30 قىركۇيەكتە قازاقستان پرەزيدەنتى قاسىم-جومارت توقاەۆ پەن رەسەي پرەزيدەنتى ۆلاديمير پۋتين كوكشەتاۋ قالاسىندا ونلاين-فورماتتا وتەتىن ەكى ەل اراسىنداعى XVII وڭىرارالىق ىنتىماقتاستىق فورۋمىنا قاتىسادى. بۇل تۋرالى مەملەكەت باسشىسىنىڭ ءباسپاسوز حاتشىسى بەرىك ءۋالي حابارلادى, دەپ جازالدى Egemen.kz.
فورۋم اياسىندا مەملەكەت باسشىلارىنىڭ ونلاين-فورماتتاعى كەزدەسۋى جوسپارلانعان. وندا قازاقستان مەن رەسەي اراسىنداعى ستراتەگيالىق سەرىكتەستىكتىڭ باسىم باعىتتارى تالقىلانباق.
فورۋم بيىل «ەكولوگيا جانە «جاسىل ەكونوميكالىق» ءوسىم سالالارىنداعى ىنتىماقتاستىق» تاقىرىبى اياسىندا وتەدى.
ءىس-شارا – ەكى مەملەكەت اراسىنداعى ىقپالداستىقتىڭ پەرسپەكتيۆتى باعىتتارىن تالقىلاۋ, ەكىجاقتى قاتىناستاردى نىعايتۋ, ىسكەرلىك توپتاردىڭ بايلانىسىن جانە مەملەكەتتىك ورگان مەن بيزنەس وكىلدەرىنىڭ قارىم-قاتىناسىن جانداندىرۋ ءۇشىن ءتيىمدى الاڭ. جيىنعا قاتىسۋشىلار ترانسشەكارالىق سۋ رەسۋرستارىن باسقارۋ, كليماتتىڭ وزگەرۋى مەن كومىرتەگىنەن ارىلۋ, سونداي-اق جانۋارلار مەن وسىمدىكتەر الەمىن قورعاۋ تۋرالى ماسەلەلەردى تالقىلايدى.
فورۋم سوڭىندا بىرقاتار قۇجاتقا قول قويۋ جوسپارلانعان.