاتۋ كورشىلەستىك قارىم-قاتىناستارىنىڭ بارلىق جۇيەسىن تولىقتىرادى ءارى بايىتادى, تمد كەڭىستىگىندەگى تۇراقتىلىق پەن قاۋىپسىزدىك مۇددەسىنە قىزمەت ەتەدى. قازاقستان پرەزيدەنتىنىڭ جاڭا جولداۋىن وقي وتىرىپ, نۇرسۇلتان نازارباەۆتىڭ: ء“بىز نە, قاشان, قالاي جاسالاتىنىن جانە قۇرىلاتىنىن ءىس جۇزىندە ايلار بويىنشا بىلەمىز”, دەگەن سوزىنە سەنەسىز. وسى ۇلى ەلدىڭ ساياسي كوشباسشىسى مەن ونىڭ ۇكىمەتىنىڭ حالىقتىڭ قولداۋىنا سۇيەنگەن سەنىمى, ونىڭ پروگرەسكە ۇمتىلىسى – دوستاس قازاقستان ەش كۇمانسىز تاۋەلسىز, وركەندەگەن, تۇراقتى مەملەكەت قۇراتىنىنىڭ كەپىلى. ۆلاديمير ليتۆين, ۋكراينا جوعارى راداسىنىڭ توراعاسى.