الماتىدا 28-پانفيلوۆشىلار پاركىندە اۋىل شارۋاشىلىعى مينيسترلىگىندە قىزمەت ەتكەن سوعىس جانە تىلداعى ەڭبەك ارداگەرلەرىنە ارنالعان جيىندا وتان ءۇشىن وت كەشكەندەردىڭ قايتپاس قايسارلىعى جونىندە كەڭىنەن ءسوز بولدى. سالتاناتتى جيىنعا اۋىل شارۋاشىلىعى ءمينيسترى اقىلبەك كۇرىشباەۆ, مينيسترلىكتىڭ ورمان جانە اڭشىلىق شارۋاشىلىعى كوميتەتىنىڭ توراعاسى ەرلان نىسانباەۆ قاتىسىپ, ارداگەرلەردى ۇلى جەڭىستىڭ 65 جىلدىعىمەن قۇتتىقتادى.
اۋىل شارۋاشىلىعى مينيسترلىگىنىڭ الماتى قالاسى بويىنشا اۋماقتىق ينسپەكتسياسىنىڭ باستىعى سالامات بەكتەمىسوۆتىڭ ۇيىمداستىرۋمەن وتكەن جيىندا ارداگەرلەرگە ءبىرىنشى, ەكىنشى جانە ءۇشىنشى دارەجەلى ءتوس بەلگىلەر مەن اقشالاي سىيلىقتار تاپسىرىلدى. مۇنداي قۇرمەتكە يە بولعاندار اراسىندا بۇگىندە جاستارى توقساننان اسقان, ستالينگراد شايقاسىنا قاتىسقان ۆاسيلي كوسەنكو, ستانيسلاۆ گولوۆاتسكي, ۆلاديمير بۋبنوۆ سياقتى سوعىس ارداگەرلەرى جانە باسقالار بار. مادىكەن قۇسپانوۆ, يليا نۇروۆ, بايان جۇماشەۆ, سونداي-اق وزگە دە تىل ەڭبەككەرلەرى وسىنداي سىيلىققا يە بولدى. جالپى سانى قىرىقتان استام سوعىس جانە تىل ارداگەرلەرىن قۇتتىقتاۋ راسىمىنەن كەيىن, قۇرمەتتى قوناقتارعا ارنالىپ “جۇلدىز” مەيرامحاناسىندا مەرەكەلىك داستارقان جايىلدى. اتاقتى انشىلەر اسقاقتاتا ءان سالىپ, بيشىلەر مىڭ بۇرالىپ بي بيلەدى.
باقىت بالعارينا. الماتى.
ۇلى جەڭىسكە ارنالدى
ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ قارجى پوليتسياسى اكادەمياسىندا ۇلى وتان سوعىسىنداعى جەڭىسكە 65 جىل تولۋىنا ارنالعان ء“ححى عاسىردا جاستاردى پاتريوتتىق تاربيەلەۋدىڭ وزەكتى ماسەلەلەرى” اتتى رەسپۋبليكالىق عىلىمي-پراكتيكالىق كونفەرەنتسيا بولىپ ءوتتى.
كونفەرەنتسياعا اتالعان اگەنتتىك پەن اكادەميا قىزمەتكەرلەرىمەن قاتار, ۇلى وتان سوعىسىنىڭ ارداگەرلەرى, “نۇر وتان” حدپ جانە جەرگىلىكتى اتقارۋ ورگاندارىنىڭ وكىلدەرى, عالىمدار قاتىستى. شارانىڭ اشىلۋ سالتاناتىندا سويلەگەن ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى توراعاسىنىڭ ورىنباسارى س.اشىمباەۆ بۇل جەڭىس اتالارىمىز بەن اعالارىمىزدىڭ, اپالارىمىزدىڭ ءبىزدىڭ قازىرگى جانە بولاشاق ءومىرىمىز ءۇشىن وتان قورعاۋداعى جان بەرىپ, جان الىسىپ, ايانباي كۇرەسكەن ەرلىگى. سول ءۇشىن دە ءبىز ولارعا باس ءيىپ, قۇرمەت كورسەتەمىز. وسى ورايدا ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى قارجى پوليتسياسى اكادەمياسىنا ۇلى وتان سوعىسىنىڭ باتىرى, حالىق قاھارمانى راقىمجان قوشقارباەۆتىڭ ەسىمىن بەرۋ تۋرالى جۇمىستاردى جۇرگىزىپ جاتىر. مۇنداعى نەگىزگى ماقسات سىبايلاس جەمقورلىققا قارسى كۇرەس ءجۇرگىزەتىن جاستاردى وقىتىپ شىعاراتىن اكادەميانىڭ بەدەلىن ودان ءارى اسقاقتاتىپ, وتانى ءۇشىن, ەلى ءۇشىن, ادالدىق پەن ادىلدىك ءۇشىن كۇرەسەتىن ناعىز قايسار دا قايتپاس مامانداردى دايارلاۋ دەدى.
كونفەرەنتسيا جۇمىسىنا كەلگەندەر, ەڭ الدىمەن, اكادەميانىڭ قۇرمەت اللەياسىنداعى ۇلى وتان سوعىسىنىڭ باتىرلارىنا ارنالعان ەسكەرتكىشكە سالتاناتتى تۇردە گۇل شوقتارىن قويىپ, سوعىستا قازا تاپقان ەسىل ەرلەردى ءبىر ءمينوت ۇنسىزدىكپەن ەسكە الدى. ونان سوڭ اكادەميا تىڭداۋشىلارى الاڭدا سالتاناتتى شەرۋمەن ءجۇرىپ ءوتىپ, جەكپە-جەك كۇرەسى مەن قويان-قولتىق ۇرىس ءتاسىلدەرىنىڭ نەبىر تۇرلەرىن كورسەتتى. ارداگەرلەر مەن قوناقتاردىڭ نازارىنا ۇلى وتان سوعىسىنداعى وقيعالارعا قاتىستى جازىلعان تىڭ كوركەم ادەبي دۇنيەلەر مەن تاريحي قۇجاتتار جانە سول كەزدىڭ ناق ءوزىن بوياماسىز بەينەلەيتىن سۋرەتتەر كورمەسى ۇسىنىلدى. كونفەرەنتسيا بارىسىندا وعان قاتىسۋشىلار ۇلى وتان سوعىسىنىڭ قاسىرەتى مەن ناتيجەلەرىن ەسكە الا وتىرىپ, بۇگىنگى وسكەلەڭ جاستاردى پاريوتتىق تاربيەلەۋدىڭ وزەكتى ماسەلەلەرىن تالقىعا سالدى.
– ۇلى وتان سوعىسىنداعى جەڭىسكە 65 جىل تولۋ قارساڭىندا ءوتىپ جاتقان بۇل كونفەرەنتسيا بىزدەرگە اعا ۇرپاقتىڭ كورسەتكەن ەرلىگىن ۇمىتپاي, ەلىمىزگە قىزمەت ەتۋدە ءبىر كىسىدەي بىرلىك پەن تاتۋلىقتا بولۋعا, قوعامىمىزعا قاۋىپ توندىرەتىن جەمقورلارمەن كۇرەس جولىن جەتىك وقىپ ۇيرەنۋگە, حالىققا جان اياماي ەڭبەك ەتە بىلۋگە جەتەلەيدى, – دەيدى بىزبەن اڭگىمەلەسكەن اكادەميانىڭ ەكىنشى كۋرس تىڭداۋشىسى نۇرداۋلەت وتەباەۆ.
الەكساندر تاسبولاتوۆ.