نيۋ-يوركتە قازاقستان رەسپۋبليكاسى مەن ترينيداد جانە توباگو رەسپۋبليكاسىنىڭ بۇۇ جانىنداعى تۇراقتى وكىلدەرى قايرات ءابدىراحمانوۆ پەن رودنەي چارلز ەكى ەل اراسىندا ديپلوماتيالىق قارىم-قاتىناس ورناتۋ تۋرالى بىرلەسكەن كومميۋنيكەگە قول قويدى.
نيۋ-يوركتە قازاقستان رەسپۋبليكاسى مەن ترينيداد جانە توباگو رەسپۋبليكاسىنىڭ بۇۇ جانىنداعى تۇراقتى وكىلدەرى قايرات ءابدىراحمانوۆ پەن رودنەي چارلز ەكى ەل اراسىندا ديپلوماتيالىق قارىم-قاتىناس ورناتۋ تۋرالى بىرلەسكەن كومميۋنيكەگە قول قويدى.
قول قويۋ ءراسىمى كەزىندە ەكىجاقتى دەڭگەيدەگى جانە بۇكىلالەمدىك ۇيىم اياسىنداعى ىنتىماقتاستىقتىڭ قازىرگى جاعدايى مەن پەرسپەكتيۆالارى بويىنشا پىكىر الىسىلدى. قازاقستان مەن ترينيداد جانە توباگونىڭ دامۋ كەزەڭدەرىنىڭ ۇقساستىعى, اتاپ ايتقاندا, تاۋەلسىزدىككە قول جەتكىزۋلەرى, دەموكراتيالىق دامۋى, وڭىرلىك ينتەگراتسيالىق ۇدەرىستەرگە قاتىسۋى, قوعامنىڭ تولەرانتتىلىعى اتاپ ءوتىلدى.
تاراپتار مەملەكەتتەر اراسىنداعى ءوزارا ءتيىمدى بايلانىستاردى كەڭەيتۋدىڭ ماڭىزىنا دەن قويدى. اسىرەسە, ەنەرگەتيكا, ساۋدا-ساتتىق, وڭىرلىك رىنوكتارعا قولجەتىمدىلىك, تۋريزم مەن ءبىلىم بەرۋ سالالارىنداعى بايلانىستار اۋقىمىن كەڭەيتۋدىڭ قاجەت ەكەندىگى اتاپ كورسەتىلدى.
سونداي-اق, قازاقستاننىڭ وسى ارال مەملەكەتتىڭ ورتالىق ازيا ەلدەرىمەن ىنتىماقتاستىعىن دامىتۋعا ىقپال ەتۋ مۇمكىندىگى زور. سونىمەن قاتار, قازاقستان ءۇشىن ءوز تاۋارلارى مەن قىزمەتتەرىن لاتىن امەريكاسى مەن كاريب باسسەينى وڭىرىنە شىعارۋدىڭ ماڭىزى ايتارلىقتاي.
كەزدەسۋ كەزىندە ەكى مەملەكەت ءۇشىن دە قىزىعۋشىلىق تانىتىلاتىن بۇۇ-نىڭ كۇن ءتارتىبىندەگى ماڭىزدى ماسەلەلەر دە تالقىلاندى. ولاردىڭ اراسىندا تەڭىزگە شىعاتىن جولدارى جوق ەلدەر مەن شاعىن ارال مەملەكەتتەردىڭ پروبلەمالارىن شەشۋ, ورنىقتى دامۋ ماقساتتارىن بەلگىلەۋ, قورشاعان ورتانى قورعاۋ, ت.ب. ماسەلەلەر بار.
ترينيداد جانە توباگو – كاريب تەڭىزىنىڭ وڭتۇستىك بولىگىندە ورنالاسقان ارال مەملەكەت. 1,3 ميلليون حالقى بار. ساياسي جۇيەسى پارلامەنتتىك دەموكراتيانىڭ بريتاندىق ۇلگىسىنە نەگىزدەلگەن پارلامەنتتىك رەسپۋبليكا بولىپ تابىلادى. ەكونوميكانىڭ نەگىزگى سەكتورلارى – مۇناي مەن گاز ءوندىرۋ جانە ءوڭدەۋ. سونداي-اق, ترينيداد جانە توباگو – الەمدە ءاسفالتتىڭ اسا ءىرى تابيعي رەزەرۆۋارى بار ەل.
بۇل ەل بۇۇ-عا 1962 جىلدىڭ 18 قىركۇيەگىندە ەنگەن. امەريكا مەملەكەتتەرى ۇيىمىنا, كاريب قوعامداستىعىنا, دۇنيەجۇزىلىك ساۋدا ۇيىمىنا, لاتىن امەريكاسى ەكونوميكالىق جۇيەسىنە مۇشە بولىپ تابىلادى.
«ەگەمەن-اقپارات».