كەشە ءماجىلىستىڭ الەۋمەتتىك-مادەني دامۋ كوميتەتىنىڭ ءتورايىمى دينار نوكەتاەۆا باستاعان دەپۋتاتتار ۇلى جەڭىستىڭ 65 جىلدىعى قارساڭىندا ۇلى وتان سوعىسىنىڭ ارداگەرلەرى مەن ءبىر توپ تىل ەڭبەككەرلەرىن سالتاناتتى جاعدايدا قۇتتىقتادى. پارلامەنت ءماجىلىسى مەن “نۇر وتان” پارتياسىنىڭ وسى پالاتاداعى فراكتسياسى ۇيىمداستىرعان بۇل شارا الماتى قالاسىندا, بۇرىنعى جوعارعى كەڭەستىڭ عيماراتىندا ءوتتى.
دينار نوكەتاەۆا ءماجىلىس توراعاسى, “نۇر وتان” حدپ فراكتسياسىنىڭ جەتەكشىسى ورال مۇحامەدجانوۆتىڭ قۇتتىقتاۋ لەبىزىن جەتكىزدى. ارداقتى ارداگەرلەردىڭ ءجۇرىپ وتكەن جولدارى, مايدان دالاسىندا جاساعان قايسارلىق پەن ەرلىكتەرى وسكەلەڭ ۇرپاققا ۇلگى ەكەنىن ايتتى. “قازاقستان پرەزيدەنتى نۇرسۇلتان نازارباەۆتىڭ تاپسىرماسىنا سايكەس ۇكىمەت, پارلامەنت دەپۋتاتتارى ارداگەرلەردىڭ جاعدايىن جاقسارتۋ ءۇشىن بارلىق مۇمكىندىكتى جاساپ وتىر. قاھارماندارىمىزدىڭ ەرلىكتەرىن قۇرمەتتەۋ, ارداگەرلەردىڭ قامىن ويلاۋ, جاستاردى پاتريوتتىق رۋحتا تاربيەلەۋ – ءبىزدىڭ مىندەتىمىز”, – دەدى دەپۋتات د.ءنوكەتاەۆا.
ءماجىلىس دەپۋتاتتارى تۇراربەك اسانوۆ پەن گۇلميرا ءيسىمباەۆا ارداگەرلەرگە ارناعان ىستىق لەبىزدەرىن ءبىلدىردى.
ايتا كەتۋ كەرەك, الماتى قالالىق ارداگەرلەر كەڭەسىنىڭ پارلامەنتتەگى باستاۋىش ۇيىمىنىڭ مۇرىندىق بولۋىمەن ۇلى جەڭىستىڭ 65 جىلدىعىنا وراي كىتاپشا شىعارىلعان. وندا ارداگەرلەردىڭ مايدانداعى ەرلىكتەرى مەن سوعىستان كەيىنگى ەڭبەك جولدارى باياندالعان.
الماتى قالالىق ارداگەرلەر كەڭەسىنىڭ توراعاسى ەرەنعايىپ شايحۋددينوۆ زەينەتكەرلەرگە جاسالىپ جاتقان قولداۋعا ريزاشىلىعىن ءبىلدىردى. سوعىس جانە ەڭبەك ارداگەرلەرى ىزگىلىك داباەۆ, ەۆگەني سافرونوۆ, رايحان جالمۋرزينا, سارا بازارقۇلوۆا جانە باسقالار ءسوز سويلەپ, وسى شارانى ۇيىمداستىرعاندارعا العىستارىن ايتتى.
ارداگەرلەر قۇرمەتىنە ونەر اكادەمياسىنىڭ ستۋدەنتتەرى شاعىن كونتسەرت بەردى. قادىرلى مەيماندارعا گۇل شوقتارى مەن پارلامەنتتىك سىيلىقتار تابىس ەتىلدى.
ساۋلە دوسجانوۆا, جۋرناليست. الماتى.