قوستاناي وبلىسىنىڭ جانگەلدين اۋدانىنا قاراستى كولقامىس اۋىلىنداعى كاربوزوۆتار اۋلەتى ونەگەلى تىرشىلىگى مەن ەڭبەكقورلىعى ارقىلى ەل ىقىلاسىنا بولەنىپ, ءبۇتىن ءبىر اۋىلدىڭ جاراسىمدى ىنتىماق-بەرەكەسىنە ۇيىتقى بولىپ وتىر.
تورعاي وڭىرىندەگى بەرەكە دارىپ, قۇت قونعان ەلدى مەكەننىڭ ءبىرى – كولقامىس اۋىلى. شالعاي اۋىلدىڭ تىنىس-تىرشىلىگىنە قان جۇگىرتىپ وتىرعان «سىما ك» شارۋا قوجالىعى ەكەنىن بۇگىندە ەكىنىڭ ءبىرى بىلەدى. شارۋاشىلىق باسشىسى مانات كاربوزوۆ جۇبايى سالتانات ەكەۋى التى بالا تاربيەلەپ وتىر. بۇگىندە ۇلدارىنىڭ الدى نەمەرە سۇيگىزدى.
– وسى بەرەكەلى تۇرمىس-تىرشىلىكتىڭ ءتۇپ قازىعى – اكەم كاكىمجان كاربوزوۆتان العان ءتالىم-تاربيە. ءبىز ءوزىمىز, ءبىر سوزبەن ايتقاندا, ەڭبەكشى وتباسىندا دۇنيەگە كەلدىك. اكەمىز وسى وڭىردە تۋىپ-ءوسىپ, ەر جەتكەننەن كەيىن ەڭبەككە ارالاستى. ءبىر ادامداي ەڭبەك ەتىپ, قۇرمەتتى دەمالىسقا شىعىپ, ەندى قازىر اۋلەتتىڭ ابىز اقساقالى بولىپ وتىر. ءبىزدىڭ ەڭبەككە ەرتە ارالاسۋىمىزعا, وسىنداي شارۋاشىلىقتى قۇرۋىمىزعا بارىنە باسشى بولىپ, جەتكىزگەن اكەمىزدىڭ ەڭبەگى. ەشقايسىمىزدى قاتاردان قالدىرعان جوق. ءبارىمىزدى وقىتتى, توقىتتى. وتباسىمىزدا ءبىز ءتورت اعايىندىمىز. مەنىڭ الدىمدا ەكى اعام, ءبىر قارىنداسىم بار. ءبارى دە ومىردە ءوز جولدارىن تاۋىپ, وتباسىلى بولىپ, ۇرپاق تاربيەلەپ جاتىر, – دەيدى ماناپ كاربوزوۆ.
تورعاي وڭىرىندە ماناپتاي ەلشىل پەرزەنت, بىلىكتى كاسىپكەردى تاربيەلەپ وسىرگەن كاكىمجان اقساقالدى بىلمەيتىن ادام جوق دەۋگە بولادى. توقسانىنشى جىلداردىڭ باسى – جاڭا نارىقتىق قاتىناستاردىڭ ەل ىشىنە ەندى عانا دەندەپ ەنە باستاعان شاعى ەدى. باسىنا ءتاڭىر سىيىنداي بوپ قونا قالعان تاۋەلسىزدىگىنە ءتاۋ ەتكەن ءتاۋباشىل جۇرت سانانى تۇرمىس بيلەي باستاعان تۇستا راس, ابدىراپ قالدى. العىردى ايالاعانمەن, اڭعالدى ايامايتىن تابيعاتى تىك, تالابى نىق نارىق پاتشا بۇعان دەيىن ۇكىمەتكە ارقا سۇيەپ ۇيرەنىپ قالعان ۇركەردەي جۇرتتى ءاپ دەگەننەن-اق جۇتاتىپ جىبەردى. اسىرەسە قيىردا جاتقان قازاقى اۋىلدار ءۇشىن كۇنكورىس قيىندادى. جايى قيىنعا, مالى تيىنعا اينالعان ءبىراز اعايىن وسى تۇستا قولىنداعى بارىن ساتىپ, قالاعا بەت تۇزەدى. ءبىر كەزدەرى ورىستە مالى شۇرقىراپ, وشاقتا قازانى بۇرقىراپ جاتاتىن قانشاما اۋىلدىڭ قالقيىپ كولەڭكەسى عانا قالدى. وسى تۇستا تاباندى ەڭبەك پەن سۇڭعىلا اقىل-پاراساتىنىڭ ارقاسىندا تۋعان جەرىنە تۇتقا, ەلىنە ەس بولا بىلگەن كاكىمجان اقساقال شالعايدا شاتقاياقتاپ تۇرعان شاعىن ەلدى مەكەننىڭ ەڭسەسىن قايتا تىكتەپ, ەلدىڭ اۋىلعا تۇراقتاپ قالۋىنا ىقپال ەتتى.
