كوپ ىشىندەگى جالعىزدىق

قازىر كۇز, سودان با سارعايعان جاپىراق الاقانىنا ۇيا سالعان تامشىنىڭ تاعدىرىنداي تال­كەك, سۇلۋدىڭ كوز جاسىنداي اۋىر ويلارعا يەك سۇيەيمىز. ەرتەرەكتە دە سولاي بولعان, كەلەسى كۇزدە دە سولاي بولۋعا ءتيىستى. نەگە دەيسىز عوي, ونىڭ جاۋابىن سيقىرلى سۋرەتشى پول گوگەننىڭ «ارلەستەگى تۇنگى كافە» اتتى تۋىندىسى بەرەدى. ءبىز كەنەپ بەتىنەن الۋان تۇستەردىڭ شارپىسقانىن ءھام ءبىر-بىرىمەن ماتاسقانىن عانا بايقايمىز, ال ونداعى كەيىپكەردىڭ ىشكى ءحالى, جان-كۇيى تۋرا وسى كۇزدىڭ بولمىسى سەكىلدى بەيمالىم. ەشتەڭە وزدىگىنەن بولا سالمايدى, بۇل كۇزدىڭ دە ءبىر ەرەكشەلىگى بار, ءدال كارتيناداعى كورىنىستەگىدەي...

گوگەن فرانتسيانىڭ وڭتۇستى­گىندە ارلەستە بولعان كەزىندە بىر­نەشە قۇندى تۋىندى جازدى. سو­نىڭ ءبىرى وسى كەربەز كارتينا. ول مۇندا ۆان گوگتىڭ شاقىرۋىمەن كەلگەن. اتاقتى سۋرەتشىلەردىڭ شى­عار­ماشىلىق تاندەمى الەمگە تاماشا سۋرەتتەر سىيلادى. اري­نە بۇل ءوز الدىنا بولەك اڭگىمە. بۇگىنگى ءسوز كارتينا حاقىندا.

كەنەپتە ارلەستەگى ۆوكزال كا­­فە­سى ەشقانداي بوياماسىز بەي­نە­لەن­گەن. سەبەبى ساعىنىشى الدي­لەگەن جانداردىڭ تۇراعىنا اينال­عان شاعىن مەكەن سۋرەتشىنىڭ دە جانىن تالاي رەت جۇباتقان ەدى.

بىزگە «ارلەستەگى تۇنگى كافە» كارتيناسى كوركەمدىك ەرەكشەلى­گىن جوعالتپاي جەتتى. 1888 جىلى جا­زىلعان جۇمىس ءوز ۋاقىتىنا ساي­كەس كەلەدى. اۆتوردىڭ بۇل كار­تي­­ناعا جاسىرعان سەزىمدەرى ءبىر عا­سىردان استام ۋاقىت وتسە دە ءوز ءمانى مەن مازمۇنىن جوعالتپادى. عاجاپ ەمەس پە؟! مىنا ءداۋىر ءالى دە سول سەزىمدەردىڭ تەڭىزىن كەشىپ جۇرگەندەي.

كەنەپتىڭ الدىڭعى جاعىندا جا­بىرقاۋ ايەلدىڭ بەينەسىن كو­رەمىز. بۇل مەكەمە يەسىنىڭ كە­لىن­شەگى – دجين حانىم. ول شىن­تاعىن ۇستەلگە تىرەپ, قالىڭ ويدىڭ تۇمانىندا اداسىپ جۇر­گەندەي. ارتىنداعى شۋدان قا­شىپ كەتە المايدى. ۇستەل ۇستىن­دە اياقتالماعان ىشىمدىك پەن بو­تەلكە بار. وسى تۇستا ءبىر اڭعار­عانىمىز پول گوگەن كارتينا­نى ءارتۇرلى كومپوزيتسيالىق بو­لىك­تەرگە بولەتىن اشىق ءتۇستى جولاق­تاردى سىزعان. وقىرمانعا ەڭ جاقىن بولىك اق تۇسپەن بويالعان. كارتينانىڭ ورتاسى جاسىل تۇسپەن سىرلانعان. بۇل جەردە بيليارد ۇستەلى مەن ونىڭ استىندا وتىرعان مىسىقتان باسقا ەشكىم جوق. كە­نەپتىڭ جوعارعى جازىقتىعى قىزىل تۇسپەن بەرىلگەن. وندا كافەگە كەلۋشىلەردىڭ سۇلباسى انىق كورىنەدى. ولاردىڭ بارلىعى ءبىر كوڭىل كۇيدىڭ اۋەنىنە توڭكە­رى­لىپ, ومىرگە مۇڭ شاعۋدا. تاعى ءبىر نازىك دەتال – مۇنداعى كەيىپكەر­لەر­دىڭ كوبى سۋرەتشىنىڭ تانىستارى.

بىزدىڭشە گوگەن الدىڭعى قا­تار­داعى ايەل مەن ونىڭ ارتىندا توي­لاپ وتىرعان ادامداردىڭ ءبىر-بىرىنەن الشاقتىعىن كورسەتكىسى كەلگەندەي. ءتىپتى ولاردىڭ اراسى­نا سۇر ءتۇتىننىڭ ۇزىن تىزبەگىن قوس­قان. دجين حانىم ءسال شار­شاعان سياقتى, كەلۋشىلەرگە دەگەن قىزىعۋشىلىق جوق. سەبەبى ۇنەمى جالعىزدىعىمەن الىسقان جانداردىڭ اراسىندا ءوزىنىڭ دە جالعىزدىعى ەسىنە تۇسەدى.

بۇل – كوپ ىشىندەگى جالعىزدىق. بۇل – پول گوگەن!