ءومىر مەن ونەردى مارافون دەپ قابىلدايتىن تۋىندىگەر ءوز شىعارمالارىندا ۋاقىت پەن سەزىمنىڭ تراگەدياسىن كورسەتۋگە تىرىسادى. ەگەر سۋرەتشى ءۇشىن گرافيكا – ەڭ الدىمەن ويلاۋ, دۇنيەتانىمدى كورسەتۋ ءتاسىلى بولسا, وندا اكۆارەل – سەزىمدەر مەن ەموتسيونالدى رەفلەكستەردى جەتكىزۋ قۇرالى.
اۆتور «كۇلتەگىن», «قىزىل قۇمىرا», ء«چونتۆاريدىڭ جۇماعى», «تولعاناي», «قاڭباق», «رەكۆيەم», «ليتورگيا», ء«تالتۇس», تاعى باسقا اكۆارەل جۇمىستارىندا ادام قۇندىلىعىنىڭ جوعالۋى سىندى ۋاقىتتىڭ قاسىرەتىن ىشكى جان دۇنيەسىنەن وتكىزە وتىرىپ, مىسقىلمەن, ساركازممەن جەتكىزەدى. قايىرباي زاكىر ۇلى قازاق بەينەلەۋ ونەرىنە 1970 جىلدارى كەلدى. وسىناۋ بەدەرلى جىلدار بەلەسىندە قازاقستاننىڭ ەڭبەك سىڭىرگەن ونەر قايراتكەرى, كورنەكتى سۋرەتشى, گرافيك-شەبەردىڭ قالامىنان ورىلگەن كەڭ تىنىستى تۋىندىلار ۇلتتىق مادەنيەتتىڭ سالقار كوشىنە مازمۇندى مۇرا بولىپ قوسىلدى دەسەك قاتەلەسپەسپىز. كوپشىلىككە «ۇلبالانىڭ باقىتى», «تەڭىز تۋرالى تولعاۋ», «بازار جىراۋ» توپتامالارىمەن بەلگىلى ونەر يەسىنىڭ تۋعانىنا 75 جىل تولۋىنا وراي ءا.قاستەەۆ اتىنداعى مەملەكەتتىك ونەر مۋزەيىندە اشىلعان «مينوتاۆرلار مارافونى» كورمەسىنە بارساڭىز, شەبەردىڭ شىعارماشىلىق الەۋەتىن انىق تانيسىز.
– فيلوسوفيالىق تەرەڭ ويلايتىن سۋرەتشىنى الەم, ادام بولمىسى, ۋاقىت بايلانىسى جانە اتا-بابالاردىڭ رۋحاني مۇراسى تاقىرىپتارى تولعاندىرادى. 1990 جىلداردان باستاپ سۋرەتشى شىعارماشىلىعى وزگەرىسكە ۇشىراپ, تۋىندىلارىندا ميفولوگيالىق سيۋجەتتەر مەن عارىشتان, بەينەبىر قۇس جولىنان كەلگەندەي ميستيكالىق بەينەلەر پايدا بولادى. «مينوتاۆرلار مارافونى» – ق.زاكىر ۇلىنىڭ اكۆارەل تۋىندىلارى توپتاماسىنىڭ شارتتى اتاۋى. وعان سوڭعى ەكى جىلدا ورىندالعان جيىرماعا جۋىق اكۆارەل پاراقتارى كىرەدى. مۇنداي تاقىرىپتىڭ تاڭدالۋى, ەڭ الدىمەن, سۋرەتشىنىڭ دۇنيەتانىمى مەن كوزقاراسىنىڭ وزىندىك ەرەكشەلىگىندە جاتىر. كورمە شەبەر شىعارماشىلىعىنىڭ 50 جىلدىعىنا جانە تاۋەلسىزدىكتىڭ مەرەيلى بەلەسى مەن قازاقستان رەسپۋبليكاسى كوركەم اكادەمياسىنىڭ 15 جىلدىعىنا ارنالىپ وتىر, – دەيدى بەلگىلى ونەرتانۋشى سامال مامىتوۆا.
قايىرباي زاكىر ۇلى 1945 جىلى قىزىلوردا وبلىسى ارال قالاسىندا دۇنيەگە كەلگەن. 1968 جىلى ن.ۆ. گوگول اتىنداعى الماتى كوركەمسۋرەت ۋچيليششەسىن, 1976 جىلى اباي اتىنداعى قازاق پەداگوگيكالىق ينستيتۋتىنىڭ كوركەمسۋرەت-گرافيكا فاكۋلتەتىن تامامداعان. 1968 جىلدان باستاپ رەسپۋبليكالىق جانە حالىقارالىق كورمەلەرگە قاتىسىپ كەلەدى. 1976 جىلدان قازاقستان سۋرەتشىلەر وداعىنىڭ مۇشەسى. 1988 جىلى «قازاقستاننىڭ ەڭبەك سىڭىرگەن ونەر قايراتكەرى» اتانىپ, 1996 جىلى پرەزيدەنت ستيپەندياسىنىڭ يەگەرى بولدى. 2006 جىلدان قازاقستان كوركەم اكادەمياسىنىڭ اكادەميگى. 2008 جىلدان قىزىلوردا «بولاشاق» ۋنيۆەرسيتەتىنىڭ قۇرمەتتى پروفەسسورى. 2013 جىلى حالىقارالىق تۇركسوي سىيلىعىنىڭ يەگەرى اتاندى. 2019 جىلى سولتۇستىك كيپردە جەكە شىعارماشىلىق كورمەسى ءوتتى. تۋىندىلارى ءا.قاستەەۆ اتىنداعى مەملەكەتتىك ونەر مۋزەيىندە, وبلىستىق مۋزەيلەر قورىندا جانە اقش, رەسەي, جاپونيا, يەمەن, فرانتسيا, قازاقستاننىڭ جەكە كوللەكتسيالارى مەن گالەرەيالارىندا ساقتاۋلى. الماتىلىقتار مەن قالا قوناقتارىنا قۇشاق اشقان كورمەگە اۆتوردىڭ جەكە جيناعىنان الىنعان 30-عا جۋىق كارتينا قويىلعان.
الماتى