كاكىمجان كاربوز ۇلى بۇگىندە شارۋاشىلىق تىزگىنىن ۇلى ماناپقا تاپسىرعان. ەستى ۇل اكە كاسىبىن دوڭگەلەتىپ اكەتتى. كەشەگى قىپشاق سەيىتقۇلدىڭ سىنىعى, ايسانىڭ جالعاسى, توسكەيدەن مالى, تورىنەن قوناعى ارىلماعان تورعايدىڭ ابىز اقساقالى بۇگىندە ەلدىڭ بەرەكەسىن تىلەپ, تۋعان ولكەنىڭ گۇلدەنۋىن قالايدى. باتاگوي قاريا دارحان دالانىڭ اۋىلى قۇتتى, بولاشاعى كەمەل بولاتىنىنا نىق سەنەدى.
بۇگىندە كاكىمجان اتايدىڭ ۇلى مانات كاربوزوۆ باسقارىپ وتىرعان «سىما ك» شارۋا قوجالىعىندا ءتورت ت ۇلىك مالدىڭ بارلىق ءتۇرى بار. جاڭاشىل, ىسكەر ازامات كاسىبىن دوڭگەلەتىپ, اۋىل تۇرعىندارىن دەرلىك جۇمىسپەن قامتىپ وتىر. سونىڭ ناتيجەسىندە, شالعايداعى اۋىل كوركەيىپ, ۋاقىت وتكەن سايىن ءوسىپ-وركەندەپ كەلەدى. اۋىلدا اۋىز سۋ ماسەلەسى دە تولىق شەشىلگەن. كاسىپكەر ءوز قاراجاتىنا مۇنداعى بارلىق ۇيگە سۋ قۇبىرىن كىرگىزىپ بەرگەن.
كاربوزوۆتار شاڭىراعىندا اۋلەتتىك تاربيە جۇيەسى نىق قالىپتاسقان. سوندىقتان بۇل ءۇيدىڭ بالالارى دەرلىك وتباسىلىق قۇندىلىقتاردى قادىر تۇتىپ, بەرىك ۇستانادى.
– ەندى ءبىز دە تالبەسىكتەن باستالعان تاربيەنى ءارى قاراي جالعاستىرىپ, بالالاردىڭ رۋحتى, وتانشىل, ءتۇزۋ ازامات بولىپ وسۋىنە ىقپال بولسىن دەپ ءوزىمىزدىڭ وقىعان-توقىعانىمىزدى, كورگەن-بىلگەنىمىزدى, ومىرلىك تاجىريبەمىزدى كۇندەلىكتى ايتىپ قۇلاعىنا قۇيىپ وتىرامىز. ارينە, ءبىز اتا-انا بولعاننان كەيىن ءوز ۇرپاعىمىزدان ۇلكەن ءۇمىت كۇتەمىز. ۇل-قىزدارىمىز سول ءۇمىتىمىزدى اقتايدى دەپ سەنەمىز, – دەيدى وتاعاسى.
شالعايدا جاتقان شاعىن عانا كولقامىس اۋىلىندا بۇگىنگە دەيىن ءبىر ەمەس, ەكى بىردەي كوركەم فيلم ءتۇسىرىلدى. ەكەۋى دە بالالارعا ارنالعان قىسقامەتراجدى فيلمدەر. العاشقىسى – «بوراندى تۇندە», ال ەكىنشى فيلم – «كاۋسارىم» دەپ اتالادى. ەرەكشەلىگى سول – بۇل كينوتۋىندىلارعا ەشبىر كاسىبي اكتەر قاتىسپايدى. فيلم كەيىپكەرلەرىنىڭ بەينەسىن اۋىل تۇرعىندارى مەن مەكتەپ وقۋشىلارى سومداپ شىققان. ماسەلەن, «كاۋسار» فيلمىنە اۋىلعا العاش كەلگەن قالا بالاسى – بەكجاننىڭ باسىنان وتكەن قىزىقتى وقيعالار ارقاۋ بولعان. بۇعان دەيىن بار بوس ۋاقىتى كومپيۋتەر مەن ۇيالى تەلەفونعا بايلانىپ كەلگەن بەكجان ناعاشىسىنىڭ اۋىلىنا كەلگەن سوڭ, وزىنە بەيتانىس مۇلدە باسقا ءومىردى كورەدى. دالا تابيعاتى مەن اۋىل بالالارىنىڭ كوڭىلدى ويىن-تىرشىلىگىمەن تانىسادى. ادەمى قىز كاۋسارعا دەگەن العاشقى سەزىمى ويانادى. وسىنىڭ ءبارى بەكجاندى تۇبەگەيلى وزگەرتىپ, اۋىلعا دەگەن اڭسارىن وياتادى. فيلمدەگى باس كەيىپكەردىڭ ءبىرى – ايداردىڭ ءرولىن ماناپتىڭ ورتانشى ۇلى ءسارۋار كاكىمجان سومدايدى.
