حالىق ساناعى مەملەكەتتىك دەرەكتەر بازاسىنداعى كەيبىر ماسەلەلەردى انىقتاۋعا مۇمكىندىك بەردى. بۇل تۋرالى بريفينگتە ۇلتتىق ستاتيستيكا بيۋروسىنىڭ باسشىسى نۇربولات ايداپكەلوۆ مالىمدەدى.
«حالىق ساناعىن وتكىزۋ بارىسىندا ازاماتتارعا قاتىستى بىرقاتار مالىمەتتەردەن قاتە كەتكەنى بەلگىلى بولدى. ساناقتان وتكەندەر ساۋالداما تولتىرۋدىڭ باستاپقى كەزەڭىندە كەيبىر جولداردىڭ اۆتوماتتى تۇردە تولتىرىلاتىنىن اڭعارعان بولار. بۇل – اتى-ءجونى, جىنىسى جانە مەملەكەتتىك دەرەكتەر بازاسىنان الىناتىن باسقا دا اقپاراتتار», دەپ اتاپ ءوتتى ول.
ونىڭ ايتۋىنشا, ءتورت ەر ادام دەرەكتەر بازاسىندا ايەل رەتىندە كورسەتىلگەن. ال ءۇش ايەل ەركەك رەتىندە كورسەتىلىپ تۇرعان.
«بۇل ادامدارعا ستاتۋستارىن وزگەرتۋ ءۇشىن حالىققا قىزمەت كورسەتۋ ورتالىقتارىنا جۇگىنۋگە كەڭەس بەرىلدى», دەپ قورىتىندىلادى ءوز ءسوزىن بيۋرو باسشىسى.
«ەگەمەن-اقپارات»