«تاۋەلسىزدىك – ءبىزدىڭ ەڭ قاستەرلى قۇندىلىعىمىز. ەگەمەندىك دەگەنىمىز – جالاڭ ۇران مەن جالىندى ءسوز ەمەس», دەدى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ. مەملەكەت باسشىسى تىلگە تيەك ەتكەندەي بيىل تاۋەلسىزدىگىمىزگە 30 جىل, سونىمەن قاتار قاللەكي تەاترىنا دا 30 جىل.
ەگەمەندىگىمىزدىڭ ءتول قۇرداسى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترى ەلباسىمىزدىڭ باستاماسىمەن, ەل پرەزيدەنتىنىڭ قولداۋىمەن جاڭا عيماراتقا كوشىپ, شىعارماشىلىق جولىندا جاڭا بەلەسكە قادام باستى.
سونداي-اق پرەزيدەنت: «بولاشاعىن وتانىمىزبەن بايلانىستىراتىن ءاربىر ازامات قازاق ءتىلىن ۇيرەنۋگە دەن قويۋى ءتيىس. بۇل – وتانشىلدىقتىڭ باستى بەلگىسى دەۋگە بولادى. قازاق ءتىلى, شىن مانىندە ءبىلىم مەن عىلىمنىڭ, مادەنيەت پەن ءىس جۇرگىزۋدىڭ تىلىنە اينالىپ جاتىر», دەپ باسا ايتتى. ال تەاتر – ءتىلىمىزدىڭ كەڭ ناسيحاتتالىپ, ءورىسىن كەڭەيتۋىنە جول اشار كيەلى شاڭىراق.
مەملەكەت باسشىسى 2022 جىلدان 2025 جىلعا دەيىن مادەنيەت قىزمەتكەرلەرىنىڭ, مۇراعاتشىلاردىڭ, كىتاپحاناشىلاردىڭ, تەحنيكالىق قىزمەتكەرلەردىڭ جالاقىسىن جىل سايىن ورتا ەسەپپەن 20 پايىزعا ءوسىرۋدى تاپسىردى. دەمەك پرەزيدەنتىمىزدىڭ قولداۋىن ۇلكەن جاۋاپكەرشىلىكپەن سەزىنىپ, مادەنيەت پەن ونەرىمىزدىڭ وركەندەۋى جولىندا ەرىنبەي ەڭبەك ەتۋگە ءتيىسپىز.
قۋاندىق قىستىقباەۆ,
قازاقستاننىڭ ەڭبەك سىڭىرگەن قايراتكەرى