كاربوزوۆتار وتباسىنىڭ ۇلكەنى – جانىبەك وسىدان ءبىراز جىل بۇرىن الماتىداعى تەمىربەك جۇرگەنوۆ اتىنداعى ونەر اكادەمياسىنىڭ رەجيسسۋرا فاكۋلتەتىن تامامداعان. بۇگىندە وبلىس ورتالىعىندا مادەنيەت سالاسىندا ەڭبەك ەتىپ ءجۇر. ءبىز ايتقان ەكى ءفيلمنىڭ رەجيسسەرى دە, وپەراتورى دا وسى جىگىت. پروديۋسسەرى – اكەسى مانات. باستى رولدەردە وينايتىن نەگىزگى اكتەر – ءىنىسى ءسارۋار. ال رەجيسسەرگە كومەكشى بولۋ, فيلم ستسەناريىن جازۋ, كوستيۋم تىگۋ, رولدەرگە اكتەر تاڭداۋ, بۇدان وزگە دە تولىپ جاتقان اكىمشىلىك-ۇيىمداستىرۋ جۇمىستارى اناسى سالتاناتتىڭ موينىندا. شيرەك عاسىر بويى ۇستازدىق ەتىپ كەلە جاتقان سالتانات شايماعامبەتوۆانىڭ ايتۋىنشا, بۇگىندە الەۋمەتتىك جەلى ارقىلى كەڭ تاراپ, كوپشىلىك كورەرمەنگە ۇناعان ەكى فيلم دە ۇلى جانىبەكتىڭ باستاماسىمەن جارىققا شىققان.
– كەز كەلگەن اتا-انا بالاسىنىڭ جەتىستىگىنە قۋانادى عوي. بالانى قولداپ وتىرۋ كەرەك. بالاعا «وي, تاستاشى, ونى ىستەي المايسىڭ!» دەپ ايتۋعا بولمايدى. كەرىسىنشە «سەنىڭ قولىڭنان كەلەدى, وسىنى ايتا الاسىڭ, جاساي الاسىڭ» دەپ ۇنەمى قايراتتاندىرىپ, كۇش بەرىپ قاناتتاندىرىپ وتىرۋ كەرەك. سوندا ءار بالانىڭ ءوزىنىڭ قابىلەتى اشىلىپ, ءارى قاراي ۇشتالا تۇسەدى. بۇل فيلمدەردەگى كەيىپكەرلەردىڭ ءبارىن ءوزىم وقىتقان شاكىرتتەرىم بەينەلەپ شىقتى. قاي بالانىڭ قاي رولگە بەيىم ەكەنىن جاقسى بىلەمىن, سوندىقتان اكتەرلەردى دە ءوزىم تاڭداپ, ۇلىما اقىل-كەڭەسىمدى بەرىپ وتىردىم. ەڭ باستىسى, بالانى قاناتتاندىرىپ وتىرۋ كەرەك, ويتكەنى قابىلەتسىز بالا بولمايدى, – دەيدى تاجىريبەلى ۇستاز.
كاربوزوۆتار وتباسى بۇگىن دە تۋعان اۋىلدىڭ ءوسىپ-وركەندەۋى جولىندا تىنباي ەڭبەكتەنىپ كەلەدى. ءتۇتىنى ءتۇزۋ ۇشقان بەرەكەلى اۋىلدىڭ الەۋمەتتىك جاعدايىنىڭ تۇزەلىپ, تۇرمىس-تىرشىلىگىنىڭ گۇلدەنۋىنە ەلەۋلى ۇلەس قوسىپ وتىرعان ەڭبەكشىل اۋلەتتىڭ بۇگىنگى كەلبەتى كوپكە ونەگە بولارلىق.
قوستاناي وبلىسى,
جانگەلدين اۋدانى,
كولقامىس اۋىلى