تورتكۇل دۇنيەنى ءتاجتاجال جايلاعالى تۇرمىستان تارىلعان ەلدىڭ جاعدايىنا بەيجاي قارامايتىن كاسىپكەرلەر ءتۇرلى الەۋمەتتىك جوبالاردى قولعا الىپ, شاماسى جەتكەنشە شاراپاتتى ىسپەن اينالىسۋعا بەت بۇرا باستادى. قولىنان ءىس كەلەتىن مۇنداي ازاماتتارعا مەملەكەت تە كومەگىن اياپ وتىرعان جوق. كاسىپكەرلىكتى دامىتۋ ينستيتۋتتارى ارقىلى قوماقتى قارجى گرانتتارىن ءبولىپ جاتىر.
ماسەلەن, قوستاناي وبلىسىندا بيىل «باستاۋ-بيزنەس» جوباسىنا قاتىسۋشىلاردىڭ ءبىرازى بيزنەس پەن قايىرىمدى ءىستى ۇشتاستىرۋدى كوزدەپ وتىر. سولاردىڭ ءبىرى – سارىكول اۋىلىنىڭ 25 جاستاعى تۇرعىنى نۇرجان باقىتكەرەەۆ. جاس كاسىپكەر قايىرىمدىلىق شارالارىن ۇيىمداستىرۋمەن 19 جاسىنان باستاپ اينالىسا باستاعان. بۇعان دەيىن نۇرجان ەلگە جاناشىر اۋىلداستارىنىڭ باسىن قوسىپ, قارجى جيناپ, اۋىر دەرتكە شالدىققان سابيلەردىڭ ەمىنە ءدارى-دارمەگىن, تۇرمىسى تومەن وتباسىلاردىڭ ازىق-ت ۇلىگى مەن كيىمىن الىپ بەرۋ سياقتى شاراپاتتى مول قايىرىمدى ىسپەن اينالىسىپ كەلگەن. نۇرجان باقىتكەرەەۆ تاياۋدا كومەككە مۇقتاج جانداردى بارىنشا كوبىرەك قامتۋ ماقساتىندا سارىكول اۋىلىندا الەۋمەتتىك اسحانا اشتى. مۇندا اۋدان ورتالىعىندا تۇراتىن تۇرمىسى تومەن ادامدار بەلگىلەنگەن كەستە بويىنشا ەكى مەزگىل تەگىن تاماقتانادى.
قايىرىمدى كاسىپكەر يگى باستاماسىن جۇزەگە اسىرۋ ءۇشىن «باستاۋ بيزنەس» جوباسىنا قاتىسىپ, ءبىلىمىن جەتىلدىرىپ, ءوزى جاساعان بيزنەس جوبانى قورعاپ شىققان. الەۋمەتتىك باعىتتاعى باستامانىڭ ءساتتى ستارتاپ جوباعا اينالۋىنا قوستاناي وبلىسى كاسىپكەرلەر پالاتاسىنىڭ بىلىكتى بيزنەس-ترەنەرى گۇلسىن ابدۋللينا كومەكتەسىپتى. ناتيجەسىندە, جوبا مەملەكەت تاراپىنان قولداۋ تاۋىپ, جاس كاسىپكەر وزىنە قاجەت گرانت قارجىسىنا يە بولعان.
– گرانتپەن بولىنگەن 583 مىڭ 400 تەڭگەگە اس ۇيگە ارنالعان جابدىق ساتىپ الدىم. جۇمىسشى تابۋ ماسەلەسى دە وڭاي شەشىلدى, وزبەك اسحاناسىنىڭ قىر-سىرىن جاقسى مەڭگەرگەن شەبەر اسپاز جولىقتى. ەندى ءۇي-جايدى رەتكە كەلتىرۋ عانا قالدى. جوندەۋ جۇمىستارىنا دەمەۋشى قاراجات بەرەمىن دەپ ۋادە بەردى. بىزدە يگى ىسكە جاناشىرلىق تانىتىپ, كومەك بەرۋگە دايىن ازاماتتار كوپ, – دەدى نۇرجان.
جاس كاسىپكەردىڭ ەندىگى ماقساتى – اسحانا بيزنەسىن دامىتا وتىرىپ, قايىرىمدىلىق شارالارىن ۇيىمداستىرۋدى جالعاستىرۋ. ءوزىنىڭ ايتۋىنشا, جاڭا اشىلعان اسحانا اقىلى جانە تەگىن تۇردە ەكى باعىتتا جۇمىس ىستەيتىن بولادى. مۇقتاج جاندار ءۇشىن تەگىن تاماقتانۋ كەستەسى بەكىتىلىپ, تۇسكەن تابىستىڭ ءبىر بولىگى قايىرىمدىلىققا جۇمسالىپ وتىرادى.
– قازىردىڭ وزىندە ءبىز كوپشىلىكتىڭ كۇشىمەن 3-4 وتباسىن اي سايىن ازىق-ت ۇلىكپەن قامتاماسىز ەتۋدەمىز. اسحانادان تۇسكەن تابىستان باسقا دا وتباسىلارعا ۇلەس ءبولىپ, مۇمكىندىگىنشە كومەك بەرىپ وتىرامىز. بىزگە اۋىر دەرتكە ۇشىراعان بالالاردىڭ اتا-انالارى ءجيى كەلەدى. ولار كوبىنە قىمبات وتا جاساتۋعا قاجەت قاراجات سۇرايدى. مۇنداي جاعدايدا كوپشىلىكتەن جىلۋ سۇراپ, قولىمىزدان كەلگەنشە كومەك جاسايمىز, – دەيدى جاس كاسىپكەر.
نۇرجان باقىتكەرەەۆ قولعا العان قايىرىمدىلىق شارالارىنا جۇبايى مەن سارىكول مەشىتىنىڭ جاماعاتى تۇراقتى قولداۋ كورسەتىپ كەلەدى.
قوستاناي وبلىسى