پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىنا قوستاناي وبلىسى اكىمىنىڭ ورىنباسارى ەرلان سپانوۆ, سونداي-اق ءوڭىردىڭ باس مەملەكەتتىك سانيتارلىق دارىگەرى ەرمۇحانبەت داۋلەتباەۆ پەن وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى رۇستەم ايتباەۆ قاتىسىپ, ايماقتىڭ ەپيدەميالىق جاعدايى مەن ىندەتتىڭ تارالىم اياسىن تارىلتۋ باعىتىندا اتقارىلىپ جاتقان شارالار تۋرالى باياندادى.
ە.سپانوۆتىڭ ايتۋىنشا, پاندەميا باستالعالى قوستاناي وبلىسىندا 31 492 كوروناۆيرۋس جۇقتىرۋ جاعدايى تىركەلگەن. قازىر 21 ينفەكتسيالىق ستاتسيوناردا 607 ادام ەمدەلىپ جاتىر. ەپيدەميالىق احۋال كۇردەلەنگەن جاعدايدا, ەمدەۋ مەكەمەلەرىندەگى كەرەۋەت سانىن 3 مىڭعا دەيىن ارتتىرۋعا مۇمكىندىك بار. كارانتين تالاپتارىنىڭ ساقتالۋىن قامتاماسىز ەتۋ ماقساتىندا موبيلدىك توپتاردىڭ جۇمىسى جالعاسۋدا. تەكسەرۋ توپتارى بيىل تامىزدىڭ بىرىنەن باستاپ 2 مىڭنان استام رەيد شارالارىن وتكىزىپ, شەكتەۋ ءتارتىبىن بۇزعان 206 كاسىپورىندى انىقتاعان. بۇگىنگە دەيىن ءوڭىر تۇرعىندارىنىڭ 61%-دان استامى ۆاكتسينانىڭ ءبىرىنشى سىڭارىن, ال 53 پايىزدان استامى ەكىنشى سىڭارىن قابىلداعان. ايماقتا «اشىق» جوباسىنا قاتىسۋ ءۇشىن 4 819 ءوتىنىم قابىلدانىپ, ولاردىڭ 4 719-ى QR-كود الدى. تامىز ايىنان باستاپ ەسەپتەگەندە, توبىل-تورعاي وڭىرىندە 1 978 نىسان «اشىق» جوباسىنا تىركەلگەن.
ە.داۋلەتباەۆ ءتۇسىندىرۋ جۇمىستارىنىڭ ناتيجەسىندە وڭىردە سوڭعى ەكى جەتى بويى ىندەت جۇقتىرۋ جاعدايى تۇراقتى تۇردە تومەندەپ كەلە جاتقانىن جەتكىزدى.
– بۇگىندە مەديتسينا قىزمەتكەرلەرى مەن مۇعالىمدەردىڭ, كۇش قۇرىلىمدارى قىزمەتكەرلەرىنىڭ 95 پايىزدان استامى ۆاكتسينا قابىلدادى. وڭىردە تىركەلگەن ناۋقاستاردىڭ 97 پايىزى – كوروناۆيرۋس ينفەكتسياسىنا قارسى ۆاكتسينا قابىلداماعاندار, – دەدى ە.داۋلەتباەۆ.
قوستاناي وبلىسى ەپيداحۋالدىق كورسەتكىشى بويىنشا ءالى دە «قىزىل ايماقتا» جاتقاندىقتان, وڭىردەگى كوپتەگەن نىسان تولىققاندى جۇمىس ىستەي الماي وتىر. ولارعا ەڭ الدىمەن نىسانعا كىرەتىن ادامداردىڭ سانىن شەكتەۋ, بەلگىلەنگەن اراقاشىقتىقتى ساقتاۋ, جۇمىس ۋاقىتىن قىسقارتۋ, ماسكا رەجىمىن, سانيتارلىق تازالىقتى ساقتاۋ سياقتى تالاپتار قويىلىپ وتىر. وڭىردە «اشىق» جوباسىنا قاتىسىپ جاتقان نىسانداردىڭ دەمالىس جانە مەرەكە كۇندەرى جۇمىس ىستەۋىنە, جۇمىس ۋاقىتىن ۇزارتۋىنا رۇقسات بەرىلگەن.
ءباسپاسوز جيىنى بارىسىندا ر.ايتباەۆ ايماقتاعى ەمدەۋ مەكەمەلەرىنىڭ ءدارى-دارمەكپەن جەتكىلىكتى تۇردە قامتاماسىز ەتىلگەنىن ايتتى.
– وبلىستاعى ءدارىحانالار مەن ستاتسيونارلاردا ءدارى-دارمەك پەن جەكە قورعانىش قۇرالدارىنىڭ ەكى ايلىق قورى بار. جوعارى سۇرانىسقا يە دارىلەر دە جەتكىلىكتى. ءبىز قازىر تاۋلىگىنە 2 جارىم مىڭعا دەيىن تەستىلەۋ, زەرتتەۋ جۇمىستارىن جۇرگىزە الامىز. ارقالىق قالاسىندا تاۋلىگىنە 300 تەستىلەۋ جۇرگىزەتىن زەرتحانا اشىلعان. بۇل وبلىستىڭ وڭتۇستىك اۋداندارىنداعى تۇرعىنداردى تەستىلەۋ ماسەلەسىنىڭ شەشىلۋىنە مۇمكىندىك بەرىپ وتىر. بۇگىندە وبلىستا بارلىعى 190 ستاتسيونارلىق جانە جىلجىمالى ەكپە پۋنكتتەرى جۇمىس ىستەپ جاتىر. مۇنىڭ سىرتىندا حالىق كوپ جينالاتىن قوعامدىق ورىنداردا دا ۆاكتسينالاۋ ورىندارىن اشىپ قويدىق. بۇگىنگە دەيىن وبلىسقا كوروناۆيرۋسقا قارسى ۆاكتسينانىڭ 381 535 دوزاسى جەتكىزىلدى, – دەدى باسقارما باسشىسى.
وبلىس تۇرعىندارىن ەرىكتى تۇردە جاپپاي ۆاكتسينالاۋ شارالارىنا ارنايى دايىندىق كۋرسىنان وتكەن 426 مەديتسينا قىزمەتكەرى تارتىلعان.
قوستاناي