قوستاناي وبلىسىندا بىرنەشە شەنەۋنىك كاسىپكەرلەردى زاڭسىز تەكسەرگەنى ءۇشىن زاڭ الدىندا جاۋاپ بەرەتىن بولدى. بىلتىر مەملەكەت باسشىسى قاسىم-جومارت توقاەۆتىڭ باستاماسىمەن شاعىن جانە ورتا بيزنەس نىساندارىن تەكسەرۋگە ءۇش جىلعا دەيىن موراتوري جاريالانعانىنا قاراماستان, سارىكول اۋدانىنىڭ مەملەكەتتىك قىزمەتشىلەرى سول وڭىردە قوقىس پوليگونىن ۇستايتىن «تازالىق-سارىكول» سەرىكتەستىگىنە تەكسەرىس جورىعىن جيىلەتىپ جىبەرگەن.
مەزگىلسىز كەلىپ, بەرەكەسىن العان شەنەۋنىكتەردەن مەزى بولعان سەرىكتەستىك باسشىسى سارىكول اۋداندىق پروكۋراتۋراسى جانىنداعى كاسىپكەرلەر قۇقىعىن قورعاۋ جونىندەگى ءموبيلدى توپقا شاعىمدانادى. پروكۋراتۋرا مەن كاسىپكەرلەر پالاتاسىنىڭ وكىلدەرىنەن قۇرالعان ءموبيلدى توپ تەكسەرىستىڭ زاڭسىز ۇيىمداستىرىلعانىن انىقتاپ, كىنالىلەردى اكىمشىلىك جاۋاپكەرشىلىككە تارتىپ وتىر.
– وسى جىلعى 3 ماۋسىمدا, 1 شىلدەدە جانە 3 تامىزدا اتالعان پوليگوندى تەكسەرۋ بارىسىندا تولتىرىلعان كوميسسيالىق تەكسەرىس حاتتامالارى زاڭسىز دەپ تانىلدى. سارىكول اۋدانىنىڭ پروكۋرورى كاسىپكەرلىك نىساننىڭ ىسىنە زاڭسىز ارالاسقانى ءۇشىن اۋداندىق اكىمدىككە قاراستى ساۋلەت, قۇرىلىس, تۇرمىستىق-كوممۋنالدىق شا- رۋاشىلىق, جولاۋشىلار كولىگى جانە اۆتوموبيل جولدارى ءبولىمىنىڭ باسشىسى مەن سارىكول اۋىلىنىڭ اكىمىن اكىمشىلىك قۇقىق بۇزۋشىلىق تۋرالى كودەكسىنىڭ 173-بابى بويىنشا اكىمشىلىك جاۋاپكەرشىلىككە تارتىپ وتىر, – دەپ مالىمدەدى وبلىستىق كاسىپكەرلەر پالاتاسى باسشىسىنىڭ ورىنباسارى دانيار كۇزەنباەۆ.
بۇل باپ بويىنشا كاسiپكەرلiك قىزمەتكە زاڭسىز ارالاسىپ, ولاردىڭ قىزمەتiنە كەدەرگi كەلتiرەتiن زاڭسىز حاتتاما تولتىرعان لاۋازىم يەلەرى ەندى 100 ايلىق ەسەپتiك كورسەتكiش مولشەرiنە دەيىن ايىپپۇل ارقالاماق.
اتالعان شەنەۋنىكتەرمەن بىرگە مەملەكەتتىك كىرىستەر باسقارماسىنىڭ سارىكول اۋدانىنداعى باس مامانى دا جاۋاپكەرشىلىككە تارتىلىپ وتىر. وعان اقب كودەكسىنىڭ 175-بابى بويىنشا جەكە كاسىپكەرلىك نىساندارىنا تەكسەرۋ جۇرگىزۋ ءتارتىبىن بۇزعانى ءۇشىن 25 ايلىق ەسەپتىك كورسەتكىش مولشەرىندە ايىپپۇل سالىنۋى مۇمكىن.
ايتا كەتۋ كەرەك, كاسىپكەرلەر قۇقىعىن قورعاۋ جونىندەگى ءموبيلدى توپتار بيىلعى 4 قىركۇيەكتەن باستاپ جاڭا وكىلەتتىككە يە بولىپ وتىر. اتاپ ايتقاندا, «پروكۋراتۋرا تۋرالى» زاڭعا ەنگىزىلگەن تۇزەتۋلەرگە سايكەس ەندى پروكۋرورلار وزدەرىنە شاعىمدانعان كاسىپكەرلەردىڭ ءىسى بويىنشا دەربەس تەكسەرۋ جۇرگىزىپ, ءىستىڭ اق-قاراسىن انىقتاۋ ماقساتىندا اقپارات سۇراستىرىپ, زاڭسىز قولدانىلعان شەكتەۋ نەمەسە تىيىم شارالارىنىڭ كۇشىن جويا الادى.
قوستاناي وبلىسى