جامبىل وبلىسىندا «دوپينگ» جەدەل الدىن الۋ ءىس-شاراسى باستالدى, - دەپ حابارلايدى Egemen.kz.
جەدەل-ىزدەستىرۋ ءىس-شارالارى بارىسىندا جامبىل وبلىسىنىڭ پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى مويىنقۇم اۋىلىنان 5 شاقىرىم جەردە شۋ قالاسىنىڭ 31 جاستاعى تۇرعىنىن ۇستادى.
تۇرعىندى ءتىنتۋ بارىسىندا جالپى سالماعى 4 كەلى 704 گر «گاشيش» ەسىرتكى زاتى تابىلىپ, تاركىلەندى.
«ۇستالعان ەر ادام كىناسىن تولىق مويىنداپ, شۋ قالاسىنىڭ ۋاقىتشا ۇستاۋ يزولياتورىنا قاماققا الىندى. قازاقستان رەسپۋبليكاسى قىلمىستىق كودەكسىنىڭ 297-بابى 3-بولىگى (ەسىرتكى زاتتاردى, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, قايتا وڭدەۋ, ساتىپ الۋ, ساقتاۋ, تاسىمالداۋ, جونەلتۋ نەمەسە وتكىزۋ) بويىنشا سوتقا دەيىنگى تەرگەۋ امالدارى باستالدى», دەدى جامبىل وبلىسىنىڭ پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى اسقار جۇمابەكوۆ.