مادەنيەت جانە سپورت مينيسترلىگىنىڭ قولداۋىمەن ەلىمىزدە العاش رەت مەملەكەتتىك الەۋمەتتىك تاپسىرىس شەڭبەرىندە «جاس قالامگەر» وقىتۋ مەكتەبى ءوز جۇمىسىن باستادى.
الەۋمەتتىك جوبا وقۋ ساۋاتتىلىعىن ارتتىرۋ, جاس دارىنداردىڭ تانىمدىق-شىعارماشىلىق بەلسەندىلىگىن دامىتۋدى ماقسات ەتىپ وتىر.
باستامانى «قازاقستاننىڭ جاستار كونۆەنتى» قورى جۇزەگە اسىرادى. الداعى ۋاقىتتا وقىتۋ مەكتەپتەرىندە ەلورداداعى ورتا جانە ارناۋلى ورتا وقۋ ورىندارىنىڭ 10-18 جاس ارالىعىنداعى دارىندى بالالارى ادەبيەت سالاسىنىڭ دراماتۋرگيا, پوەزيا, پروزا باعىتى مەن «عىلىم تاپ = Find science» (اباي شىعارمالارىن اعىلشىن تىلىندە وقىتۋ), «ولەڭگە اركىمنىڭ-اق بار تالاسى» اتتى تاقىرىپتار بويىنشا ءدارىس الادى.
وسى ورايدا 8 قىركۇيەك كۇنى نۇر-سۇلتان قالاسىنداعى اباي قۇنانباي ۇلى اتىنداعى №87 مەكتەپ-گيمنازياسىندا جوبانىڭ رەسمي اشىلۋ ءراسىمى ءوتىپ, وعان ۇستازدار مەن وقۋشىلار, اتا-انالار قاتىستى.
وقىتۋ مەكتەبىنە قاتىسۋشى بالالارعا اقىن نەسىپبەك ايت ۇلى, جازۋشى-دراماتۋرگ, مەملەكەتتىك سىيلىقتىڭ لاۋرەاتى روزا مۇقانوۆا, اقىن, فيلولوگيا عىلىمدارىنىڭ دوكتورى جانات اسكەربەكقىزى, فيلولوگيا عىلىمدارىنىڭ كانديداتى, ايتىسكەر-اقىن سەرىكزات دۇيسەنعازى, ابايتانۋشى-جۋرناليست ەرنات مەلس ۇلى جانە تاعى باسقا اقىن-جازۋشىلار ءدارىس وقيدى.
جوبا اياسىندا بيىل 10 تامىز بەن 5 قىركۇيەك ارالىعىندا قابىلدانعان وتىنىشتەر ناتيجەسىندە جوباعا 200-گە جۋىق بالا قاتىساتىنى بەلگىلى بولدى. وقىتۋ مەكتەبى 8-20 قىركۇيەك ارالىعىندا وتەدى.